"Choykoʻl" suvni chuchuklashtirish stantsiyasining faoliyati oʻrganildi

Aholini toza va sifatli ichimlik suvi bilan taʼminlash – ijtimoiy farovonlikning asosiy mezoni hamda xalq salomatligini saqlashning eng muhim omilidir. Statistik maʼlumotlarga koʻra, 2025-yilning 1-yanvar holatiga Qoraqalpogʻiston Respublikasida jami 2 million 29 mingdan ortiq aholi istiqomat qiladi. Shundan 1 million 505 mingdan ortigʻi, yaʼni aholining 74,2 foizi markazlashgan ichimlik suvi tarmoqlari orqali toza suv bilan taʼminlangan. Shuningdek, hududda oqova suv xizmati bilan qamrab olish darajasi 5,4 foizni tashkil etadi. Bugungi kunda respublika boʻyicha ichimlik suv tarmoqlarining umumiy uzunligi 7 961 kilometrni, oqova suv tarmoqlarining uzunligi esa 223,2 kilometrni tashkil qilib, bu ulkan infratuzilma tunu kun aholi xizmatida.

Qoraqalpogʻiston aholisini markazlashgan ichimlik suvi bilan taʼminlash tizimi asosan uchta yirik suv tozalash inshooti hamda mahalliy suv manbalariga asoslangan. Birinchi va eng yirik manba – bu sutkasiga 140 ming kub metr suv tozalash quvvatiga ega boʻlgan "Tuyamoʻyin" suv tozalash inshootidir. Ushbu strategik obʼekt Amudaryoning oʻng qirgʻogʻida joylashgan tumanlarga hamda Nukus shahriga umumiy uzunligi 356 kilometr boʻlgan magistral suv quvurlari orqali ichimlik suvi yetkazib beradi.

Ikkinchi yirik manba esa "Taxiatosh" suv tozalash inshootidir. Sutkalik quvvati 60 ming kub metr boʻlgan ushbu inshoot Amudaryoning chap qirgʻogʻidagi tumanlar aholisiga jami uzunligi 197,6 km boʻlgan quvurlar orqali suv uzatadi.

Uchinchisi esa bevosita poytaxt aholisi uchun moʻljallangan "Nukus" suv tozalash inshootidir. Markaziy tarmoqlar yetib bormagan chekka hududlar, shahar va tuman markazlaridan olisdagi qishloq aholi punktlariga esa ochiq suv havzalari va yer osti suvi manbalaridan foydalanuvchi 308 ta lokal suv inshootlari xizmat koʻrsatadi.

Amudaryo tumanining "Choykoʻl" ovulida joylashgan "Choykoʻl" suvni chuchuklashtirish stantsiyasi ana shunday aholi uchun hayotiy muhim obʼektlardan biridir. 2019-yilda davlat dasturi asosida qurilgan mazkur inshoot yer ostidan olinadigan shoʻr suvni zamonaviy texnologiyalar yordamida tozalashga ixtisoslashgan boʻlib, soatiga 1 kub metr suv tozalash quvvatiga ega. Ushbu ixcham stantsiya ovuldagi 80 ta xonadonni toza ichimlik suvi bilan taʼminlab kelmoqda.

Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspektsiyasining Qoraqalpogʻiston Respublikasi hududiy inspektsiyasi masʼul xodimlari mazkur stantsiyada boʻlib, nazorat tadbirlarini oʻtkazdilar. Inspektsiyaning Ichimlik suvdan oqilona foydalanish va sotishni muvofiqlashtirish hamda oqova suv xizmatlaridan foydalanish boʻlimi mutaxassislari nafaqat suvning vaqtida berilishini, balki texnik jarayonlarning barcha bosqichlarini chuqur tahlil qildilar.

Oʻrganish davomida mutaxassislar tomonidan yer osti suvlari tarkibidagi tuz va zararli moddalarni ushlab qoluvchi maxsus membranalarning yaroqlilik muddati, ularning oʻz vaqtida yuvilishi va almashtirilishi jarayonlari tekshirildi. Mutaxassislar isteʼmolchilarga yetkazib berilayotgan suv namunalarining kimyoviy va bakteriologik tahlil natijalari qayd etilgan jurnallarni ham oʻrganib, suv sifatining davlat standartlariga muvofiqligini ham oʻrgandilar.

Inspektsiya tomonidan olib borilayotgan bunday oʻrganishlar chekka hududlardagi aholining ham sifatli suv isteʼmol qilish huquqini kafolatlashga xizmat qiladi.