Томчилатиб суғориш технологиясига бағишланган семинар ўтказилди

Мамлакатимизда аҳоли сонининг тобора ошиб бораётгани сабабли инсонларнинг озиқ-овқатга бўлган ортиб бораётган эҳтиёжини қондириш учун деҳқончиликни янада ривожлантиришга алоҳида эътибор берилмоқда. Деҳқончилик соҳасида энг муҳим вазифа бу экинларга кераклича сув етказиб беришдир. Сўнгги йилларда бутун дунё аҳолисини қийнаб келаётган сув танқислиги муаммосини юмшатиш мақсадида мавжуд сув заҳираларини тежаш муҳим аҳамиятга эга.

Қишлоқ хўжалиги маҳсулотларини нобуд қилмасдан етиштириш, уларни керакли сув билан таъминлаш, сув заҳираларини тежаш мақсадида экинларни томчилатиб суғориш технологиясини жорий этиш яхши самара бермоқда.

Жорий йилнинг 19 июнь санасида туманимиздаги “Ражапов Омонбой” фермер хўжалигида томчилатиб суғориш бўйича семинар ўтказилди. Семинарда Қорақалпоғистон Республикаси Сув хўжалиги вазирлиги мутахассиси Абу Қидирбаев, туман хокимининг қишлоқ ва сув хўжалиги масалалари бўйича ўринбосари Файзулла Саъдуллаев, “Асл қишлоқ тараққиёт" масъулияти чекланган жамияти директори Жасур Юнусов, туман Ирригация бўлими бошлиғи Жамол Ражапов, туман Сув истеъмолчилари уюшмаси раҳбари Эркабой Ўразбоев ҳамда тумандаги фермер ҳўжаликлари раҳбарлари иштирок этдилар.

Айтиш керакки, бугунги кунда туманимизда қишлоқ хўжалиги экинларини томчилатиб суғориш юзасидан тизимли ишлар қилинмоқда. Жорий йилда тумандаги жами 3800 гектар экин майдонида сувни тежайдиган технологияларни жорий қилиш белгиланган бўлиб, шундан 3730 гектар ер томчилатиб суғориш, 30 гектар майдон ёмғирлатиб суғориш, 40 гектар ер эса дискрет суғориш технологияси орқали суғориш режалаштирилган.

Шу кунга қадар жами 169 та фермер хўжалиги ва 1 та кластер ташкилоти томонидан 2815 гектар экин майдонида сувни тежайдиган технологияларни жорий қилиш бўйича пудратчи ташкилотлар билан шартномалар тузилган.

Шунингдек, пахта хомашёсини етиштиришда томчилатиб суғориш технологиясини жорий қилиш бўйича 145 та фермер хўжалиги томонидан 2581,4 гектар, 1 та кластер ташкилоти томонидан 34,5 гектар майдонда, мевали боғ ва бошқа экин майдонларида томчилатиб суғориш технологиясини жорий қилиш бўйича 19 та фермер хўжалиги томонидан 130 гектар майдонда пудратчи ташкилотлар билан шартномалар қилинган.

Семинарда йиғилганларга томчилатиб суғориш технологиясининг афзалликлари, технологиядан фойдаланишнинг ўзига хос жиҳатлари хусусида маълумотлар бериб ўтилди.

Таъкидланганидек, томчилатиб суғориш технологиясининг анъанавий суғоришдан қатор афзалликлари мавжуд. Хусусан, томчилатиб суғоришда экинларнинг фақат илдиз тизими намлади. Бундай ҳолда, сув ўсимлик томонидан керакли миқдорда ва тез сўрилади ҳамда унинг ўсиши ва ривожланишига зарар етказмайди. Анъанавий суғориш билан солиштирганда, томчилардан фойдаланганда, тупроқнинг табиий тузилиши бузилмайди. Кучли қуёш нурлари билан ўсимликлар нобуд бўлмайди, бу баргларга томчилар тушганда кузатилади. Автоматлаштирилган томчилатиб суғориш тизими билан суғориш инсоннинг минимал аралашуви билан амалга оширилади. Сув тупроққа фақат илдиз тизими ётадиган жойларда киради, у ҳар бир ўсимлик учун бир текис ва доимий равишда зарур бўлган миқдорда етказиб берилади.

Семинар иштирокчилари томчилатиб суғориш технологияси бўйича мутахассисларга саволлар билан мурожаат қилдилар ва тегишли жавоблар олдилар.

Чарос Арслонова, туман ҳокимлигининг Ахборот хизмати раҳбари.