ТАКРОРИЙ ЭКИНЛАРНИ ЭКИШ ИШЛАРИ ЯКУНЛАНДИ

Бугунги кунда аҳолини озиқ-овқат маҳсулотлари билан таъминлаш дунё мамлакатлари учун энг долзарб масалага айланган. Аҳоли сонининг ўсиб бориши, қишлоқ хўжалигида фойдаланилаётган ер ва сув ресурсларининг чекланганлиги, айниқса, ўтган йилдан бери ҳукм сураётган пандемия, табиатдаги ўзгаришлар вазиятни янада мураккаблаштирмоқда. Шу боис юртимизда мавжуд имкониятлардан фойдаланган ҳолда, кузги бошоқли дон экинлари йиғиштириб олинганидан сўнг, такрорий экин парваришлашга жиддий эътибор қаратилмоқда.

Президентимиз томонидан шу йил 8 июнь куни ўтказилган видеоселектор йиғилишида берилган топшириқларга кўра Қорақалпоғистон Республикасида ҳам мазкур йилда ғалладан бўшаган майдонларга такрорий экинлар экспортбоп ва ички бозор талабларидан келиб чиқиб  жойлаштирилади. Шунга мувофиқ туманда аҳолининг озиқ-овқат хавфсизлигини таъминлаш мақсадида 2021 йил ҳосили учун экилган ғалла майдонларидан бўшаган майдонларга такрорий экинлар экиш режалаштирилди.

Дўрман овули ҳудудидаги фермер хўжаликларида ҳам 217 гектар ер майдонига ғалла экилган бўлиб, бўшаб қолган ернинг 170,4 гектари такрорий экин экиш учун ажратиб берилди. Ушбу ер майдонлари шу ҳудуд аҳолисидан 568 нафарига бўлиб берилиб, бандлиги таъминланди. Ҳозирги кунда ажратиб берилган ерлар қайта шудгор қилиниб, эгатлар тортилди. Тайёр бўлган ерларга сабзавотлардан карам, лавлаги, сабзи ҳамда мойли, дуккакли, чорва учун озуқабоп экинлар экиб чиқилди. Овул ҳудудидаги “Пирназаров Тўрабой” ҳамда “Раҳимбердиев Шуҳрат” фермер хўжаликларида ҳам такрорий экин экишга ажратилган ер майдонларига сабзавотлар экилиб, парваришлаш ишлари бошлаб юборилди.

Таъкидлаш жоизки, туманда ғалладан бўшаган ерларнинг 3300 гектарига такрорий экин экиш режага киритилди. Шундан 258 гектарга сабзавот экинлари  экилиши кўзда тутилган бўлиб, 208 гектар ерга сабзи, 15 гектарга шолғом, 15 гектарга турп,  10 гектарга бош карам, 10 гектарга ош лавлаги экилди. Ундан ташқари, 35 гектарга картошка, 337 гектарга дуккакли экин мош ҳам экиб бўлинди. Шунингдек, 755 гектарга мойли экинлар экиш режалаштирилган эди. Шунга кўра 240 гектарга кунгабоқар, 515 гектарга кунжут уруғи қадалди.

Режага кўра 736 гектарга ерга озуқа экинлари ҳам экилиб, маккажўхори дон учун 44 гектар, маккажўхори силос учун  515 гектар ер ажратилди. Шунингдек, ғалладан бўшаган ерларнинг 1135 гектарига шоли ҳам экилди.

Такрорий экинларни экиш ва маҳсулот етиштириш учун  талаб этиладиган уруғлик, минерал ўғит, ёқилғи мойлаш материаллари ва кредит маблағлари учун жами 16 млн. 851 млн. сўмлик пул маблағлари ажратилди. Шундан 2 млрд.65 млн. сўм техникалар сервис хизматлари учун, 6 млрд.239 млн. сўм 808 тонна минерал ўғит учун, 3 млрд. 437 млн. сўм 458 тонна азот учун, 2 млрд. 505 млн. сўм 251 тонна фосфор учун, 317 млн. сўм 99 тонна калий учун, 1 млрд. 808 млн. сўм 321 тонна уруғлик учун, 3 млрд. 74 млн. сўм 427 тонна ёқилғи мойлаш материаллари учун ишлатилди. Иш ҳақи учун эса 3 млрд. 665 млн. пул маблағлари сарф этилди.

Туманда такрорий экин экиш ишлари 6 июлга қадар амалга оширилиб якунланди. Ушбу чора-тадбирлар мамлакатимизда озиқ-овқат хавфсизлигини таъминлаш, аҳолига куз-қиш мавсумларида рўзғорга керакли озиқ-овқат маҳсулотларини узлуксиз ҳамда арзон нархларда етказиб бериш, экспортни кўпайтириш орқали деҳқон ва фермерларнинг моддий манфаатдорлигини оширишга хизмат қилади.

О. Худойберганова.