Қорақалпоғистон Республикаси прокурори ўринбосари иштирокида сайёр қабуллар ўтказилди

28 сентябрь куни Амударё тумани 2-сектор ҳудудидаги қатор овул ва маҳаллаларда Қорақалпоғистон Республикаси прокурори ўринбосари Ойбек Шомуратов, туман прокурори Жавлон Муфтуллаевлар сайёр қабул ўтказдилар. Сайёр қабулда тумандаги корхона-ташкилотлар раҳбарлари, 2-секторга бириктирилган ишчи гуруҳ аъзолари, овул ва маҳалла фуқаролар йиғинлари масъуллари, “Аёллар дафтари”га киритилган хотин-қизлар, “Ёшлар дафтари”га киритилган ёшлар ҳамда аҳоли вакиллари иштирок этдилар.

Ўрта қалъа овулида ўтказилган сайёр қабулда аҳоли томонидан йўлланган 9 та турли мазмундаги мурожаатлар қабул қилинди. Хусусан, қабул жараёнида юртдошларимиз томонидан кураш спорт турини ривожлантириш учун имтиёзли  кредит ажратилишида, уйи ёнига ичимлик суви тармоғи тортиш ва шу ҳудудда болалар боғчаси ташкил этилишида, 64-мактаб учун қўшимча бино қуриш, мактаб олдидаги йўлга пиёдалар ўтиш йўлаги чизиш ва йўл белгиларининг ўрнатилишида, ички йўлларни таъмирлаш ва ичимлик суви қувурини тортишда, маҳалла ҳудудида дорихона ташкил этилишида, электр энергияси таъминотидаги камчиликларни бартараф қилиш учун  янги трансформатор ўрнатишда амалий ёрдам беришни сўраб мурожаат қилишди. Мурожаатлардаги масалалар тегишли масъуллар томонидан ўрганилиб, ҳал қилишга амалий ёрдам бериладиган бўлди.

Шу каби сайёр қабуллар туманимиздаги Боғ, Арна бўйи, Фаровон, Янгиобод маҳалларида ҳамда Амир Темур овулида ҳам ўтказилди. Хусусан, Боғ маҳалласида ўтказилган аҳоли билан очиқ мулоқот жараёнида 7 нафар фуқаролар томонидан мурожаатлар йўлланди. Жумладан, фуқаролардан Боғ ёп арна каналининг 2,5 км қисмини қазишда, Қиличбой йўлига йўл белгилари ва пиёдалар ўтиш жойи белгисини ўрнатишда, ички йўлларни таъмирлашда ва янги трансформатор ўрнатишда, кредит ажратилишида, қишлоқ врачлик пунктини қайта ташкил этиш ва дорихона очишда амалий ёрдам сўралган мурожаатлар йўлланди.  Ушбу мурожаатлар ҳам тегишлича ўрганилиб, ҳал этиладиган бўлди.

Шунингдек, Арна бўйи маҳалласида ўтказилган сайёр қабул жараёнида аҳоли вакилларинининг 15 та мурожаатлари қабул қилинди. Мурожаатлардаги масалалар турли йўнлишларда бўлиб, маҳаллада яшовчи юртдошларимиз маҳалла ҳудудида дорихона фаолиятини йўлга қўйишда, симёғочларни алмаштиришда, кўчасига электр энергияси линияси тортишда, Ўрта қалъа овулига олиб чиқадиган йўлни таъмирлашда, 27-сонли умумтаълим мактабга қадар пиёдалар йўлакчасини қуришда ҳамда ушбу мактаб олдидаги йўлга тош тўшаш масаласида, таълим кредити олишда, 33-сонли болалар боғчасига ичимлик суви таъминотини ўрнатишда, тадбиркорлик учун ер майдони ажратилишида, каратэ билан шуғулланиш учун спорт зали ва татами олишда, уйини таъмирлашда, чорвачилик билан шуғулланиш учун ер ажратилишида  амалий ёрдам сўраб мурожаат қилишди.

Мурожаатлардаги масалаларнинг баъзилари қабул жараёнининг ўзида тегишли масъулларни бириктирган ҳолда ҳал этиладиган бўлди. Ижроси маълум вақт талаб этадиган мурожаатлар ўрганилиб, ижобий ҳал этишлари учун мутасадди ташкилотларга топшириқлар берилди.

Улуғбек Аллаберганов, туман прокурори ёрдамчиси.