“Кузатувчилар ва сиёсий партиялар ваколатли вакилларининг ҳуқуқ ва мажбуриятлари” мавзусида ўқув семинари ташкил қилинди

Мамлакатимизда муҳим аҳамиятга эга бўлган, тарихий, сиёсий жараён – Ўзбекистон Республикаси Преизденти сайловини муносиб ўтказиш мақсадида, уни ташкил этишда иштирок этувчи масъулларнинг сайлов қонунчилиги борасидаги билим, кўникма ва малакаларини ошриришга алоҳида эътибор қаратилмоқда.

Ҳудудларда сайлов жараёнида иштирок этувчи кузатувчилар ҳамда сиёсий партияларнинг ваколатли вакилларининг сайловга оид билимларини янада ошириш мақсадида турли мавзуларда ўқув-семинарлари ташкил этилмоқда.

Жорий йилнинг 20 октябрь санасида Амударё туманида Ўзбекистон “Миллий тикланиш” демократик партияси туман кенгаши томонидан “Кузатувчилар ва сиёсий партиялар ваколатли вакилларининг ҳуқуқ ва мажбуриятлари” мавзусида ўқув семинари ташкил қилинди.

Партиянинг сайлов жараёнидаги муносиб иштирокини таъминлаш мақсадида ташкил этилган ўқув-семинарда партиянинг Қорақалпоғистон Республикаси Кенгаши ва туман кенгаши масъуллари, туман Адлия бўлими масъуллари, депутатлар, кузатувчилар, ваколатли вакиллар ҳамда оммавий ахборот воситалари вакиллари иштирок этдилар.

Ўқув семинарда туман Адлия бўлими бош мутахассиси, Президент сайловини ўтказиш бўйича ҳудудий тренер Жамшид Бекимбетов “Ўзбекистон Республикаси Президенти сайловининг Конституциявий-ҳуқуқий асослари” мавзусида маъруза қилди.

Жамшид Бекимбетов ўз сўзида Президент сайловининг мамлакат сиёсий ҳаётидаги муҳим аҳамияти, унинг ўзига хос жиҳатлари, Сайлов кодекси ва сайлов қонунчилигига киритилган ўзгартириш ҳамда қўшимчаларнинг мазмун-моҳияти, сайлов жараёнларининг очиқ ва ошкоралигини таъминлашда кузатувчилар ва сиёсий партиялар ваколатли вакилларининг тутган ўрни ва аҳамияти, кузатувчиларнинг ҳуқуқ ва мажбуриятлари, сиёсий партияларнинг ваколатли вакилларининг ҳуқуқий мақоми ҳақида батафсил маълумот берди.

Шундан сўнг Ўзбекистон “Миллий тикланиш” демократик партияси Қорақалпоғистон Республикаси Кенгаши бош мутахассиси Мирзахмет Тажимуратовнинг «Кузатувчи ва сиёсий партиялар ваколатли вакилларининг ҳуқуқ ва мажбуриятлари» мавзусидаги маърузаси тингланди.

Таъкидланганишича, кузатувчи – тегишли тартибда бериладиган мандатга биноан сайлов участкаларида ҳозир бўладиган сиёсий партияларнинг, фуқароларнинг ўзини ўзи бошқариш органлари, бошқа давлатлар ва халқаро ташкилотлар вакиллари ҳисобланади. Кузатувчилар ҳамда сиёсий партияларнинг ваколатли вакиллари фаолиятининг ҳуқуқий асослари Ўзбекистон Республикаси Сайлов кодекси, “Сиёсий партиялар тўғрисида”ги, “Фуқароларнинг ўзини ўзи бошқариш органлари тўғрисида”ги қонуни, “Сиёсий партиялар ва ўзини ўзи бошқариш органларининг кузатувчилари тўғрисида”ги Низом ҳамда “Ўзбекистон Республикаси сайловларида хорижий давлатлар ва халқаро ташкилотлардан қатнашадиган кузатувчилар тўғрисида”ги Низом каби қонун ҳужжатлари билан мустаҳкамланган.

Хусусан, Ўзбекистон Республикаси Сайлов Кодексининг 34-моддасида Ўзбекистон Республикаси Президентлигига номзодлар, Қонунчилик палатаси депутатлигига номзодлар, маҳаллий Кенгашлар депутатлигига номзодлар кўрсатган сиёсий партия сайлов комиссиясининг мажлисларида, ҳужжатларни топширишда, имзо варақалари тўғри тўлдирилганлигини текширишда, сайлов участкасида овозларни санаб чиқишда иштирок этиш учун ваколатли вакил тайинлашга ҳақли эканлиги белгилаб қўйилган.

Тадбирда иштирок этаётганлар ўзларининг сайловга оид қатор саволлари бидан мурожаат қилдилар ҳамда масъуллар саволларга тегишлича жавоб бердилар.

Фотима Эшимбетова, ЎзМТДП Амударё туман кенгаши ижрочи котиби.