Халқ депутатлари Амударё туман кенгашининг 40-сессияси тўғрисида ахборот

10 ноябрь куни Халқ депутатлари Амударё туман кенгашининг навбатдаги 40-сессияси бўлиб ўтди. Сессия мажлисида туман ҳокими Султонбой Йўлдашев, Халқ депутатлари туман кенгаши депутатлари, сектор раҳбарлари, туман ҳокими ўринбосарлари, ҳокимлик масъул ходимлари, ҳуқуқ-тартибот органлари масъуллари, бўлимлар, тижорат банклари раҳбарлари, фуқароларнинг ўзини ўзи бошқариш органлари раислари ҳамда оммавий ахборот воситалари вакиллари иштирок этдилар.

Сессия кун тартибидаги дастлабки масала – Амударё туманини 2021 йил октябрь ойида ижтимоий-иқтисодий ривожлантиришни рейтинг баҳолаш кўрсаткичлари натижалари ҳамда ҳудуд даражасида ҳал этиладиган муаммоларни бартараф этиш чоралари юзасидан туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Маъмуржон Темирбоевнинг ҳисоботи тингланди.

Ҳисоботда туманда саноат ишлаб чиқарувчи корхоналарни ташкил қилиш ва мавжудларини кенгайтириш, замонавий савдо комплекслари ва хизмат кўрсатиш сифатини ошириш, меҳнат бозорининг самарадорлиги, иқтисодиётнинг рақобатбардошлиги ва диверсификацияси кўрсаткичлари, ишбилармонлик муҳити ва тадбиркорликни ривожлантириш, маҳаллий солиқларнинг йиғувчанлик кўрсаткичлари, маҳаллий давлат ҳокимияти органларининг фуқаролар мурожаатлари билан ишлаш самарадорлиги ва
маълумотларнинг очиқлиги кўрсаткичлари бўйича 2021 йил якунига қадар амалга оширилиш режалаштирилаётган чора-тадбирлар ҳусусида кенг турда маълумот берди.

Сессияда Ўзбекистон Ёшлар ишлари агентлиги Амударё тумани бўлими бошлиғи Жасурбек Давлетовнинг ёшлар фаолияти билан боғлиқ соҳаларда учраётган долзарб муаммо ва камчиликлар ҳамда уларнинг ечими тўғрисидаги масала юзасидан ахбороти тингланди.

Ахборотда туманда ҳар томонлама кўмакка муҳтож 6753 нафар ёшлар “Ёшлар дафтари”га киритилиб, уларни қўллаб-қувватлаш, бандлигини таъминлаш, моддий, маънавий, ижтимоий ёрдам бериш борасида амалга оширилган кенг қамровли чора-тадбирлар натижасида 6599 нафар ёшлар “Ёшлар дафтари”да чиқарилганлиги, айни пайтда улар ҳаётда ўз ўрнини топишлари учун ҳаракат қилаётгани ҳамда оиласига даромад олиб келаётгани хусусида маълумотлар келтирилди.

Шундан сўнг сессия ишида туман Ички ишлар бўлими бошлиғининг ўринбосари Бахтияр Уразовнинг туманда 2021 йил 10 ойи давомида жиноятчилик ва ҳуқуқбузарликларнинг олдини олиш бўйича амалга оширилаётган ишлар, шунингдек, содир этилган оғир ва ўта оғир турдаги жиноий ҳолатлар юзасидан ҳисоботи тингланди.

Ҳисоботда келтирилишича, туман ИИБ ходимлари томонидан жамоатчилик вакиллари ва бошқа масъул ташкилотлар билан ҳамкорликда мунтазам равишда қатор тезкор-профилактик тадбирлар амалга оширилаётган бўлиб, жиноят ва ҳуқуқбузарликларнинг олдини олиш борасидаги олиб борилган профилактик тадбирларга қарамасдан туманда умумий жиноятчилик ўтган йилга нисбатан ошган. Ўтган 10 ой давомида олди олиниши мумкин бўлган, маҳаллалар ҳудудида содир этилган жиноятлар тахлилида 18 та маҳаллалар “қизил” тоифадаги, 11 та маҳаллалар “сариқ” тоифадаги маҳаллаларга ажратилиб, уларда профилактик тадбирлар янада кучайтирилаётгани, 20 та маҳаллаларда олди олиниши мумкин бўлган жиноятлар содир этилмагани қайд этилди.

Сессия кун тартибидаги бўшаган ўринга Халқ депутатлари Амударё туман Кенгаши депутати сайловини ўтказувчи участка сайлов комиссиялари аъзолигига номзодларни тавсия этиш тўғрисидаги масала юзасидан Халқ депутатлари туман Кенгашининг Қонунийликни таъминлаш ва коррупцияга қарши курашиш бўйича доимий комиссияси раиси Музаффар Ешчанов ахборот берди.

Ахборотда халқ депутатлари Амударё туман Кенгашининг бўшаб қолган 23-Бобур сайлов округида депутат сайловини ўтказиш учун округ ҳудудида 129-, 130-, 131-, 132-участка сайлов комиссиялари тузилишини ҳисобга олиб З.М.Бобур овули ва Жумуровул маҳалла фуқаролар йиғинлари кенгашининг мажлислари ҳамда округ ҳудудларида жойлашган умумтаълим мактаблари жамоаларининг йиғилишларида участка сайлов комиссиялари таркибига тавсия қилинган номзодлар рўйхати билан таништирилди ҳамда участка сайлов комиссияси аъзолигига номзодлар депутатлар томонидан маъқулланди.

Сессия ишида кун тартибидаги Амударё тумани халқ таълими бўлимига қарашли 76-сонли ҳамда 87-сонли мактабларда бўш (вакант) директор лавозимига ўтказилган танлов якунлари бўйича номзодларга келишим бериш масаласи ҳам кўриб чиқилди. Депутатлар 76-сонли умумий ўрта таълим мактаби директори лавозимига номзод Давронбек Рузметов ва 87-сонли умумий ўрта таълим мактаби директори лавозимига номзод Самад Джаллаевларнинг келгуси 3 йилда амалга оширадиган ишлари бўйича дастурларини тингладилар.

Номзодларнинг дастурлари ўқиб эшиттирилганидан сўнг Қорақалпоғистон Республикаси Халқ таълими вазирлиги томонидан тавсия қилинган номзодларга келишим бериш бўйича яширин овоз бериш жараёни ташкил этилди. Дастлаб депутатлар орасидан саноқ комиссияси тузилди ва яширин овоз бериш бюллетенлари тарқатилди. Овоз бериш якунларига кўра Қорақалпоғистон Республикаси Халқ таълими вазирлигининг Амударё тумани халқ таълими бўлимига қарашли 76-сонли умумий ўрта таълим мактаби директори лавозимига Давронбек Рўзметовни ҳамда 87-сонли умумий ўрта таълим мактаби директори лавозимига Самад Джаллаевни тайинлаш тўғрисидаги тавсиясига келишим бериш юзасидан тегишли қарор қабул қилинди.

Сессия кун тартибига киритилган барча масалалар атрофлича кўриб чиқилиб, улар юзасидан депутатлар ва сессия иштирокчиларининг фикр-мулоҳазалари тингланди ҳамда ҳисоботлар ва ахборотлар юзасидан берилган саволларга тегишлича жавоблар қайтарилди. Шунинг билан сессия ўз ишини якунлади.

Туман ҳокимлигининг Ахборот хизмати.