КОРРУПЦИЯГА ҚАРШИ КУРАШИШ ВА ЁШЛАРНИ ҲАРБИЙ ВАТАНПАРВАРЛИК РУҲИДА ТАРБИЯЛАШГА БАҒИШЛАНГАН КЕНГАЙТИРИЛГАН ЙИҒИЛИШ ЎТКАЗИЛДИ

Ҳозирги кунда коррупцияга қарши курашиш – куннинг энг долзарб  ва муҳим вазифаси бўлиб қолди. Ушбу иллатга қарши нафақат бизнинг мамлакатимизда, балки дунёдаги барча мамлакатларда кескин ва муросасиз кураш олиб борилмоқда.

Давлатимиз мустақиликка эришгач, коррупцияга қарши кураш доирасида кўплаб норматив-ҳуқуқий ҳужжатлар, дастурлар қабул қилиниб, шу асосда кенг қамровли ишлар, коррупцияга қарши курашиш ва унинг олдини олишга қаратилган тушунтириш-тарғибот тадбирлари, ҳуқуқий-маслаҳат учрашувлари амалга оширилиб келинмоқда.

9 декабрь куни Халқаро коррупцияга қарши курашиш куни муносабати билан туман маданият маркази биносида мутасадди ташкилотлар раҳбарлари ва ходимлари иштирокида бўлиб ўтган кенгайтирилган йиғилишда ҳам ушбу иллатга қарши курашишда давлат органлари ва ташкилотлари  томонидан аҳолининг, айниқса ўсиб келаётган ёш авлоднинг ҳуқуқий онги ва ҳуқуқий маданиятини юксалтиришга, шу билан бирга жамиятда коррупцияга қарши муросасиз муносабатни шакллантиришга қаратилган маърузалар ўқилиб, фикр-мулоҳазалар билдирилди.

Йиғилишда Амударё тумани халқ таълими бўлими, Давлат Хавфсизлик хизмати, Мудофаа ишлари бўлими ва тумандаги умумтаълим мактабларининг директорлари, ўқитувчилар иштирок этдилар.

Йиғилишни Амударё тумани Халқ таълими бўлими мудири Акмал Исмоилов кириш сўзи билан очиб, йиғилганларни кун тартибидаги масалалар билан таништириб ўтди ҳамда туман халқ таълими бўлими томонидан коррупцияга қарши курашиш борасида амалга оширилаётган ҳуқуқий-тарбиявий ишларга батафсил тўхталди.

Йиғилишда Ўзбекистон Республикасининг “Коррупцияга қарши курашиш тўғрисида”ги Қонуни мазмун-моҳияти тўғрисида маъруза қилинди. Жумладан, мазкур Қонун 6 боб, 34 моддадан иборат эканлиги, коррупция сўзи - шахснинг ўз мансаб ёки хизмат мавқеидан шахсий манфаатларини ёхуд ўзга шахсларнинг манфаатларини кўзлаб, моддий ёки номоддий наф олиш мақсадида қонунга хилоф равишда фойдаланиши хусусида тўхталди.

Сўзга чиққанлар “Ўқувчи-ёшларнинг диний экстремизм, терроризм, турли диний оқимларга кириб қолишининг олдини олиш бўйича ҳам ўз фикр-мулоҳазаларини билдириб ўтдилар. Жумладан, тинчлик – тараққиёт ва фаровонликнинг асосий омили эканлиги, давлатимиз тараққиёт йўлида қандай улкан, бошқаларнинг ҳавасини тортадиган ютуқ ва марраларга эришган бўлса, барчасининг негизи юртимиздаги тинч ва осуда ҳаёт, миллатлар ва фуқаролараро тотувлик, ўзаро меҳр-оқибат ва ҳамжиҳатликни асраб-авайлаб келаётганимизда эканлиги таъкидлаб ўтилди.

Йиғилишда Амударё тумани Мудофаа ишлари бўлими бошлиғи ёшларни миллий ғоя ва Ватанга садоқат руҳида тарбиялаш борасида амалга ошириладиган ишлар хусусида маъруза қилди.

Ушбу тадбирда ёш авлодни турли ёт иллатлардан ҳимоялаш, уларни Ватанга муҳаббат, миллий ва умуминсоний қадриятларга ҳурмат руҳида тарбиялашда таълим муассасаларининг ўрни беқиёс эканлигини, бунда ўқувчи-ёшлар ўртасида тарғибот-ташвиқот ишларини самарали ташкил қилиш, мавзуга доир учрашувлар ва давра суҳбатлари, дунёдаги сиёсий вазият бўйича видеороликлар намойишларини ташкил қилиш кераклиги бўйича тавсиялар берилди.  

Музокараларда иштирок этган 40-сонли умумий ўрта таълим мактаби директори Санобар Хўжамуротова, 22-сонли мактаб директори Азим Бекберганов, 21-сонли мактаб директори Т.Досчанов, 18-сонли мактаб директори вазифасини вақтинча бажарувчи С.Ешбоева, 46-сонли мактабнинг ЧҚБТ раҳбари А.Ешимбетовлар муҳокама этилган масалалар бўйича ўз таклиф ва тавсияларини бердилар.

Робия ЙЎЛДОШЕВА.