ЗИЁ МАСКАНИНИНГ ҚИШКИ ТУҲФАСИ

Китоб – ҳаётнинг энг олис ва қоронғи йўлларига нур бахш этган афсонавий чироқдир.

Китоб замонлар денгизида саёҳат қилаётган ва ўзининг қимматбаҳо юкини авлодлардан-авлодларга ташиётган хикмат кемасидир. Китоб - билим беради, билим – бахт келтиради. Шундай экан, азиз китобхонлар, биз сизларга жамғармамизга янги олиб келинган қуйидаги адабиётларни ўқишни тавсия қиламиз.

“Хикматлар ва ҳикоятлар” китоби ўрта асрларда Шомда яшаб ижод этган йирик аллома Абдулфараж (1226-1286) қаламига мансубдир. Фалсафа, тарих, диншунослик, тилшунослик, астрономия ва тиббиёт соҳаларидаги илмий асарлари билан машхур бу олим ҳикмат ва ҳикоятлар йиғиш билан ҳам шуғулланган. Мазкур тўпламда турли дин, миллат ва касб вакиллари бўлган оқил кишиларнинг ҳаётидан ибратли ҳикматлар келтирилган.

“Водий медиа” нашриёти тjмонидан чоп этилган Зулфия Исроилованинг “Менинг юртим” шеърий тўпламида “Халқимга айтар сўзларим”, “Сени қўллайман ҳаёт”, “Ҳаёт бу”, “Бир даста гул келтирди қизлар” номли шеърлари ўрин олган.

“Бул китоб жисм-у фиғонимдир менинг, Бул қалам жону жаҳонимдир менинг”, сатрлари билан бошланган, “Дониш чироғи” нашриётида нашр этилган, дунё адабиётида ўзига хос ўрнига эга, буюк қирғиз ёзувчиси Чингиз Айтматовнинг “Асрга татигулик кун” романи ўқувчиларга яхши таниш. Зеро, бу асар ўз даврининг муаммоларини бадиий бўёқларда ифода этади. Бир қарашда асарда кечаётган воқеалар шунчаки табиий, ҳаётий воқеадек туюлади. Бироқ ёзувчининг атрофни биз кўргандан тамоман бошқача йўсинда кўрсата олиши, воқеалар баёнидаги сирли ишоралар китобхонни хайратлантиради.

Таниқли ёзувчи Асқад Мухторнинг “ Абадий барҳаёт асарлар” туркумига кирган “Чинор” романининг бошида бутун юртга тарқаб кетган узоқ-яқин қариндошлардан хабар олгани отланган Очил бобога қўшилишиб, муаллиф олис сафарга чиқади. Мана шу ўта қизиқарли ва ибратли сафар асносида бобо пешоналаридаги ажинлар сингари бир-бирига уланиб кетган инсоний тақдирлар ҳақидаги гоҳ ширин, гоҳ аччиқ ҳикояларга ошно тутинасиз. Бу тақдирлар бир-бирлари билан Очил бобо орқали боғланиб, ягона шажарани – азим чинорни вужудга келтиради.

Нобель мукофоти совриндори Эрнест Хемингуэй номини эшитмаган китобхон бўлмаса керак. Адибнинг “Чол ва денгиз” , “Алвидо, қирол” номли асарлари ва бир қанча ҳикоялари ўзбек тилига таржима қилинган. Бу сафар ёзувчининг “Борлиқ ва йиллик” романини сиз азиз китобсеварларга тақдим этмоқдамиз. Икки жилдли мазкур асарга муаллиф ўзи яшаган даврдаги оддий кишиларнинг оғир ҳаётини ҳаққоний тасвирлаб берган.

Ўзбекистон Республикаси Президенти Шавкат Мирзиёев таъкидлаганидек: “одамларнинг дарду ташвишларини ўйлаб яшаш – одамийликнинг энг олий мезонидир”.

Мурод Абдуллаевнинг “Қафасдан қутилган қуш” номли китобида кейинги йилларда ёзган мақолалари жам бўлиб, бунда ёзувчи давримиз бунёдкорларининг ибратли ишлари, қаҳрамонликларини жўшиб қаламга олади. Барпо бўлаётган обод қишлоқлар, буюк йўллар, Ватан куч-қудратини намоён этаётган муҳташам иншоатлар гўзаллигидан фахрланади ва бу туйғуни китобхонга юқтиришга ҳаракат қилади. Китоб барча ўқувчиларга манзур бўлади, деган умиддамиз.

Азиз китобхонлар! Туман ахборот-кутубхона марказимизга ташриф буюриб, китоблар оламига саёҳат қилишга чорлаб қоламиз. Ҳаётда шундай одамларни ахтарингки, улар билан суҳбат қилмоқ, яхши китоб ўқимоққа баробар бўлсин. Шундай китобларни ахтарингки, мутолааси файласуфлар суҳбатига тенг бўлсин.

Р.Рамонова, туман Ахборот-кутубхона маркази библиография хизмати раҳбари.