ГРИПП КАСАЛЛИГИ ВА УНИНГ АСОРАТЛАРИ

Грипп – бу ўткир юқумли, ҳаво-томчи йўли орқали ўтувчи, асосан юқори нафас йўлларини зарарловчи касаллик бўлиб, бутун дунё бўйича ҳар йили грипп эпидемияси кузатилади.

Грипп вируси асосан ҳаво-томчи йўли орқали – гаплашганда, йўталганда ва акса урганда бемордан соғлом одамга юқади. Шунингдек, вирус ифлос қўл ва буюмлар орқали ҳам юқиши мумкин. Чунки, телефон, эшик тутқичи, стол юзасига тушган вируслар 2-8 соат мобайнида ўз фаоллигини сақлаб қолади.

Касаллик тўсатдан бошланганда ҳарорат 38-40 даражагача кўтарилади, қувватсизлик, бош оғриши ва мушакларда, кўз олмаларини босганда ва улар ҳаракатланганда оғриқлар, томоқ қуриши ва қичиши, бурун битиши ва қуруқ йўтал кузатилади.

Мабодо, касаллик юқса, уйда қолиб, ётоқ тартибига риоя қилинг ва ҳудудий шифокорни уйга чақиринг, тана ҳарорат 38 даражагача бўлганда туширманг, бу организмда вирусга қарши ҳимоя ҳужайраларининг ишлаб чиқарилиш кўрсаткичи ҳисобланади. Шахсий гигиена қоидаларига риоя қилинг, қўлингизни тез-тез совунлаб ювинг, оғиз ва бурнингизни йўталганда ва акса урганда ёпинг. Хонани мунтазам шамоллатиб туринг. Шахсий сочиқ ва идиш-товоқлардан фойдаланинг. Иложи  борича  кўпроқ  суюқлик  ичинг, илиқ  чой,   компот,  шарбатлар,   наъматак ва  ҳар  хил  ўтлардан  дамламалар қабул қилинг.

Кекса ёшдаги одамлар, мактабгача ёшда бўлган болалар, ҳомиладор аёллар, сурункали касалликлари бор инсонлар, тез-тез ўткир респиратор касалликлар билан оғрийдиган беморларда касаллик асоратли кечади.

Касалликнинг олдини олиш учун қўлни совун билан ювиш ёки нам тозаловчи салфеткалардан фойдаланиш зарур. Бундан ташқари, хонани, айниқса, жиҳозларнинг юзасини нам латта билан артиш, тез-тез хонани шамоллатиб туриш шарт.

Беморлардан узоқроқ бўлиш, одам гавжум бўладиган тадбирларга бормаслик, инфекция юқиш хавфини камайтириш учун 4 қаватли дока тақиш зарур.

Ёдингизда бўлсин!

Гриппни оёқда ўтказиб бўлмайди, ўз билганча даволаниш мумкин эмас. Ўз вақтида шифокорга мурожаат қилиш ва даволашни эрта бошлаш касалликнинг асоратлари – бронхит, зотилжам, отит, мия тўқимаси ва қобиқларининг шамоллаши, юрак, буйрак ва бошқа ички органлар зарарланишининг хавфини камайтиради.

Ж.Явқашев, туман Тиббиёт бирлашмаси

АСТТКК ва ЖФО бўлими шифокори.