Ўсимликларни биологик ҳимоя қилиш сифати ошади

Бутун дунё бошидан кечираётган мураккаб ва қалтис вазият – коронавирус пандемияси аграр соҳанинг ўрни ва аҳамияти қанчалик муҳим эканлигини яққол намойиш этмоқда.

Мамлакатимизда мавжуд ресурс ва имкониятларни ишга сафарбар этиб, экин экиладиган майдонлардан оқилона фойдаланиш эвазига юқори ҳосил етиштиришга эришилмоқда. Бу ҳам қишлоқ хўжалигида банд бўлганлар моддий манфаатдорлиги ошишига, ҳам халқимиз дастурхони арзон ва хавфсиз озиқ-овқат маҳсулотлари билан тўкин бўлишига замин яратмоқда.

Мамлакатимиз Президентининг “Республикада ўсимликлар карантини ва ҳимояси тизимини тубдан такомиллаштириш чора-тадбирлари тўғрисида”ги Фармони қабул қилиниши қишлоқ хўжалиги маҳсулотлари етиштиришнинг муҳим асосларидан бири - ўсимликларни турли касалликлардан ва зарарли ҳашаротлардан ҳимоя қилиш сифатини оширишга хизмат қилиши билан аҳамиятлидир.

Фармонга мувофиқ Вазирлар Маҳкамаси ҳузуридаги Ўсимликлар карантини давлат инспекцияси негизида Ўзбекистон Республикаси ўсимликлар карантини ва ҳимояси агентлиги ташкил этилди ҳамда зарарли организмларга қарши кураш тадбирларини амалга оширишда агроном, фитопатолог, энтомолог, хим-биолог бўлган мутахассисларни ўқитилиб, малакасини ошириш орқали ўсимликлар клиникалари, биолабораторияларга ишга жалб қилинмоқда.

Туманимизда ушбу агентликнинг 10 нафар мутахассислардан иборат туман бўлими ташкил этилиб, ўз фаолиятини олиб бормоқда.

Яқинда ушбу бўлим ташаббуси билан Тўлқин овулида фаолият юритаётган “Аму-Тўлқин биосервис” масъулияти чекланган жамиятида Президентимизнинг “Республикада Ўсимликлар карантини ва ҳимояси тизимини тубдан такомиллаштириш чора-тадбирлари тўғрисида”ги Фармонида белгилаб берилган вазифаларнинг мазмун-моҳияти ва 2022 қишлоқ хўжалиги йилида экинлардан мўл ҳосил олинишига эришишда амалга ошириладиган ишларга бағишланган семинар бўлиб ўтди.

Семинарда Ўзбекистон Республикаси Ўсимликлар карантини ва ҳимояси агентлиги туман бўлими мутахассислари, овулдаги фермер хўжаликлари раислари, томорқа ва иссиқхоналар эгалари, шунингдек, “Аму-Тўлқин биосервис” масъулияти чекланган жамияти ходимлари иштирок этдилар.

Тадбирда Агентликнинг туман бўлими бошлиғи Комилжон Бобожонов 2022 йилда экинлардан мўл ҳосил олинишига эришишда ўсимликларни биологик ҳимоя қилиш борасидаги режалар, ушбу усулнинг самаралари ҳақида тушунчалар берди.

Маърузада таъкидланганидек, жорий йилда туманда 13 минг 900 гектар пахта, 2 та ғаллачилик кластерига қарашли 6 минг гектар буғдой майдонларини касалликлардан ва зарарли ҳашаротлардан биологик ҳимоя қилиш юзасидан фермер хўжаликлари раҳбарлари тумандаги 16 та биолабораториялар ва 2 та ўсимликлар клиникалари билан шартномалар тузилган.

Шунингдек, бундан ташқари томорқа ерлар ва иссиқхоналардаги экинларга ҳам биоҳимоя билан ишлов бериш имкониятлари яратилган. Бу билан аҳоли томорқаларида экологик хавфсиз ва тоза маҳсулот етиштирилишига замин яратилади.

Семинар иштирокчилари ўзларини қизиқтирган саволларга мутахассислардан жавоблар олдилар ва ўсимликларни биологик ҳимоя қилиш борасидаги янгиликлардан батафсил хабардор бўлдилар.

Ойгул РАЖАБОВА.