“ҚОН ТОПШИР – ҲАЁТ ИНЪОМ ЭТ!” АКЦИЯСИ ДАВОМ ЭТМОҚДА

Маълумки, пандемия сабабли жорий этилган карантин чекловлари барча соҳалар қатори Соғликни сақлаш тизимида ҳам жиддий муаммоларни юзага келтирди. Айниқса, турли қон гуруҳларига бўлган талаб ошиб, тизимда етарли қон заҳирасини шакллантиришда қийинчиликлар пайдо бўлди. Бироқ ҳамиша меҳр-оқибатли ва элпарвар халқимизнинг беғараз ҳиммати туфайли, шунингдек, турли давлат ва жамоат ташкилотлари ташаббуси билан ташкил этилаётган беғараз донорлик акциялари самараси боис мамлакатимиздаги барча соғликни сақлаш муассасаларида қон заҳирасига бўлган эҳтиёж қондирилиши учун замин яратилди.

Ўзбекистон Республикаси Соғликни сақлаш Вазирлиги ташаббуси билан болалар ва катта ёшдаги беморлар учун беғараз ёрдам сифатида ташкил этилган “Қон топшир – ҳаёт инъом эт!” акциясида айни пайтда юзлаб ватандошларимиз фаол иштирок этишиб, ҳаётга муштоқ, хастадил инсонлар қалбига мадад бўлишмоқда.

Жорий йилнинг 29 март санасида “Қон топшир – ҳаёт инъом эт!” акциясида Амударё туман Тиббиёт бирлашмасининг 10 нафар кўнгилли шифокор ва ўрта тиббиёт ходимлари ҳам иштирок этишиб, ушбу хайрли ва савобли ишга муносиб ҳиссаларини қўшдилар.

Шуни алоҳида қайд этиш керакки, “Қизил ярим ой” жамияти томонидан туман аҳолиси орасида жарроҳлик амалиётлари, гематологик хасталикларда беморларга донор қони таркибий қисмларидан фойдаланиш, донорликни тарғиб қилиш борасида ўтказилган “Қон топшириш – инсоннинг инсонга ҳадя этган олий даражадаги совғасидир”, “Ҳаёт ҳадя этиш – савоб ишнинг энг олий ифодаси” каби мавзуларда ўтказилган тарғибот тадбирлари натижасида уюшмаган аҳоли вакилларидан 34 нафари кўнгилли равишда донор бўлдилар. Уларнинг ҳиммати билан туман бўйича жами салкам 20 литр қон захираси яратилди.

Амударё туман Тиббиёт бирлашмаси ҳузуридаги Қон банки томонидан бир йил давомида беморлар учун ўртача 100 литрдан ортиқ қон йиғилади. Шу боис, Амударё туман тиббиёт бирлашмаси бўлимларида қон заҳираси билан боғлиқ муаммолар бўлмайди. Қолаверса, донорликнинг аҳамияти беқиёс. Ўзини соғлом деб билган, ирқи, касби, жинсидан қатъий назар ҳар бир инсон қон ва унинг компонентлари учун донор бўла олади.

Инсон организми шундай мўъжизаки, қон топшириш унинг умумий саломатлиги учун ниҳоятда фойдалидир. Донорлик – инсон организмига янгиланишни, ёшаришни ҳадя этади.

Шундай экан, биз юртдошларимизни “Қон топшир – ҳаёт инъом эт!” акциясида фаол иштирок этишга, ушбу савобли иши туфайли ҳаёт учун курашаётган хастадил инсонлар қалбига мадор бўлишга чақирамиз.

Қон топширинг ва хаста кўнгилларга гўзал ҳаётдан баҳра олиб яшашлари учун имкон яратинг!

И.Нуримбетов, Қизил ярим ой жамияти Амударё туман бўлими ижрочи директори.

Райҳон Хўжаметова, Республика қон қуйиш маркази шифокори.