ЖЎҚОРҒИ КЕНГЕСДАГИ ЎЗБЕКИСТОН ХДП ФРАКЦИЯСИ РАҲБАРИ ХАЛИЛЛА ЕШИМБЕТОВ АМУДАРЁ ТУМАНИГА ТАШРИФ БУЮРДИ

Ҳозирги кунда мамлакат ҳудудида боқувчисини йўқотган оилалар, ногиронлиги бўлган шахслар, пенсионерлар ва ижтимоий ҳимояга муҳтож фуқароларга давлатимиз томонидан шароит ва қулайликлар яратилмоқда. Айниқса, аёллар ва ёшларни қўллаб-қувватлаш уларнинг бандлигини таъминлаш, касбга ўқитиш, тадбиркорликка ўргатиш ҳамда уларга субсидия ва имтиёзли кредитлар давлатимиз томонидан ажратилмоқда. Ўзбекистон Халқ демократик партияси ҳам ушбу тоифадаги фуқароларнинг манфаатларини ҳимоя қилиб келмоқда.

22 апрель куни Ўзбекистон Халқ демократик партияси Қорақалпоғистон Республикаси Кенгаши раиси, Қорақалпоғистон Республикаси Жўқорғи Кенгесидаги Ўзбекистон Халқ демократик партияси фракцияси раҳбари Халилла Ешимбетов Амударё туманига ташриф буюриб, туман партия Кенгаши ҳамда Халқ депутатлари туман Кенгашидаги депутатлик гуруҳи фаолияти билан танишди.

Туман ҳокимлигида шу мақсадда ўтказилган йиғилишда партия масъуллари ва фаоллари, депутатлар иштирок этдилар. Йиғилиш давомида ўтган давр мобайнида партия туман Кенгаши ҳамда депутатлар гуруҳи томонидан амалга оширилган тегишли чора-тадбирлар, амалий ишлар хусусида сўз юритилди. Шундан сўнг, Жўқорғи Кенгесдаги партия фракцияси раҳбари Халилла Ешимбетов бу борада фикр-мулоҳазаларини маълум қилиб, ўз таклифларини киритди.

Шунингдек, Ўзбекистон Халқ демократик партияси туман Кенгаши раиси лавозимига тайинланган Эшманов Маҳмуд Эгамбергановични табриклади. Ундан ташқари, партия дастурий мақсад ва вазифаларини аҳоли орасида кенг тарғиб қилиш, амалга ошириш борасидаги муҳим вазифалар хусусида кенг тўхталиб ўтди.

Йиғилишдан сўнг Қорақалпоғистон Республикаси Жўқорғи Кенгеси ташаббуси билан эълон қилинган депутатларнинг ўз сайловчилари билан ишлашнинг долзарб ўн кунлиги доирасида партия фракцияси раҳбари Халилла Ешимбетов Халқ депутатлари туман Кенгаши депутати, депутатлар гуруҳи раҳбари Мақсуд Саъдуллаев билан биргаликда Бўстон маҳалла фуқаролар йиғинида истиқомат қилувчи сайловчилар билан учрашди.

Учрашувда Янги Ўзбекистон тараққиёт стратегияси ва уни Инсон қадрини улуғлаш ва фаол маҳалла йилида амалга ошириш бўйича қабул қилинган Давлат Дастури, Қорақалпоғистон Республикаси Жўқорғи Кенгеси сессияларида қабул қилинган Қонунлар ҳамда қарорларнинг мазмун-моҳияти хусусида тушунчалар берилди. Шу билан бирга ҳудуддаги аҳоли муаммолари ўрганилиб, тегишли таклифлар ишлаб чиқилди.

Шундан сўнг, партия масъуллари Бўстон маҳалла фуқаролар йиғинида яшовчи фуқаро  Ҳамида Отажонованинг уйида ташкил қилинган тикувчилик цехига ташриф буюрди. Ҳамида Отажонова 32 млн 800 минг сўм миқдорида кредит олиб, ўзи билан яна маҳалладаги 4 нафар ишсиз хотин-қизларнинг бандлигини таъминлаган. Масъуллар цехдаги аёллар фаолияти билан танишиб, келгусидаги режаларини мухокама қилишди ҳамда ишларини янада кенгайтиришни тавсия қилишди.

Тадбир сўнгида юртимиз бўйлаб ўтказилаётган “Яшил макон” лойиҳаси доирасида кўчат экиш ишлари ташкил этилди. Партия масъуллари Бўстон маҳалласи ҳудудига мевали ва манзарали дарахтлар кўчатларини ўтқазиб, яшил ҳудудлар кенгайишига ўз ҳиссаларини қўшишди.

М.Саъдуллаев, Халқ депутатлари туман Кенгаши депутати.