“ИЖОДКОР ВА ИНТИЛУВЧАН ЁШЛАР” ЭСТЕТИК ФАНЛАР ОЙЛИГИ ДОИРАСИДА ТАНИҚЛИ ШОИРЛАР БИЛАН УЧРАШДИЛАР
++ Жорий йилнинг 23 апрель санасида Манғит шаҳридаги 55-сонли умумтаълим мактабида эстетик фанлар ойлигига бағишланган “Ижодкор ва интилувчан ёшлар” мавзусида адабий-мусиқий тадбир бўлиб ўтди. Тадбирда мазкур мактабнинг ижодий-маданий масалалар бўйича тарғиботчиси Хонимжон Ражабова, Қорақалпоғистон Республикаси Жўқорғи Кенгеси депутати, шоира Назира Матёқубова, маънавият фидойилари шоир Турсунбой Абдуллаев, шоир ва ёзувчи Аҳмад Нафасов, шоира Зулфия Оллоёровалар ҳамда мактабнинг ижодкор ўқувчи-ёшлари ҳамда ўқитувчилар иштирок этишди.
Тадбирни мактабнинг маънавий-маърифий ишлар бўйича директор ўринбосари Баҳром Ҳикматуллаев очди ва мактаб ўқувчилари томонидан амалий фанлар бўйича эришилаётган ютуқлар, тўгараклар фаолияти, шунингдек, беш муҳим ташаббус доирасида амалга оширилаётган ишлар ҳақида қисқача тўхталиб ўтди.
Эстетик фанлар ойлиги муносабати билан технология, мусиқа, тасвирий санъат чизмачилик фанларининг аҳамияти ва бошқа фанлар билан узвий боғлиқлигини акс эттирувчи воситалар билан безатилган мактаб фойеси ва тадбир учун танланган хонада ўқувчилар қўл меҳнати билан ясалган ижодкорлик намуналарини ўзида мужассам этган кўргазма намойиш этилди. Кўргазмадан жой олган мактабнинг ижодкор ўқувчи-ёшлари томонидан тайёрланган тикувчилик, тўқувчилик, шунингдек робототехника, рассомчилик, санъат ва китобхонлик бўйича ижодий ишлари намуналари тадбир иштирокчиларида катта қизиқиш уйғотди.
Тадбир давомида мактабнинг “Чевар қўллар” тўгараги аъзолари томонидан тайёрланган ва ўқувчи-қизлар ижодкорлик қобилиятини янада оширишга қаратилган турли миллатларнинг ҳамда ўзбек халқининг миллий либослари, болалар либослари, тўй ва базмлар, халқимизнинг турли маросим либослари намойиши ҳам бўлиб ўтди. Миллийлигимизни асраш, халқимизнинг миллий-маънавий меросидан фахрланиш, ёшларимизнинг қизиқувчанлигини ошириш, иқтидорларини ривожлантиришга қаратилган либослар намойиши нафақат тадбир иштирокчилари, балки ҳар бир ўқувчи-ёшнинг қалбида халқимиз маънавияти, миллий-маданий қадриятларидан фахрланиш ва ҳурмат туйғусини уйғотди.
Эстетик фанлар ойлиги доирасида ўтказилган “Ижодкор ва интилувчан ёшлар” тадбирида Қорақалпоғистон Республикаси Жўқорғи Кенгеси депутати, таниқли шоира Назира Матёқубова, Хонимжон Ражабова, Турсунбой Абдуллаев, Аҳмад Нафасов, Зулфия Оллоёровалар ҳам сўзга чиқишиб, мактабнинг интилувчан, ижодкор ўқувчи-ёшлари томонидан беш муҳим ташаббус доирасида амалга оширилаётган ишларга юқори баҳо бердилар. Айниқса, ўқувчилар томонидан тайёрланган тикувчилик, тўқувчилик, робототехника, рассомлик, санъат, китобхонлик йўналишлари бўйича тайёрланган ижодкорлик намуналари уларнинг ёрқин келажак сари дадил интилаётганларидан далолат эканлигини таъкидладилар.
Шундан сўнг тадбир меҳмонлари ўз шеърларидан ўқиб бердилар ҳамда мактаб ижодкор ёшларининг шеърларини мароқ билан тингладилар.
Тадбирда ўқувчи-ёшлар томонидан ижро этилган дилрабо куй ва қўшиқлар барчага кўтаринки кайфият бағишлади.
Тадбир якунида мактабнинг амалий фанлар услуббирлашма Кенгаши аъзоси, технология фани ўқитувчиси Шаҳноза Қурбонбоева, мусиқа фани ўқитувчиси Баҳодир Атоев, тасвирий санъат фани ўқитувчиси Шокир Оразбоевлар амалий фанлар ойлиги доирасидаги барча тадбирларда фаол иштирок этган ўқувчи-ёшларга миннатдорчилик билдиришиб, ўз совғаларини тақдим этдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
