Жамият 17.05.2022 👁 324

ЎҚУВЧИ-ЁШЛАР ТАНИҚЛИ ИЖОДКОРЛАР БИЛАН УЧРАШДИЛАР

Етук ижодкорлар, хусусан, шоирлар катта шаҳарларда яшаб, ижод этади, дейишади. Лекин асл ижодкор учун катта шаҳарлардан кўра, ўзи туғилиб-ўсган замин, қадрдон элдошлари, ана шу заминда юз бераётган ўзгаришлар битмас-туганмас илҳом манбаидир. Буни жорий йилнинг 27 апрель санасида 42-сонли умумтаълим мактабида бўлиб ўтган амударёлик шоир ва ёзувчилар иштирокида ўтказилган ижодий учрашувда яққол ҳис этдик.
Мактабнинг ижодга, шеъриятга ихлосманд ўқувчи-ёшлари ҳамда ўқитувчилари иштирокидаги мазкур учрашувда таниқли ижодкор, Амударё туман маънавияти фидойиси, Халқ таълими аълочиси, “Меҳнат фахрийси” кўкрак нишони соҳиби, кўплаб инсонларнинг, айниқса, ёшларнинг севимли устози Турсунбой Абдуллаев, шоир ва ёзувчи, фахрий устоз Аҳмад Нафасов, Ўзбекистон Ёзувчилари уюшмаси аъзоси, Қорақалпоғистон Республикасида хизмат кўрсатган журналист Робия Йўлдошевалар қатнашдилар.

Қизғин ва самимий мулоқот, шеърхонлик асосида ўтган учрашувни мактаб директори Қурол Мамутов очди ва иштирокчиларни тадбир меҳмонлари билан таништирди ҳамда мактабда ижодий-маданий масалалар бўйича амалга оширилаётган ишлар хусусида тўхталиб ўтди.
Ижодкор ёшлар билан учрашув тадбирини Робия Йўлдошева бири-биридан ибратли адабий ҳикматлар, шу билан бирга мазкур мактаб ўқувчиларининг ижодларидан намуналар айтиб бериш орқали чиройли тарзда бошқариб борди.
Учрашув иштирокчилари Турсунбой Абдуллаевнинг шеърий чиқишларини олқишлар билан кутиб олдилар. Ўзининг бетакрор ижоди, айниқса, халқона руҳда ёзилган тўй-маросимлар қўшиқлари, келин саломлари, “Хитойқишлоқ ҳангомалари” туркумидаги ҳажвиялари билан халқимиз қалбидан муносиб жой олган ҳикматнавис шоир, ажойиб ҳажв устаси Турсунбой Абдуллаев ўқувчи-ёшларга янги шеърларидан ўқиб берди. Амударё туманининг ўзига хос халқ оғзаки ижодини мукаммал ўрганиб, ҳатто тадқиқ қилган, ана шу бебаҳо дурдоналардан илҳомланиб “1001 салом” китобини ёзган Турсунбой Абдуллаев ижодидан нафақат ўқувчи-ёшлар, ҳатто мактаб ўқитувчилари ҳам баҳра олдилар...
Учрашувда “Саломчи менинг унвоним”, “Келдим, довонлар ошиб” китобларининг муаллифи, шоир ва фахрий устоз Аҳмад Нафасов ўқувчиларга ўзининг устози Турсунбой Абдуллаев ҳаёти ва ижодий фаолияти, унинг шахс сифатидаги шаклланиш жараёни, бундан ҳам муҳими, шоирлик мақоми ҳақида ҳикоя қилувчи “Саломчи менинг унвоним” китобининг ёзилиши таризи, китобда жам бўлган ҳар бир сатр келин саломларининг халқ маънавий ҳаётида тутган ўрни ҳақида сўзлаб берди. Шу билан бирга, Аҳмад Нафасов ўзининг янги шеърларидан ўқиб, ўқувчи-ёшларнинг саволларига жавоб берди.
Энг кўп саволлар Турсунбой Абдуллаев ижоди билан боғлиқ бўлди. Ўқувчи-ёшлар “Тараққиёт кўзгуси” ва “Менинг оилам” газеталарида чоп этилган “Хитойқишлоқ ҳангомалари” туркумидаги ҳажвияларнинг ҳаётда прототипи бор ёки йўқлиги билан қизиқдилар. Шунингдек, Аҳмад Нафасовнинг “Саломчи менинг унвоним” китобидаги келин саломлари қачон ёзилган, бу келин саломларида номлари зикр этилган инсонлар хусусида сўрадилар. Т.Абдуллаев ўқувчиларни қизиқтирган барча саволларга батафсил жавоб бериб, “Хитой қишлоқ ҳангомалари”даги соддадил қаҳрамонларнинг барчаси ўзимизнинг элдошларимиз эканлигини, ана шундай чапани, гоҳ шаддод, гоҳ содда ва самимий юртдошларимиз ўзига илҳом бахш этишини фахрланиб сўзлади.

Учрашув давомида ўқувчи-ёшлар Ўзбекистон Халқ шоирлари М.Юсуф, А.Орипов, Э.Воҳидов шеърларидан ҳам ўқиб беришди.
Шеърхонлик, самимий мулоқот тарзида ўтган учрашувда ижодкор ёшлар ҳам ўз ижодларидан намуналар ўқишди. Устоз шоирларнинг самимий суҳбатлари. шеърлари ва ибратли ҳикоялари ўқувчилар қалбида адабиётга, шеъриятга ихлос туйғуларини уйғотиб, она Ватанга муҳаббат, ўзаро меҳр-оқибат ришталарини янада мустаҳкамлади. Муҳими, ўқувчи-ёшлар назмий ва насрий суҳбатлардан катта маънавий озиқ олдилар.