Янги китоблар тақдимоти ва ижодий мулоқот: Ахборот-кутубхона марказида ижодкорлар билан учрашув ўтказилди

Китоб – инсоният тафаккурининг бебаҳо маҳсули, асрлар оша аждодлардан авлодларга ўтиб келаётган буюк маънавий кўприкдир. Бугунги глобаллашув ва ахборот алмашинуви шиддат билан ривожланаётган бир даврда, ёшлар қалбида китобхонликка бўлган меҳрни уйғотиш, уларнинг маънавий оламини бойитиш, онгу тафаккурини миллий ва умуминсоний қадриятлар руҳида тарбиялаш ҳар қачонгидан ҳам долзарб ва муҳим аҳамият касб этмоқда. Айнан шу эзгу мақсадларни кўзлаган ҳолда Амударё тумани ахборот-кутубхона марказида ижодий учрашув ташкил этилди. Ёш авлод қалбида адабиётга бўлган қизиқишни янада орттириш, истеъдодли ва ижодкор ёшларни ҳар томонлама қўллаб-қувватлаш мақсадида ташкил қилинган ушбу тадбир чинакам маънавият байрами, авлодлар ўртасидаги жонли мулоқот майдонига айланди.

Тадбирда элимизга танилган, сўз сеҳри билан минглаб китобхонлар қалбидан чуқур жой олган севимли ижодкорлар меҳмон сифатида иштирок этишди. Хусусан, ўзбек адабиётининг забардаст вакили, таниқли шоир, ёзувчи, сермаҳсул адабиётшунос ва тележурналист Абдулла Ваҳш, шунингдек, Қўнғирот туманидан ташриф буюрган истеъдодли шоира ва моҳир таржимон Зулайҳо Йўлдошеваларнинг ташрифи тадбирга алоҳида шукуҳ бағишлади. Улар қаторида туман фахри бўлмиш, Ўзбекистон Ёзувчилар уюшмаси аъзоси, ардоқли шоира Робия Йўлдошева, шунингдек, эл назарига тушган, қалами ўткир ва серқирра ижодкорлар – Турсунбой Абдуллаев, Зулфия Оллаёрова ва жамоатчилик фаоли Пардагул Ўразбаевалар ҳам ўзларининг самимий ижод намуналари, юрак тўридан чиққан сўзлари билан даврага файз киритишди. Тадбирда тумандаги умумтаълим мактабларининг иқтидорли ўқувчилари, адабиёт ихлосмандлари, кутубхонанинг доимий фаол аъзолари ҳамда кенг жамоатчилик вакиллари жам бўлишди.

Ёшлар ва устоз ижодкорлар ўртасидаги мазкур учрашув самимий мулоқот тарзида кечди. Унда ижоднинг нақадар машаққатли, аммо шу билан бирга бетакрор ва завқли жараён эканлиги, шеъриятнинг инсон маънавий оламини юксалтиришдаги, унинг қалб кўзларини очишдаги беқиёс ўрни ҳақида атрофлича сўз юритилди. Устозлар ижод машаққати ва сўз масъулияти хусусидаги суҳбатлари билан ёшлар қалбида адабиётга, бадиий сўзга бўлган чексиз ҳурмат ва муҳаббат ҳиссини янада жўш урдирди.

Учрашувнинг энг ҳаяжонли қисмларидан бири, шубҳасиз, янги чоп этилган китоблар тақдимоти бўлди. Тадбир давомида Абдулла Ваҳш қаламига мансуб, қорақалпоқ тилига юксак маҳорат билан ўгирилган “Мен суйген ҳаял” номли китоб, шунингдек, Робия Йўлдошеванинг теран ўй-хаёллар ва юксак бадиият билан суғорилган янги “Ўзгариш” номли шеърий тўплами йиғилганлар эътиборига ҳавола қилинди.

Муаллифлар ушбу асарларнинг яратилиш тарихи, уларнинг замирига яширинган бош ғоя, ёзилиш жараёнидаги ички кечинмалари ва изланишлари ҳақида сўзлаб беришди. Тақдимот маросимида жам бўлган адабиётшунослар, китобхонлар ва зиёлилар ўзларининг самимий фикр-мулоҳазаларини баён қилар эканлар, ўзбек ва қорақалпоқ адабий ҳамдўстлигида, икки қардош халқнинг маънавий ришталарини мустаҳкамлашда мазкур янги насрнинг ўзига хос салмоқли ўрни борлигини алоҳида эътироф этдилар. Робия Йўлдошеванинг “Ўзгариш” китоби ҳақида ҳам энг илиқ, самимий эътирофлар янгради. Ижодий тақдимот юқори савияда, қизғин ва қизиқарли тарзда ўтди. Таниқли ижодкорлар муаллиф ва таржимоннинг ҳамкорликда амалга оширган ижодий ишларига муносиб баҳо бериб, бундай самарали лойиҳалар келгусида ҳам бардавом бўлишига тилак билдирдилар.

Ижодий кеча давомида Ватан мадҳи, беғубор ёшлик, пок муҳаббат, эл-юртга бўлган чексиз садоқат ва юксак инсоний қадриятларни тараннум этувчи энг сара шеърлар, теран маъноли рубоийлар ҳамда дилрадо қўшиқлар жонли равишда ижро этилди. Юракдан чиққан бу сатрлар ва куй-қўшиқлар ёш адабиётсеварлар қалбида чуқур таассурот уйғотиб, уларга чексиз руҳий озуқа ва илҳом бағишлади.

Қизғин баҳс-мунозаралар ва самимий савол-жавобларга бой бўлган бу мулоқот майдонида ёшлар ўзларини қизиқтирган барча саволларга устоз ижодкорлардан аниқ, батафсил ва ҳаётий тажрибаларга асосланган жавоблар олишга муваффақ бўлдилар. Шу билан бирга, ҳаваскор ёш ижодкорлар ҳам катта даврада ўзлари қаламга олган илк шеърларидан намуналар ўқиб бериб, тажрибали устозларнинг қимматли маслаҳатларини, йўл-йўриқларини ва албатта, самимий дуоларини олдилар. Бу ҳолат уларнинг келгуси ижодий парвозлари учун улкан қанот бағишлаши табиийдир.

Тадбир якунида Амударё тумани ахборот-кутубхона маркази раҳбарияти ҳамда барча иштирокчилар томонидан ташриф буюрган азиз меҳмонларга адабиёт ва маънавият йўлидаги хизматлари учун чексиз миннатдорчилик билдирилиб, уларга эсдалик совғалари топширилди. Самимий ва кўтаринки руҳда ўтган ушбу унутилмас ижодий учрашув ёшлар қалбида китобга бўлган меҳрни, ижодий шижоатни янада оширишга ва эртанги куннинг етук маънавиятли ворисларини тарбиялашга улкан хизмат қилиши шубҳасиздир. Зеро, адабиёт яшар экан, миллатнинг руҳи ва онги ҳам доимо юксалаверади.