Бобур номли овулда 54 оила имтиёзли кредит эвазига ўз ишини бошлади

Хонадон даромадини кўпайтириш, меҳнатга лаёқатли ҳар бир фуқарони муносиб иш билан таъминлаш ва оилавий тадбиркорликни оммалаштириш сўнгги йилларда ижтимоий сиёсатнинг ўзагига айланди. Бу вазифалар маҳаллабай ишлаш тизими орқали, яъни ҳар бир хонадоннинг эҳтиёжини жойида ўрганиш йўли билан ҳал этилмоқда.

Маҳалладаги имкониятлардан унумли фойдаланиш, бўш турган ер майдонларини муомалага киритиш ҳамда норасмий бандликни расмийлаштириш ушбу ишларнинг натижадорлигини белгилайдиган асосий мезонлардан саналади. Зеро, бир хонадонда бошланган кичик тадбиркорлик кўпинча бутун бир маҳалла иқтисодиётига туртки беради.

Амударё туманининг Бобур номли овули ҳудудида 906 та хонадон мавжуд бўлиб, уларда 1285 та оила рўйхатга олинган, жами аҳоли сони эса 4748 нафарни ташкил этади. Шунча кўламдаги аҳоли билан ишлаш маҳалла фаоллари олдига аниқ манзилли ёндашув талабини қўяди. Ҳоким ёрдамчиси Улуғбек Ибрагимов “Маҳалла еттилиги” аъзолари билан биргаликда бу вазифанинг уддасидан чиқмоқда, десак янглишмаймиз.

Жорий йил давомида ҳокими ёрдамчиси бошчилигида аҳолини иш билан таъминлаш, хонадонларга қўшимча даромад келтириш ҳамда тадбиркорликни ривожлантириш бўйича бир қатор амалий ишлар бажарилди. Хусусан, норасмий банд бўлган 56 нафар фуқаро ўзлари фаолият юритиб келаётган йўналишлар бўйича ўзини ўзи банд қилган шахс сифатида рўйхатдан ўтказилди.

Маҳалла ёшларидан Давронбек Юлдашев 2026 йилда 50 миллион сўм миқдорида имтиёзли кредит олиб, туманда биринчилардан бўлиб ҳар хил турдаги декоратив қурилиш воситаларини ишлаб чиқаришни йўлга қўйди. Мазкур йўналиш туман ҳудудида илгари кенг тарқалмаган соҳалардан бўлгани боис, ёш тадбиркорнинг ташаббуси амалий аҳамияти жиҳатидан эътиборга моликдир.

Тадбиркор ишлаб чиқариш майдони ва ўрнатилган ускуналар ҳисобига цехда кўплаб маҳалладошининг доимий бандлигини таъминлаган. Айтиш жоизки, бундай кичик ишлаб чиқариш нуқталари қурилиш материаллари бозорида маҳаллий маҳсулот улушини оширишга хизмат қилади. Шу тариқа маҳалла аҳли зарур безак маҳсулотларини узоқ ҳудудлардан эмас, ўз овулидан топиш имкониятига эга бўлмоқда.

Ҳоким ёрдамчисининг кўмаги билан 2026 йилнинг ўтган даври мобайнида 54 нафар фуқарога оилавий тадбиркорлик фаолиятини йўлга қўйиш мақсадида жами 1 миллиард 173 миллион сўм имтиёзли кредит ажратилиб, улар чорвачилик, паррандачилик, хизмат кўрсатиш ва ишлаб чиқариш йўналишларида ўз фаолиятларини бошладилар. 3 нафар кишининг бандлиги эса субсидия ҳисобидан таъминланди.

Овулда яшовчи Нилуфар Ражапова 2026 йилда 10 миллион сўм имтиёзли кредит маблағи ҳисобидан нон ва нон маҳсулотлари ишлаб чиқариш фаолиятини йўлга қўйди. Кундалик эҳтиёж моллари қаторига кирувчи бу маҳсулотга талабнинг барқарорлиги оилавий тадбиркорлик учун қулай шароит яратади.

Ҳозирги кунда новвойхонада бир кеча-кундузда юзлаб нон ёпилиб, маҳсулот маҳалладаги савдо шохобчаларига, шунингдек, тўй ва бошқа оилавий маросимларга етказиб берилмоқда. Тадбиркор аёлнинг фаолиятига маҳалладошлари ҳам жалб қилинган бўлиб, хотин-қизлар бандлигини таъминлашда айнан шундай кичик ишлаб чиқариш нуқталари самарали восита саналади.

Айтиш жоизки, 2026 йил давомида овул бўйча ишсиз фуқаролардан 38 нафари мавсумий ва доимий иш ўринларига жойлаштирилди, шунингдек, янгидан 3 та тадбиркорлик субъекти ташкил этилиб, улар озиқ-овқат савдо шаҳобчаси, хизмат кўрсатиш ҳамда умумий овқатланиш йўналишларида фаолият бошлади. Янги очилган объектлар аҳолининг кундалик эҳтиёжларини ўз ҳудудида қондириш имконини бермоқда.

Шаҳноза Базарбаева ҳам ана шундай янги тадбиркорлардан. 2026 йилда 33 миллион сўм миқдорида имтиёзли кредит олиб, 3 сотих майдонда иссиқхона барпо этган ишбилармон бугунги кунда асосан бодринг етиштириш билан шуғулланиб келмоқда. Томорқадан самарали фойдаланишнинг бу шакли мавсумий даромадни йил давомида барқарор сақлаш имконини беради.

Шу ўринда айтиш керакки, иссиқхона хўжаликлари кичик ер майдонидан юқори даромад олиш имконини бергани боис маҳаллаларда тобора оммалашиб бормоқда. Бундай хўжаликлар оила аъзоларининг ўзи учун ҳам доимий машғулот яратади.

Қолаверса, овулда ишсиз аҳолини касб-ҳунарга ўқитиш ишларига ҳам алоҳида эътибор қаратилмоқда. Касб-ҳунар ва тадбиркорлик йўналишида таҳсил олиш истагини билдирган 7 нафар фуқаро касб ўрганишга йўлланма олгани ҳолда, жами 10 нафар талабгорлар ўқишга йўналтирилди.

Бундан ташқари, бўш ер майдонларини ҳудудий солиқ органлари билан ҳамкорликда электрон савдога чиқариш орқали ҳам овулда тадбиркорлик муҳитини яхшилаш чоралари кўрилмоқда. Биргина жорий йилнинг ўзида 2 та аукцион якунига кўра ғолиб деб топилган тадбиркорларга ажратилган ер майдонларида кўчма савдо ва хизмат кўрсатиш объектларини ташкил этиш ишларига ҳоким ёрдамчиси томонидан ҳар томонлама кўмак берилди. Бундай ёндашув ҳам бюджет тушумларини оширади, ҳам маҳаллада янги иш ўринлари пайдо бўлишига замин яратади.

Қишлоқ шароитида чорвачилик билан шуғулланиш нафақат оилани гўшт ва сут маҳсулотлари била таъминлашда, балки барқарор даромад манбаини яратишда ҳам муҳим аҳамият касб этади. Саламаддин Қучқаров 2026 йилда 22,5 миллион сўм имтиёзли кредит ҳисобидан ўз хонадонида наслли қўйчиликни йўлга қўйди. Чорва молларининг насл сифатига эътибор қаратиш маҳсулдорликни оширишнинг ишончли йўлларидан бири эканини инобатга олган ҳолда, тадбиркор айнан шу йўналишни танлади. Хонадондаги наслли қўйлар йил сайин барқарор кўпаймоқда.

Бу мисоллар маҳаллага ажратилган имтиёзли кредит ва субсидиялар аниқ манзилга — иш бошлашга тайёр хонадонларга йўналтирилганини кўрсатади. Бу борада “Маҳалла еттилиги”, хусусан ҳоким ёрдамчилари институтининг аҳамияти ва ўрни жуда катта. Зеро, ҳар бир маблағ ортида бир оиланинг барқарор даромад манбаи ва маҳалладаги бир неча иш ўрни турганини тўғри англаб, уни мақсадли ва манзилли йўналтириш мамлакатимизнинг янада тараққий этиши ва халқимиз фаровонлигига замин яратади.