Амударёда қутқарув қисмининг янги биноси фойдаланишга топширилди

Юртимиз мустақиллигининг 35 йиллиги — халқимиз ҳаётида беқиёс аҳамиятга эга бўлган, озодлик ва бунёдкорлик, тинчлик ва тараққиёт тимсолига айланган улуғ байрам. Ушбу қутлуғ сана арафасида Амударё туманида яна бир эзгу ташаббус ҳаётга татбиқ этилиб, халқ хизматига йўналтирилган замонавий иншоот фойдаланишга топширилди.

Қипчоқ овули ҳудудида замонавий талабларга жавоб берадиган янги қутқарув қисми биносининг фойдаланишга топширилиши нафақат соҳа вакиллари, балки бутун туман аҳолиси учун қувончли воқеа бўлди.

Қутқарув қисми янги биносининг тантанали очилиш маросимида Ўзбекистон Республикаси Фавқулодда вазиятлар вазирлиги ҳамда унинг Қорақалпоғистон Республикаси бошқармаси раҳбарияти, Амударё тумани ҳокими Собир Хўжаметов, мутасадди ташкилотлар раҳбарлари, соҳа фахрийлари, нуронийлар ҳамда қутқарув хизматининг шахсий таркиби иштирок этди.

Тадбир Ўзбекистон Республикаси ва Қорақалпоғистон Республикаси давлат мадҳиялари садоси остида бошланди. Тадбирда сўзга чиққанлар мамлакатимизда фавқулодда вазиятларнинг олдини олиш, уларнинг оқибатларини бартараф этиш, аҳоли хавфсизлигини таъминлаш борасида амалга оширилаётган кенг кўламли ислоҳотларга алоҳида тўхталдилар.

Таъкидланганидек, бугунги кунда фавқулодда вазиятлар тизимида замонавий ёндашувлар жорий этилиб, қутқарув хизматининг моддий-техник базаси изчил мустаҳкамланмоқда. Энг муҳими, соҳа ходимлари учун замонавий ва муносиб меҳнат шароитларини яратиш, уларнинг тезкор ва самарали фаолият олиб бориши учун зарур имкониятларни кенгайтиришга катта эътибор қаратилмоқда.

Амударёда қад ростлаган қутқарув қисмининг янги биноси ҳам ана шу эзгу саъй-ҳаракатларнинг амалий ифодасидир.

Тантанали маросимда сўз олган соҳа фахрийлари ўз хотиралари билан ўртоқлашдилар. Улар аввалги қутқарув қисми биносида хизмат олиб борилган йилларда мавжуд бўлган шароит ва имкониятларни эслаб, бугунги кунда қутқарувчилар учун яратилаётган қулайликларни катта мамнуният билан эътироф этдилар.

4 миллиард 172 миллион сўм маблағ эвазига бунёд этилган янги бинода тезкор қутқарув ишларини ташкил этиш учун барча зарур замонавий имкониятлар яратилган. Бино замонавий талабларга мос равишда жиҳозланиб, қутқарувчиларнинг хизмат вазифаларини самарали бажариши, фавқулодда вазиятлар ҳудудига тезкорлик билан етиб бориши ва аҳолига сифатли ёрдам кўрсатиши учун зарур шароитлар яратилди.

Тантанали маросимда қутқарув хизматига Вазир совғаси сифатида янги қутқарув машинасининг калити тантанали равишда топширилди. Янги, замонавий техниканинг сафга қўшилиши қутқарувчиларнинг тезкорлигини ошириб, турли фавқулодда вазиятларда зарур ёрдамни ўз вақтида кўрсатиш имкониятларини янада кенгайтиради.

Ҳар қандай бунёдкорлик ишининг ортида катта меҳнат, масъулият ва фидойилик туради. Қутқарув қисми янги биносининг бунёд этилишида муносиб ҳисса қўшган пудратчи ташкилот — “Гидро-монтаж-строй” МЧЖ жамоасининг меҳнати ҳам тадбир давомида алоҳида эътироф этилди. Ташкилот раҳбарига амалга оширилган ишлар учун миннатдорчилик билдирилиб, эсдалик совғалари ҳамда ташаккурнома топширилди.

Ўз навбатида қурувчи ташкилот раҳбари қутқарув қисми янги биносининг рамзий калитини туман Фавқулодда вазиятлар бўлими бошлиғига тантанали равишда топширди. Шундан сўнг фахрийлар, нуронийлар, соҳа вакиллари ва тадбир қатнашчилари иштирокида рамзий тасма қирқилди. Шу тариқа, Мустақиллигимизнинг 35 йиллиги арафасида Амударё туманида яна бир муҳим ижтимоий объект ўз фаолиятини бошлади.

Қутқарув қисмининг янги биноси Амударё тумани аҳли учун хавфсизлик ва хотиржамлик қалқони, қутқарувчилар учун эса фидокорона хизмат йўлидаги янги имкониятлар маскани бўлиб кўп йиллар давомида хизмат қилишига тилакдошмиз!

Чарос Арслонова, туман ҳокимлигининг Ахборот хизмати раҳбари.