НОМЛАРИ ГАЗЕТА ТАХЛАМЛАРИДА ҚОЛГАНЛАР...
Бу йил Амударё туманимиз ташкил қилинганлигига 65 йил тўлади. Албатта, аввалги собиқ “Амударё ҳақиқати” газетаси ҳам 65 ёшда. Тўғри, собиқ Манғит туманида 1934 йилдан “Сталинчи” ва Қипчоқ туманида “Социализм йўли” газеталари чиққан. Икки туман 1957 йилнинг декабрь ойи охирида бирлашганидан сўнг, 1958 йилнинг январь ойи бошидан “Амударё ҳақиқати” деган ном билан газета чиқа бошлаган. Газета бор-йўғи икки йил чиққанидан кейин тугатилиб, 1960-62 йилларда Амударё, Тўрткўл, Беруний туманлари учун “Коммунизм ғалабаси” газетаси чоп этила бошлади. Кейинчалик бу газета ҳам тугатилди.
1965 йил июль ойидан бошлаб, яна “Амударё ҳақиқати” газетаси таҳририяти қайта ташкил этилиб, ўз фаолиятини бошлади. Мен 1966 йил январь ойидан бошлаб, шу газетада фаолият юритдим. Газета муҳаррири, Аллоҳ раҳмат қилсин, устоз Собир Юсупов эдилар. Устоз 1965-1975 йилларда газета муҳаррири бўлиб ишлади, сўнгра туман партия қўмитасида пенсияга чиққанларигача – 1981 йилнинг бошига қадар ишладилар.
Ўша пайтларда газетанинг жамоатчи мухбирлари жуда кўп бўлиб, уларнинг сони 100 нафардан зиёд эди. Уларнинг анчаси бу оламни тарк этишди. Холмурод Отамуродов, Йўлдош Жуманиёзов, Тўрамурод Матқурбонов, Ғойиб Холимбетов, Жумабой Бекчанов, Ўрин Сафарий, Усмон Аҳмедов, Холбой Ўрозметов, Қодирберган Ўталов, Йўлдош Раҳимов, Нурулла Худоёров, Йўлдош Матёқубов, Раҳимбой Жуманиёзов, Абдураим Маткаримов ва бошқаларнинг ёзган хабар, мақола, лавҳа, репортаж, очерклари газета саҳифаларида мунтазам ёритилди. Уларнинг номлари ва ёритилган мақолалари “Амударё ҳақиқати” газетаси тахламларида ўчмас тарихий далиллар сифатида қолди.
Кези келганидан фойдаланиб, юқорида номлари тилга олинган, айни кунда орамизда йўқ жамоатчи мухбирларимизнинг авлодларини матбуот куни байрами билан табриклайман. Боболарининг руҳлари шод, иймонлари ҳамроҳ, охиратлари обод ва жойлари ҳамиша жаннатда бўлсин!
Саъдулла ХЎЖАНИЁЗОВ,
Қорақалпоғистон Республикасида хизмат кўрсатган журналист.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
