Туманда "E-AUKSION" электрон савдо платформаси орқали 859 та лотларда 219,8 гектар ер майдони савдога қўйилди

Сўнгги йилларда қишлоқ хўжалигини ислоҳ қилиш ва соҳага бозор механизмларини жорий этиш борасида изчил чора-тадбирлар амалга оширилмоқда, Шу билан бирга, пахта ва ғалладан қисқартирилаётган ер майдонларида боғдорчилик, узумчилик, полиз ва сабзавотчилик, дуккакли ва мойли экинларни етиштириш соҳасида экспортбоп қишлоқ хўжалиги экинлари экишни кўпайтириш, шунингдек, аҳолининг кенг қатламларини жалб қилиш орқали ушбу ерлардан самарали фойдаланиш тизимини яратиш эвазига тармоқда қўшимча ўсишга эришишда илмий асосланган ёндашув ва ўрганишларни инобатга олиш тақозо этилмоқда.

Жумладан, ҳисоб-китобларга кўра 1 гектар майдонда етиштирилган пахта хом ашёсига нисбатан узумдан 7 баравар, гилосдан 6 баравар, ёнғоқдан 5 баравар кўп даромад олиш ҳамда ушбу ерларда оилавий тадбиркорлик доирасида кичик интенсив боғдорчилик, узумчилик, полиз, дуккакли, мойли экинлар, картошка етиштириш ва сабзавотчилик лойиҳаларини қўллаб-қувватлаш орқали «Темир дафтар», «Аёллар дафтари» ва «Ёшлар дафтари»да рўйхатда турган эҳтиёжманд оилаларнинг даромадли меҳнат билан бандлигини таъминлаш бўйича катта имконият мавжуд.

Амударё туманида аҳолининг даромад топишга қаратилган тадбиркорлик ташаббусларини молиявий қўллаб-қувватлаш, аҳолига аграр тармоқда ўз бизнесини ташкил этишга кўмаклашиш, қишлоқ хўжалиги маҳсулотларини етиштиришда деҳқон хўжаликларининг улушини ошириш орқали озиқ-овқат хавфсизлигини таъминлаш мақсадида манзилли ишлар амалга оширилмоқда.

Хусусан, жорий деҳқончилик йилида Амударё туман ҳокимлиги заҳира ер майдонидан 3,9 гектар ер аукцион савдоларига қўйилган бўлиб, мазкур аукцион савдоларида қатнашган фуқаролардан 15 нафари ғолибликни қўлга киритдилар. Аукцион савдоларида ғолиб бўлган 14 нафар ишсиз фуқаронинг ҳар бири 25 сотихдан, 1 нафар фуқаро эса 40 сотих ер эгалари бўлишди. Аукцион ғолибларига Холимбег овул фуқаролар йиғини ҳудудидаги “Уста Оллаёр” фермер хўжалиги ҳисобидан 4 гектар ер майдони ажратиб берилиб, айни пайтда ер эгалари бўлган 15 нафар фуқаролар пиёз, картошка, карам, булғор қалампири, помидор, сабзи каби сабзавот экинларини парвариш қилишмоқда.

Шуни алоҳида эътироф этиш керакки, аукцион савдоларида иштирок этиб, ер эгаси бўлган Жамол Искандаров, Хосият Йўлдошева, Дилшодбек Қурбонбоев, Жамшид Тилавов, Дилмурод Аҳмедов ва уларнинг ҳамқишлоқлари нафақат ўзларининг иш билан бандлигини таъминлашди, балки оиласининг иқтисодини кўтариш имконига ҳам эга бўлишди.

Ўзбекистон Республикаси Президентининг 2021 йил 23 ноябрдаги “Мева-сабзавотчилик ва узумчиликда оилавий тадбиркорликни ривожлантириш, қишлоқ хўжалиги ишлаб чиқаришида деҳқон хўжаликларининг улушини ошириш чора-тадбирлари тўғрисида”ги Қарори ижроси юзасидан туманда бу борадаги режага биноан 2022 йилда 897 гектар, 2023 йилда 578 гектар, 2024 йилда 437 гектар ва 2025 йилда 330 гектар майдонда деҳқон хўжаликларини ташкил қилиш кўзда тутилган.

2022 йилда жами 932,4 гектар майдонда 3579 лотда деҳқон хўжаликлари ташкил қилиниши белгиланди. Бугунги кун холатига "E-AUKSION" электрон савдо платформаси орқали 674,4 гектар майдонида 2659 лотларда танлов ғолиби аниқланди ва яна "E-AUKSION" электрон савдо платформаси орқали 219,8 гектар майдонда 859 лотлар савдо майдончасига қўйилди.

 “Бир контур - бир маҳсулот” тамойили асосида ишларни тўғри ташкил қилиш “Амударё томорқа хизмат” МЧЖ кластери тасарруфидаги деҳқон хўжаликлари томонидан етиштирилган қишлоқ хўжалик маҳсулотларининг бозорбоплигини таъминлаш, бозорларда нарх-навони бир хил ушлаб туришга эришилади. Бундан ташқари, деҳқон хўжаликлари ташкил қилиш орқали шу кунгача 2659 та фуқаронинг доимий иш билан бандлиги таминланди ва яна 859 нафар фуқаронинг бандлигини таъминлаш кўзда тутилган.

Шу билан бирга, мавжуд деҳқон хўжаликларининг иқтисодий аҳволини яхшилаш, маҳсулот етиштириш ҳажмини ошириш масаласига ҳам эътибор қаратмоқдамиз. Хусусан, Ўзбекистон фермер, деҳқон хўжаликлари ва томорқа ер эгалари Кенгаши хузуридаги фермер, деҳқон хўжаликлари ва томорқа ер эгаларини қуллаб-қувватлаш жамғармаси маблағлари ҳисобидан деҳқон хўжаликлари учун 14 фоиздан банк кредитлари бериш ҳам йўлга қўйилган.

Мухтарам Президентимиз томонидан белгилаб берилган бу йўналиш, яъни «Темир дафтар», «Аёллар дафтари» ва «Ёшлар дафтари»да рўйхатда турган эҳтиёжманд оилаларга ер майдонлари ажратиб бериш орқали уларнинг бандлигини таъминлашга қаратилган саъй-ҳаракатлардан халқимиз ҳам мамнун. Бу йил ер берилган ёшларимиз орасидан тажрибали ва ташаббускорларини аниқлаб, келгуси йилларда туман заҳира ер фонди ҳисобидан ер майдонлари ажратиб бериш, шу билан бирга уларнинг фермер хўжаликларини ташкил қилиш учун ўтказиладиган тендерда иштирок этишлари учун шароит яратишга, шу орқали аҳоли фаровонлигини оширишга қаратилган ишлар изчил давом эттирилади.

Жавлон РАЖАБОВ, Амударё туман фермер, деҳқон хўжаликлари ва томорқа ер эгалари Кенгаши хузуридаги аҳоли хонадонларида томорқадан самарали фойдаланиш бўйича агроном.