ДХХ Раиси кубоги учун ўтказилган футбол мусобақаларида 3-ўринни эгаллаган Холимбег овули жамоаси рағбатлантирилди

Жорий йилнинг апрель ойида 16 ёшдан 30 ёшгача бўлган ёшлар ўртасида Давлат хавфсизлик хизмати Раиси кубоги учун футбол мусобақаларига старт берилган эди.

9 август куни мазкур мусобақаларнинг Қорақалпоғистон Республикаси босқичида 3-ўринни эгаллаган Амударё туманининг Холимбег овули жамоаси билан учрашув ташкил этилди.

Маҳалла ёшларини бирлаштириш, бўш вақтларини кўнгилли ўтказиш, улар орасида спортни оммалаштириш, истеъдодли футболчиларни кашф этиш мақсадида кейинги йилларда анъанавий тарзда ўтказиб келинаётган бу мусобақа жорий йилда айниқса уюшқоқлик билан ўтказилди ва нуфузи ошди. Мамлакатимиз миқёсида барча маҳаллалар футболсеварлар ёшлари жамоалари иштирокидаги баҳслар маҳалла, сектор, туман, шаҳар, вилоятлар ва Қорақалпоғистон Республикаси миқёсида ўтказилди ва мамлакат босқичида иштирок этадиган жамоалар аниқланди.

Шуниси қувончлики, яқинда ушбу мусобақанинг Қорақалпоғистон босқичида фахрли 3-ўрин учун даъвогар бўлган Тахтакўпир ва Амударё туманлари футболчилари ўртасида ўтказилган баҳсда Амударё туманининг Холимбег овули ёшлари рақиблар дарвозасига 7 марта тўп киритиб, ишончли ғалабага эришдилар.

Овулнинг 16 нафар ёшларидан тузилган жамоа аввал ҳам кўпгина нуфузли мусобақаларда қатшаниб, ғолиб ва совриндор бўлиб келаётган эди. Қорақалпоғистон миқёсида 424 маҳалланинг ёш футболчилари орасида учинчи ўринни эгаллаш ҳам осон бўлмади. Жамоанинг 16 нафар аъзоси ҳам ушбу  баҳсда бор иқтидорини намойиш этишга интилди, ғолиб чиқиш учун курашди. 7:0 ҳисоби билан баҳсни якунлаганларида чарчоқни ҳам унутиб, қувонганларидан бир-бирларини қутладилар.

Давлат Хавфсизлик хизмати Раиси кубоги учун ўтказилган футбол мусобақаси Қорақалпоғистон босқичи ғолиб ва совриндорларини тантанали тақдирлаш маросими холимбеглик футболчилар учун ўчмас таассуротлар қолдирди. Таниқли футбол ҳаками, инструктор, Ўзбекистон футбол Федерацияси вице президенти Равшан Эрматов уларни бу ғалабаси билан қутлаб, қимматбаҳо совғалар топширди, мураббийлари чуқур миннатдорчилик билдирди.

Холимбег овул фуқаролар йиғини биносида совриндор футболчилар учун ташкил этилган тантанали тадбирда фуқаролар йиғини раиси Зарифбой Олламов спортчиларни эришган ғалабаси билан фуқаролар йиғини ҳамда овул аҳолисининг номидан қизғин қутлади.

Айниқса, якуний баҳсда рақиб дарвозасини бехато нишонга олган Жўрабек  Тоғаев, унинг жамоадошлари Абдулла Дўсчанов, Акмал Комилов, Азамат Давлатбоев, Фаррух Маткаримов, Беҳзод Ҳайитбоев, Шамшиддин Ўрозбоевларга овул спорт шарафи юксалишига муносиб ҳисса қўшгани учун раҳматлар айтди.

Яна бир эътирофга арзигулик маълумот: Давлат хавфсизлик хизмати Раиси Кубоги мусобақасининг Қорақалпоғистон босқичи баҳсларида айнан холимбеглик Шамшиддин Ўрозбоев “Энг яхши ўйинчи” дея эътироф этилди.

Ёш футболчиларни мураббий Янгибой Эшимбетов, жамоа сардори Ғафур Янгибоевлар ҳам қизғин қутлаб, келгуси йилда ушбу анъанавий мусобақанинг мамлакат миқёсидаги ғолиби бўлишини тиладилар.

Севара Исмоилова.