“Маънавият фестивали” доирасидаги тадбирлар давом этмоқда

Республикамизнинг турли ҳудудларида мустақиллигимизнинг 31 йиллик байрами олдидан ташкил этилган “Маънавият фестивали” доирасидаги тадбирлар Амударё туманида ҳам кўтаринки руҳда бўлиб ўтди.

Тошкент шаҳридан бир гуруҳ маданият ва санъат ходимлари, эл суйган ижодкорлар, театр актёр ва актрисалари, шоиралар билан бирга туманимизга “китоб карвонлари”, “кино карвонлари” ҳам етиб келди.

15 август кунидан бошлаб туманимизнинг турли ҳудудларида, энг чекка овул ва маҳаллаларда ҳам тадбирлар ташкил этилиб, аҳолига маънавий ҳордиқ улашилди. Қолаверса, имконияти чекланган ёшлар ҳолидан ҳам хабар олиниб, уларга бадиий китоблар совға қилинди.

18 август куни Олмазор маҳалласи ҳудудида жойлашган “Хотира майдони”да “Янги ўзбекистонда эл азиз, инсон азиз!” шиори остида гала концерт бўлиб ўтди.

Концерт дастурида туман ҳокими Султонбой Йўлдашев, Тошкент шаҳридан ташриф буюрган эл эъзозидаги меҳмонлар, меҳнат фахрийлари, ёшлар, катталар, кексалар иштирок этишди.

Миллатлараро дўстлик, ҳамжихатлик, ўзаро қон-қариндошлик ва биродарлик нафаси кезиб юрган “Хотира майдони” бир зумда болаларнинг шўх-шодон кулгуси ва улуғ ёшли инсонларнинг тинчлик-омоник ҳақидаги шукроналик сўзлари билан тўлиб тошди.

Тадбирда туман ҳокими Султонбой Йўлдашев барчани яқинлашиб келаётган Ўзбекистон Республикаси давлат мустақиллигининг 31 йиллик байрами билан самимий табриклади. Юртдошларимизнинг хонадонларига қут-барака, хотиржамлик тилади.

Шунингдек, Тошкент шаҳридан ташриф буюрган бир гуруҳ маданият ва санъат ходимларига ўз ижод намуналари билан халқимизга маънавият ва маърифат улашганликлари учун миннаддорлик билдирди.

Тадбир давомида Ўзбекистонда хизмат кўрсатган маданият ходими Зулфия Мўминова қорақалпоқ элига муҳаббатини ўзининг гўзал сатрлари билан изҳор этди. Қолаверса, Амударё туманининг аҳолиси меҳмондўст, меҳнаткаш ва танти инсонлар эканлигини, қишлоқларда истиқомат қилувчи оддий инсонлар орасида ҳам юксак истеъдод соҳиблари бор эканлигини айтиб ўтди.

Шундан сўнг тадбир эл суйган таниқли эстрада юлдузлари ижросидаги гўзал куй-қўшиқлар билан давом этди.

Озод ва обод Ватанга байрамлар, тўйлар ярашади. Юртимизда байрам шукуҳи кезиб юрган ушбу паллаларда республикамизга ташриф буюрган “Маънавият карвони” ўзи билан биргаликда ўзгача кўтаринки руҳ олиб келди.

Гала концертда куйланган ҳар бир қўшиқда Ватан мадҳи, тинчлик, шукроналик туйғулари мужассам бўлди.

Туман ҳокимлигининг Ахборот хизмати.