ҚИЛИЧБОЙ МАДАНИЯТ МАРКАЗИ ТОМОНИДАН “ИСТИҚЛОЛИМ, МАНГУ БЎЛ ОМОН!” ДЕБ НОМЛАНГАН БАЙРАМ ТАДБИРИ ЎТКАЗИЛДИ

Мамлакатимиз ўз мустақиллигини қўлга киритганидан бери ўтган 31 йил мобайнида халқимизнинг асрий орзуси бўлган бу бебаҳо неъматнинг қадр-қимматини ҳар бир юртдошимиз тобора теран англамоқда. Амалга оширилаётган кенг кўламли ислоҳотлар, бунёдкорликлар, янгиланишлар барча-барчаси инсон бахт-саодати учун, унинг муносиб ҳаёт кечиришини таъминлаш учун эканлигини ҳаёт тасдиқламоқда. Бугунги кунда кекса авлод вакиллари, хотин-қизлар ва ёшларга доимий эътибор ва ғамхўрлик кўрсатиш, уларнинг ҳуқуқ ва манфаатларини таъминлаш, оила, оналик ва болаликни ҳимоя қилиш учун катта маблағлар ажратилаётгани – юртимизда инсонга ғамхўрлик, унинг қадр-қиммати тобора юксалаётганини кўрсатади.

Шу боисдан ҳам мамлакатимиз мустақилликка эришган кун – 1 сентябрни ҳар йили кўпмиллатли халқимиз улкан шодиёна билан нишонлайди.

Шу йилнинг 27 августида Амударё туманининг Қиличбой овулида ҳам сана муносабати билан “Янги Ўзбекистонда эл азиз, инсон азиз!” деган ғояни ифодаловчи маданий тадбир ўтказилди.

“Истиқлолим, мангу бўл, омон!” деб номланган тадбирга ҳудуд нуронийлари, мактаблар ўқитувчилари ва ўқувчилари, нодавлат мактабгача таълим муассасаси тарбиячи, тарбияланувчилари, ёшлар, овул фаоллари иштирок этдилар.

Йиғилганларни фуқаролар йиғини раиси Баҳром Қодиров мустақиллигимизнинг 31 йиллиги билан қутлади, мустақиллик йилларида овулда амалга оширилган улкан бунёдкорликлар, юксалишларга кенг тўхталди, ободонлаштириш, кўкламзорлаштиришга улкан эътибор қаратилаётгани боис ҳудуд тобора чирой очиб бораётганига ҳар бир фуқаронинг меҳнат қилиши ва бахтиёр ва фаровон ҳаёт кечириши учун кенг имкониятлар яратилаётганлигига кенг тўхталди.

Шунингдек, 26 август куни Қорақалпоғистон Республикаси Жўқорғи Кенгесининг навбатдан ташқари 34 сессиясида иштирок этган муҳтарам Юртбошимизнинг Қорақалпоғистонни ижтимоий-иқтисодий ривожлантириш йўналишида, оналик ва болаликни, нуронийларни ижтимоий ҳимоялашни кучайтириш борасида берган таклифлари, қорақалпоғистонлик ёшлар учун олий таълим муассасаларида алоҳида квота ажратилиши хусусида айтган фикрлари халқимиз турмуши яна ҳам обод, фаровон бўлишига хизмат қилишини таъкидлади.

Овул нуронийлари табрикларидан сўнг Қиличбой Маданият маркази санъаткорлари, ҳудуддаги 69-, 15- ва 83-сонли мактаблар ўқувчилари, нодавлат мактабгача таълим ташкилоти тарбияланувчилари иштирокида мустақилликнинг қадр-қимматини ифода этувчи театрлаштирилган байрам томошаси намойиш этилди.

Шунингдек, туман Маданият бўлимидан ташриф буюрган Нурбек Ражабов, Давлатёр Шомуродов, Ойбек Нурманов, Хурсанд Шукурлаевлар ҳам ўзларининг дилрабо куй-қўшиқлари билан байрам тадбири иштирокчиларини хурсанд қилди.

Юртимизда байрам шукуҳи кезиб юрган дамда Қиличбой маданият марказида бўлиб ўтган маданий тадбир барчага хурсандчилик ҳадя этди.

Ойгул РАЖАБОВА.