Оқ олтин овулидаги “Якубова Гавҳар” фермер хўжалиги ишчилари шартномавий режадаги 296 тонна ўрнига 300 тонна ҳосил йиғиб олишди

Деҳқончиликда осон келган йилнинг ўзи йўқ. Гоҳ баҳор серёғин келиб, экин-тикин ишлари кечикса, айни ғўза парвариши авж олган ёз палласида сув танқислиги кузатилади. Кузда эса деҳқонлар совуқ кунларнинг барвақт бошланишидан олдин йиғим-терим ишларини якунлашга интиладилар.

Амударёлик “Якубова Гавҳар” фермер хўжалиги раҳбари Даврон Холменов шу боисдан ҳам фермер хўжалигини ташкил этган илк кунларданоқ, аввало ишни хўжалик ерларининг табиий хусусиятларини ўрганишдан бошлади. Сизот сувларининг  тупроқнинг унумдор қатламига қанчалик яқинлиги, ерларнинг шўрланиш даражасини пухта  ўрганиб, экин-тикин ишларини аниқ режа асосида ташкил этди. Чунки шўрланиш даражаси юқори бўлган далаларга шошилинчда чигит экилса, намлик меъёрдан баланд бўлганлиги учун униб чиқиши қийинлашиб, аксарият ҳолларда уруғ чириб кетиши мумкин. Шу боис, бундай ерларнинг шўрини ювишга алоҳида эътибор қаратди, хўжалик ҳудудидаги ички коллекторларнинг зах сувларни ўтказувчанлик ҳолатини яхшилади. Натижада хўжалик ерлари мелиоратив талаблар даражасига етказилди. Мана, 18 йилдирки, “Якубова Гавҳар” фермер хўжалиги туманда илғор хўжаликлар қаторида тилга олинади.

Жорий деҳқончилик йили ҳам фермер хўжалиги ишчилари учун синовлар билан бошланди. Оқар сув танқислиги, баҳорги табиат  инжиқликларини мардонавор енгган деҳқонлар 90 гектар ерда пахтадан мўл ҳосил ундирдилар.

Асосан “Султон” навли уруғлик пахта етиштиришга ихтисослаштирилган фермер хўжалигида далалар 180 нафардан зиёд ишчиларга ижара пудрати асосида тақсимлаб берилган. Барча  агротехника тадбирлари ўз вақтида, сифатли олиб берилгани боис, ғўза парвариши жараёнида муаммо бўлмади. Ғўза парвариши билан бир вақтнинг ўзида 2021-2022 йил ҳосили учун экилган 60 гектар ердаги ғалладан ҳам юксак хирмон кўтарилди. Шартномавий режадаги 150 тонна ўрнига 300 тонна “қирмизи дон” йиғиштириб олинди. Ҳосилдорлик ҳар гектар ҳисобига 50 центнерга етказилиб, режа 200 фоизга уддаланди. Бундан  ҳам қувончлиси, шартномавий  режадан ташқари етиштирилган 150 тонна буғдой хўжалик ихтиёрида қолди ва маълум қисми фермер хўжалиги ишчилари учун тарқатилди.

Пахтачиликда ҳам бу йилги мавсумни залворли қадамлар билан бошлаган хўжалик деҳқонлари биринчи теримдаёқ шартномавий режани ортиғи билан уддаладилар. 90 гектар пахта майдонининг ҳар гектаридан 34 центнердан, шартномавий режадаги 296 тонна ўрнига 300 тонна ҳосил йиғиб олишди.

Эришилган юксак натижада мавсум бошидан бери ҳар бири 5-6 тонна пахта теришиб, бошқаларга намуна бўлган фермер хўжалиги ишчиларидан Зумрад Қутлимуродова, Муҳайё Нурманова, Гулбаҳор Матсафоеваларнинг ҳиссаси катта бўлди. Айни пайтда чевар теримчилар орасида мавсум бошидан бери 9-10 млн. сўм атрофида иш ҳақи олганлар кўпчиликни ташкил қилади.

Хўжалик далаларида пахта тераётган теримчилар ва кўнгилли ҳашарчиларга дала бошида чошгоҳлик ва тушлик учун яхши шароитлар  яратилган. Кунлик иш ҳақлари айни пайтда ҳар бир килограмм пахта учун 2 000 сўмдан, тарози бошида ҳисоб-китоб қилинаётганидан теримчилар мамнун. Шунга яраша иш унуми ҳам юқори.

Жорий йилги пахта йиғим-терим мавсумини янада муваффақиятли якунлаш мақсадида фидойилик билан меҳнат қилаётган фермер хўжалиги раҳбари Даврон Холменовнинг ҳисоб-китобларига кўра, фақат пахтачиликнинг ўзидан 3 млрд. сўм даромад олиниши кутилмоқда.

Айни пайтда эса хўжалик далаларида пахта йиғим-терими давом эттирилиб, қабул пунктларига кунига 2-3 тонна атрофида пахта топширилмоқда.

Хўжаликнинг 2022-2023 йил ҳосили учун экилган 64 гектар ердаги буғдойзорларида эса бир текис униб чиқиб, бачкилашни бошлаган ям-яшил буғдой майсаларига кузги ишлов бериш, озиқлантириш ишлари самарали амалга оширилмоқда.

Робия ЙЎЛДОШЕВА.