М.АҲМЕДОВА ИШТИРОКИДА АМУДАРЁЛИК ФАОЛ АЁЛЛАР “ЯШИЛ МАКОН” УМУММИЛЛИЙ ЛОЙИҲАСИ ДОИРАСИДА "ОНАЛАР БОҒИ"ГА КЎЧАТ ЭКДИ
Ҳар йили бутун мамлакатимиз бўйлаб куз ва баҳор ойларида кенг кўламли кўчат экиш ишлари амалга оширилади. Жорий йил кузги кўчат экиш мавсуми эса ўзгача кўтаринки руҳда бошланди. Президентимиз ташаббуси билан амалга оширилаётган мазкур тадбирда барча, шу жумладан, идора ва ташкилотлар, муассасалар ходимлари, талаба ва ўқувчи-ёшлар, нуроний отахон ва онахонлар, давлат ва жамоат арбоблари фаол иштирок этишмоқда.
Мамлакатимизда “Яшил макон” умуммиллий лойиҳаси Президентимиз ташаббуси билан 2021 йил ноябрь ойида бошланган эди. Мазкур лойиҳа доирасида йилига Ўзбекистон миқёсида 200 млн. туп дарахт ва бута кўчатларини экиш белгилаб берилган эди. Бундай кенг кўламли ташаббуснинг амалга оширилиши натижасида аҳоли масканларидаги яшил майдонлар ҳудуди 8 фоиздан 30 фоизга оширилиши халқимиз учун мусаффо, тоза ҳаво ҳудудларини янада кенгайтириш имконини беради.
“Яшил макон” умуммиллий лойиҳаси бир йиллик тадбир эмас, балки халқимиз учун бобомерос маънавий қадрият ҳисобланади ва ҳар йили мамлакатимиз бўйлаб анъанавий кўчат экиш мавсумини ҳар бир фуқаро мамнуният билан савобди иш сифатида амалга оширади.
Амударё туманида ҳам барча ташкилот, муассаса ва корхоналар томонидан ҳудудларда ободонлаштириш ва кўкаламзорлаштириш, кўчат экиш ишлари ҳамжиҳатлик билан олиб борилмоқда. Ушбу “Долзарб 40 кунлик”да Амударё туман хотин-қизлар бўлими ходимлари ҳам фаол иштирок этишмоқда.
Жорий йилнинг 3 ноябрь санасида Амударё туман хотин-қизлар бўлими раиси Гўзал Сабурова раҳбарлигидаги овул ва маҳалла фуқаролар йиғинларининг хотин-қизлар фаоллари, шунингдек, “Оқила аёллар” жамоатчилик тузилмаси аъзолари иштирокида 87-сонли умумтаълим мактаби ҳудудида ташкил этилган “Оналар боғи”да “Яшил макон” умуммиллий лойиҳасининг “Долзарб 40 кунлик” доирасидаги кўчат экиш тадбири амалга оширилди.
“Долзарб 40 кунлик” доирасида ўтказилган мазкур кўчат экиш тадбирида Қорақалпоғистон Республикаси хотин-қизлар қўмитаси раиси Марям Аҳмедова иштирок этди ва мазкур тадбирнинг аҳамияти, “Яшил макон” умуммиллий лойиҳаси 1 йиллик тадбир эмас, балки халқимиз учун азалий анъанавий қадрият, қолаверса, мамлакатимизда мазкур лойиҳа асосида келгуси беш йилликда 1 миллиард туп дарахт кўчатларини экиш режалаштирилгани ҳақида тўхталди ва “Оналар боғи”га кўчат экди.
Шу куни тадбир иштирокчилари бўлган овул ва маҳалла фуқаролар йиғинлари фаоллари ва “Оқила аёллар” жамоатчилик тузилмаси аъзолари бўлган онахонлар ўз қўллари билан “Оналар боғи”га ясень, пенсильвания, садақайрағоч, катальпа, гледичия, мевали дарахт кўчатларидан ўрик, олча беҳи каби ниҳолларни экдилар.
Инсонлар саломатлигини тиклашда табиий кислород фабрикаси – яшил оламнинг ўрни беқиёс катта аҳамиятга эга. “Яшил макон” умуммиллий лойиҳасини амалга ошириш мақсадида ўтказилаётган “Долзарб 40 кунлик” кўчат экиш мавсумининг аҳамиятини ўсиб келаётган ёш авлод онгига сингдириш, улар қалбида она табиатга чексиз меҳр уйғотиш, ўзи яшаб турган ҳудуднинг экологик ҳолатини яхшилашда масъулият ҳиссини уйғотишга қаратилган бу хайрли тадбир ҳар бир амударёлик учун анъанавийлик касб этмоқда. Мазкур тадбир бутун туман бўйлаб кенг қулоч ёйиб, унда ёш-у қари виждонан ва масъулият билан иштирок этмоқда.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
