ЭЛ ҲУРМАТИНИ ҚОЗОНГАН ШИФОКОР

Шифокорлик – жасорат! Бу касб фидойиликни, қалб ва фикр софлигини тақозо этади. Унинг меҳнати энг бебаҳо ва хайрли меҳнатдир. Чунки шифокор одамларнинг соғлиғини сақлаши ёки қайта тиклаши орқали уларни жамиятга қайта инъом этади.

Ҳаётининг энг таҳликали, энг хавфли онларидан ҳаётга қайтаётганларни, дунёга ўзгача нигоҳ билан боқаётганларни туман Тиббиёт бирлашмасига қарашли шошилинч тиббий ёрдам шифохонаси жонлантириш бўлимида ҳар куни учратиш мумкин. Бўлим 6 ўринга мўлжалланган бўлса-да, бу ерда  шароит тақозосига кўра, баъзан 10 нафаргача беморларга шошилинч ёрдам берилади. Турли бахтсиз ҳодисалар, автоҳалокатлар, сурункали касалликлар хуружи, инфаркт, инсульт рўй берганда, оғир аҳволга тушганларга  шошилинч ёрдам шифохонасининг жонлантириш бўлимида  тезкор, сифатли тиббий ёрдам кўрсатилганлиги туфайли ҳаётга қайтаётганлар кўпчилик. Ана шундай қувонарли натижалар қўлга киритилишида  бўлим реаниматолог-анестезиолог шифокори, ўз касбининг фидойиси И.Сарибоевнинг ҳам муносиб ҳиссаси бор.

У ўрта мактабни тугатганидан сўнг Тошкент Тиббиёт институтининг Нукус филиалига ўқишга кирди ва муваффақиятли битириб чиқди. 1997-1998 йилларда Нукус шаҳридаги республика шифохонасида интернатура ўтади ва олий тоифали, малакали шифокорлардан йўл-йўриқ, маслаҳатлар олиб, тажрибаси ошди. Кейинчалик туман Тиббиёт  бирлашмасининг “Саломатлик маркази” шифокори бўлди. 2011 йилдан шу кунгача шошилинч тиббий ёрдам шифохонасининг жонлантириш бўлимида реаниматолог-анестезиолог бўлиб ишлаяпти. 2015 йилдан тез тиббий ёрдам бўлими реанимобиль бригадасида ҳам навбатчи шифокор. Ушбу бригада энг оғир аҳволдаги беморлар чақирувига йўналтирилади. Шундай дамларда мурожаат қилингандан тиббий бригада етиб боргунча бўлган вақт оралиғини шифокорлар “олтин вақт” дейишади. Ҳаёти қил устида турган инсонга тез етиб бориш, тезкор, сифатли тиббий ёрдам бериш  – қанча-қанча инсонларнинг ҳаёти сақлаб қолинишига сабаб бўлади. Бунда, албатта, шифокорнинг касбий маҳорати ҳам муҳим.

И.Сарибоев чақирувга келган хонадонидан тиббий ёрдами туфайли доимо олқиш олиб келаётганлардан бири.

– Коронавирусга чалинганимда ёшим саксонга етиб қолганига яшашдан умидимни узишимга сал қолган. Дард исканжага олган вақтида Икромжон келиб, ҳам муолажаси, ҳам ширин сўзи билан мени ҳаётга қайтарди. Ўз хоҳишим билан уй шароитимда даволандим. Энди кексаликнинг ҳам ўзига яраша муаммолари бўлади. И.Сарибоев буни тўғри англаб, уйда даволаниш қароримни маъқуллади. Тавсиясига кўра муолажа олиб, касалликдан фориғ бўлдим. Тез-тез келиб хабар олиб, аҳволимни назорат қилиб турди. Бу менинг ўзимга ишончимни оширди, Икромжондан жуда миннатдорман. Илойим халқимизнинг бахтига соғ бўлсин, касбидан камол топгай, – дейди у ҳақда матбуот фахрийси Саъдулла Хўжаниёзов.

Аслида бу шифокордан миннатдор инсонлар жуда кўп.

– Ҳар куни ишда энг оғир аҳволдаги беморларга қараш, жарроҳлик амалиётлари, тунлари навбатчиликлардаги бедорликлардан ҳеч безор ҳам бўласизми? – қизиқиб сўрадим ундан.

– Кимдир ёрдамингга муҳтож эканлиги, унга ёрдам бериш бурчинг эканлиги шифокорга доим куч бериб туради. Бироқ баъзан оғир шикастланишлар билан, инсульт, инфарктга чалиниб келтирилган беморларнинг ҳаммасининг ҳам ҳаётини сақлаб қолишнинг иложи бўлмайди. Шундай дамларда бундан жуда ўкинаман.

Айтишича, у ҳаётида танлаган касбидан фақат бир марта афсусланган экан. Ўша куни эр-хотин, икки шифокор – Икром Сарибоев ва Нигора Эримбетоваларнинг турмуш қурганларига 20 йил тўлган кун экан. Шу муносабат билан фарзандлари “сюрприз” тайёрлашган: дастурхон тузаб, ота-онасининг суратларини қўйдириб, никоҳ узуги рамзи, "20 йил" деган ёзуви билан торт буюртма қилишган. Тантанага яқинлар ҳам таклиф этилибди. Ҳамма тантана сабабчилари ишдан қайтишини кутиб ўтирса, фақат улардан бири – она кириб келибди. Ота эса навбатчиликда қолган. Шунда қизи унга йиғлаб қўнғироқ қилганида уйига касби тақозосига кўра боролмаганидан афсусланган экан.

Икром Сарибоев ва Нигора Эримбетоваларнинг фарзандлари ҳам вояга етиб, ҳаётда ўз йўналишларини танлаб олишган. Шаҳзод бўлғуси архитектор, бу йил охирги босқич талаба, Исломбек ветеринар бўлиб ишлаяпти, Шоира НДПИ талабаси, Илҳом – 11 синф ўқувчиси.

Уларнинг оиласи турмуш тарзига назар солган одам ҳавас қилиши тайин. Чиндан-да, ўз қўрғонинг, оиланг, ҳаётингни давом эттирувчиларинг бўлса, кимларгадир кераклигингни ҳис қилиб яшасанг, хизматингдан одамлар миннатдор бўлса, бу улкан бахт!

И.Сарибоев ана шундай мартабага эришган шифокор. Уни касб байрами билан қутлаб, келгуси ишларида ҳам муваффақиятлар тилаймиз.

Ойгул РАЖАБОВА.