ҚАРОР МАЗМУН-МОҲИЯТИНИ ТАРҒИБ ЭТИШГА БАҒИШЛАНГАН ЙИҒИЛИШ ЎТКАЗИЛДИ

Ўзбекистон Республикаси Президентинининг жорий йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги Қарорига мувофиқ Амударё туманида амалга ошириладиган ишлар режаси тасдиқланган эди.

Ушбу мақсадлар учун туманимиз бўйича 22 миллиард 209 миллион сўм пул маблағ ажратилиши белгиланган ва овул ва маҳаллалар ҳудудларидаги мавжуд муаммоларни бартараф этиш режалаштирилган. Хусусан, туман ҳудудидаги 19 та овул ва маҳаллалардаги жами 50,4 километр ички йўлларни таъмирлаш, ичимлик суви таъминотини яхшилаш мақсадида икки маҳаллага сув тозалаш иншоотини қуриш, электр энергияси таъминотини яхшилаш, болалар спорт майдончасини ва иккита маҳалланинг маъмурий биноларини янгидан қуриш режалаштирилган.

21 ноябрь куни туман ҳокимлиги мажлислар хонасида ушбу қарор аҳамиятини кенг жамоатчиликка етказиш мақсадида йиғилиш ўтказилди.

Йиғилишда Олий Мажлис Сенати аъзоси Улуғбек Жалменов, Қорақалпоғистон Республикаси Жўқорғи Кенгеси депутатлари, туман Кенгаши депутатлари, ҳокимлик масъул ходимлари, корхона, ташкилотлар раҳбарлари иштирок этдилар.

Йиғилишда Олий Мажлис Сенати аъзоси Улуғбек Жалменов Президентнинг юқорида қайд этилган қарорида ҳудудларни обод қилиш, овул ва маҳаллаларда инфратузилма билан боғлиқ энг долзарб масалаларни тизимли ҳал этиш, хусусан, жойларда ички йўллар, ичимлик суви, электр энергияси, газ таъминотини, таълим, соғлиқни сақлаш, маданият спорт ва бошқа инфратузилма объектларини яхшилаш, шу асосда аҳоли учун муносиб турмуш шароитларини яратиш мақсад қилинганини таъкидлаб ўтди. Бунинг учун Қорақалпоғистон Республикаси, вилоятлар, Тошкент шаҳри бўйича ҳудудий ишчи гуруҳлар ташкил этилиб, улар томонидан республика бўйича 9370 та маҳаллада аҳолининг турмуш даражасига бевосита таъсир кўрсатувчи энг долзарб масалалар ўрганилган. Шу асосда 2022-2032 йилларда маҳаллалар инфратузилмасини ривожлантириш бўйича лойиҳалар дастурлари ишлаб чиқилган.

Қайд этиш жоизки, туманимизда ҳам қарорга мувофиқ амалга ошириладиган лойиҳалар белгиланиб, бугунги кунда лойиҳалар тендер савдоларига қўйилган. Жараён декабрь ойида якунланади ва амалий ишлар бошланади. Бу бўйича туман ҳокими, секторлар раҳбарлари ва бошқа масъуллар ҳудудлар аҳолиси билан учрашувлар ўтказиб, амалга ошириладиган ишларни кенг тушунтирмоқдалар. Тегишли мутасаддилар ҳар ҳафтада жойларга чиққан ҳолда маҳаллаларда амалга оширилаётган ишлар ўз вақтида ва самарали ташкил қилинишини назоратга олиб, долзарб муаммолар ҳал этилаётганлиги юзасидан аҳолига батафсил тушунтириш ва ташвиқот ишларини ташкил этиб борадалар. Ҳудудлар инфратузилмасини ривожлантириш бўйича лойиҳаларни амалга оширишда ажратилган маблағларнинг мақсадли сарфланиши, қурилиш, таъмирлаш ишларининг сифатли адо этилиши депутатлар ва кенг жамоатчилик томонидан ҳам қатъий назорат қилиб борилади.

Йиғилиш иштирокчиларига туман миқёсида мазкур қарорга мувофиқ амалга ошириладиган ишлар кўлами бўйича тўлиқ маълумотлар берилди. Президентимизнинг “2022-2023 йилларда маҳаллалар инфраструктурасини янада яхшилаш бўйича қўшимча чора-тадбирлар тўғрисида”ги Қарорининг ижроси бўйича қилинадиган ишлар туманимиз аҳолиси турмуши сифатини, фаровонлигини янада оширишга хизмат қилади.

Ойгул РАЖАБОВА.