МАНҒИТ ШАҲРИДА ЯНГИ “BRIGHTON SCHOOL” ЎҚУВ МАРКАЗИ БИНОСИ ФОЙДАЛАНИШГА ТОПШИРИЛДИ

Амударё туманининг Олмазор маҳалласида ташкил этилган инглиз ва рус тилларини ўргатишга ихтисослашган “BRIGHTON SCHOOL” ўқув марказининг очилиш маросими бўлиб ўтди.

2022 йил 31 декабрь куни бўлиб ўтган ушбу маросимга ташриф буюрган меҳмонлар карнай-сурнай садолари остида кутиб олинди. Замонавий кўринишда барпо этилган ва байрамона безатилган марказ биноси олдида ўтказилган тадбирда туман ҳокими Султонбой Йўлдашев, Халқ таълими бўлими бошлиғининг ўринбосари Ибрагим Ражабов, “BRIGHTON SCHOOL” ўқув маркази раҳбари Нурбек Жуманиёзов, 40-сонли мактаб директори Санобар Хўжамуродова, “AMU KIDS” ўқув маркази раҳбари Орзигул Ибрагимовалар иштирок этишди. Ундан ташқари, очилиш маросимида Олмазор маҳалла фуқаролар йиғини масъуллари, фаоллари ва тадбиркорнинг оила аъзолари ҳам қатнашишди.

Тадбирда сўзга чиққан туман ҳокими Султонбой Йўлдашев мамлакатимизда хорижий тилларни ўқитишга, мутахассислар тайёрлашга қаратилаётган эътибор ҳақида сўз юритди. Бугунги кунда кўплаб ёшлар муайян мутахассислик бўйича таълим олиш билан бирга чет тилларини ҳам пухта ўрганаётгани, бунинг натижасида дунё кезаётганини айтиб, ёшларни яратилаётган бундай имкониятдан оқилона фойдаланишга чорлади.

Шунингдек, тадбир давомида сўзга чиққан 40-сонли мактаб директори Санобар Хўжамуродова ва бошқалар марказ раҳбари, малакали инглиз тили фани ўқитувчиси Нурбек Жуманиёзовнинг соҳадаги фидойилиги, изланувчанлиги, ўқувчиларнинг хорижий тилларни ўрганишларига салмоқли ҳисса қўшаётгани, ёш бўлишига қарамасдан кўплаб шогирдлар етиштиргани, бугунги кунда ундан таълим олган ёшларнинг турли нуфузли олий ўқув юртлари талабалари бўлишганини ҳам тилга олиб ўтдилар.

Нурбек Жуманиёзов олий тоифали ўқитувчи. У СЕFR бўйича B2 ва C1 даражадаги сертификатлар соҳиби. Яқинда Халқ таълими вазири жамғармасидан устама олиш учун ўтказиладиган синов жараёнларида муваффақиятли иштирок этиб, 100 баллик натижани қўлга киритди ва 100 фоиз устамага эга бўлди. Ёш ўқитувчи ҳозирги кунда 40-сонли мактабда инглиз тили фанидан дарс бериб келмоқда. Ўтган ўқув йилида у таълим берган вариатив синф ўқувчиларининг 93 фоизи олий таълим муассасаларига ўқишга қабул қилинди. Таълим соҳасидаги фидойиликлари учун Жўқорғи Кенгес Президиумининг қарорига мувофиқ “WATAN PIDAYISI” кўкрак нишони билан тақдирланди.

Туманимиз ёшларининг хорижий тилларни ўрганишлари учун имконият яратиш мақсадида “BRIGHTON SCHOOL” масъулияти чекланган жамиятига қарашли ўқув марказини ташкил қилган Нурбек Жуманиёзов ушбу марказ биноси қурилиши ва жиҳозланишига кредит маблағларидан 200 млн. сўм, ўз ҳисобидан 1 млрд. сўмга яқин маблағ сарф этди.

Замонавий кўринишдаги мазкур ўқув маркази 1,5 мингдан ортиқ абитуриентга инглиз ва рус тилларини ўқитишга мўлжалланган. Ушбу ўқув маркази ҳар куни уч навбатда фаолият олиб боради. Унда 10 дан ортиқ малакали тил мутахассислари ҳамда фан ўқитувчилари абитуриентларга сабоқ беради. Мазкур тил ўқитиш марказида ўқувчи-ёшларни IELTS ва SEFR халқаро ҳамда миллий сертификатларга ўқитиш курслари ҳам йўлга қўйилади.

Марказнинг фойдаланишга топширилиши муносабати билан ўтказилган тадбирда лента кесиш маросимидан сўнг, меҳмонлар бинода яратилган шароитлар билан танишиб чиқдилар. Икки қаватли қилиб қурилган мазкур бинода ўқув машғулотлари учун 6 та синфхона, 1 та маърузалар хонаси, ўқитувчилар, менежерлар, дам олиш ва кутиш хоналари мавжуд. Кутубхона, қабулхона ва ошхоналарга ҳам хоналар ажратилган. Марказда абитуриентлар учун барча қулайликлар яратилган. Замонавий жиҳозлар, компьютер, проектор, интерактив доска, аудио техникалар билан таъминланган.

Ушбу ўқув маркази ишга туширилиши натижасида 10 нафар инглиз ва рус тили фани ўқитувчилари, 5 нафар техник ходимлари учун янгидан иш ўрни яратилади. Ўқув марказида асосан замонавий педагогик, инновацион усулларда машғулотлар ташкил этилиб, ёшларда инглиз тилида гапириш кўникмаси шакллантирилади. Қисқа фурсат мобайнида инглиз ва рус тилларида ўз она тилидек сўзлашишларига, грамматикасини ўзлаштиришларига ёрдам берилади. Ундан ташқари, бошланғич синф ўқувчилари учун ҳам инглиз тилини мукаммал ўргатишга мўлжалланган машғулотларни йўлга қўйиш режалаштирилган.

Эндиликда туманимизда янги ташкил этилган “BRIGHTON SCHOOL” ўқув маркази ёшларнинг хорижий тилларни мукаммал ўрганишлари ва нуфузли олийгоҳлар талабалари сафидан жой олишларига имконият яратиб, келажак эгаларининг комил инсонлар бўлиб вояга етишларига хизмат қилади.

Озода Худойберганова.