Чойкўл овулида ёшлар билан учрашув ўтказилди
Жамиятнинг энг катта таъсирчан кучи сифатида бугун юртимиз ёшлари давлатимизда олиб борилаётган кенг ислоҳотлар жараёнида фаол иштирок этишмоқда, Ватанимиз тараққиётини таъминлаш йўлида ўз ғоя ва таклифлари билан майдонга чиқмоқда.
Шу боисдан айтиш лозимки, ёшларнинг интилишлари ва ҳаётий мақсадлари ҳар қандай соҳа ривожида катта асос бўлиб хизмат қилиши, шубҳасиз.
5 январь куни Амударё туманининг Чойкўл овул фуқаролар йиғини биносида бўлиб ўтган учрашувда ёшлар бандлигини таъминлаш, бўш вақтларини мазмунли ташкил этиш чора-тадбирлари ҳамда айни масалаларнинг энг муҳим жиҳатларига атрофлича тўхталиб ўтилди.
Учрашувда туман Халқ қабулхонаси бўлими мудири Эркин Ражабов, туман ҳокими ўринбосари Маҳмуд Шерметов тегишли корхона-ташкилот масъуллари ва 30 га яқин фаол ёшлар иштирок этишди.
Учрашувда туман ҳокими ўринбосари Маҳмуд Шерметов ёшлар бандлиги ва бу орқали уларнинг даромад топишларини таъминлаш борасида сўнгги йилларда амалга оширилаётган катта ижобий ўзгаришларга тўхталиб ўтди. Шунингдек, жойлардаги ёшлар муаммолари ва таклифларини ўрганишда ишни аввало, маҳалладан бошлаш ва ёшларнинг касбий қизиқишлари ва келажак режаларини аниқлашда маҳалла институтининг аҳамияти катта эканлигини таъкидлади. Бунда энг муҳим масала сифатида маҳалла ходимлари тегишли мутасадди ташкилотлар билан ҳамкорликда ёшлар масалаларига “фуқаробай” ёндашишлари лозимлигини айтиб ўтди.
Шундан сўнг, ёшлардан турли мазмундаги мурожаатлар келиб тушди. Маҳалланинг фаол ёшларидан бири Иқбол Отамурадов пайвандлаш устаси соҳаси бўйича касбга ўқиш истаги борлигини ҳамда махсус сертификатни қўлга киритиб, пайвандлаш устахонаси очиш ниятида эканлигини билдириб бу масалада туман ҳоким ўринбосаридан маслаҳат сўради. Олий таълим муассасаси битирувчиси Акбар Отамурадов эса бандлик масаласида мурожаат қилди.
Шунингдек, сартарошлик касбини пухта эгаллаб ўз маҳалласида сартарошхона очиб тадбиркорлик фаолиятини йўлга қўйган Нурбек Одилов замонавий сартарошлик асбоб учкуналарини харид қилиш учун имтиёзли кредит олишда амалий ёрдам сўради.
Ундан ташқари, Гулуруҳ Саъдуллаева Олий таълим муассасаси талабаси эканлигини ҳамда оилавий шароити сабаб контракт тўловини тўлашга қийналаётганлигини айтиб, амалий ёрдам сўраган бўлса, Фазилат Янгибаева тикувчилик касбини пухта ўзлаштиргани, эндиликда тикувчилик билан шуғулланиш нияти борлигини айтиб, замонавий русумдаги тикув машинасини олиш учун субсидия ажратилишида амалий ёрдам сўради.
Ёшлар томонидан билдирилган мурожаатларни туман ҳокими ўринбосари ўз назоратига олди ва тез орада ижобий ҳал қилинишига келишиб олинди. Учрашувда ёшларнинг бўш вақтларини мазмунли ташкил этиш, уларнинг ижодий қобилиятларини юзага чиқариш учун зарур шароитлар яратиб бериш бўйича ҳам муҳим фикрлар билдириб ўтилди.
Албатта, ёшлар Ватанимизнинг эртанги умидлари, келажагимиз давомчиларидир. Шу маънода уларнинг орзу-интилишлари ва ҳаётий мақсадларини амалга ошириш, мустаҳкам қанот бўлиш бугунги кундаги катта ва ҳаётий мақсадга айланмоғи лозим.
Туман ҳокими ўринбосарининг ёшлар билан учрашуви ҳам айни шу мақсадларга қаратилгани билан аҳамиятлидир.
Туман ҳокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
