Амударё туманида Ватан ҳимоячилари куни кенг тарзда нишонланди

Ватан ҳимоячилари куни ва Ўзбекистон Республикаси қуролли кучлари ташкил этилганининг 31 йилллик байрами мамлакатимизнинг барча ҳудудлари бўлгани сингари Амударё туманида ҳам кенг тарзда нишонланди. 13 январь куни туман Маданият бўлими биносида Ватан посбонлари шарафига байрам тадбири ташкил этилди.

Тадбирда туман ҳокими Султонбой Йўлдашев, секторлар раҳбарлари, Мудофаа ишлари бўлими, ҳарбий қисмлар масъуллари, мактаблардаги ҳарбий чақириққа тайёргарлик раҳбарлари, ҳарбий хизматчилар ва аскар оналари, ёшлар ҳамда кенг жамоатчилик вакиллари иштирок этишди.

Тадбир аввалида Ўзбекистон ва Қорақалпоғистон Республикаларининг мадҳиялари янгради. Саҳнадаги мониторда Ўзбекистон Республикаси Қуролли Кучларининг фаолияти, зобит ва аскарларнинг юртимиз сарҳадларини қўриқлаш жараёнидаги жасорат ва қаҳрамонликлари акс эттирилди.

Шундан сўнг, туман ҳокими Султонбой Йўлдашев сўзга чиқиб, Ватан ҳимоячиларини байрам билан табриклади. Туман ҳокими ўз нутқида юртимизда офицерлар ва сержант кадрларни тайёрлаш ҳамда малакасини оширишнинг замонавий талабларга жавоб берадиган самарали тизими яратилганини, ҳарбий хизматни ўзининг касби, Ватан ва халқ олдидаги муқаддас бурчи деб билган ўғлонларимизни шарафлаш, уларга эҳтиром кўрсатиш барча учун ҳам қарз, ҳам фарз эканлигини таъкидлаб ўтди. Қолаверса, ёшларни узлуксиз ҳарбий таълимга жалб қилиш борасида тизимли ишлар йўлга қўйилгани, биргина 2022 йилда 9 нафар туманимиз ёшлари Олий ҳарбий таълим муассасаларига, 8 нафар ёшларимиз эса “Темурбеклар мактаби” ҳарбий-академик лицейларига ўқишга қабул қилингани эътироф этилиб, улар ҳам келгусида энг намунали Ватан ҳимоячилари бўлиб етишишларига ишонч билдирилди.

Тантанали байрам тадбирида туман Мудофаа ишлари бўлимига ҳамда туманимиз ҳудудидаги Давлат хавфсизлик хизмати Чегара қўшинлари ҳарбий қисмларида хизмат бурчини ўтаётган Миллий Армия зобитларига, ҳарбий ҳизматчиларга Амударё тумани ҳокимининг ташаккурномалари тақдим этилиб, эсдалик совғалари топширилди.

Тадбирда Амударё тумани Мудофаа ишлари бўлими бошлиғи Шерзод Мурадов ҳамда намунали аскар Отабек Маҳмудовлар сўзга чиқиб, мустақиллик йилларида юртимизда давом этаётган моддий ва маънавий тараққиёт асосида тинчликни сақлаш, иқтисодиётни ривожлантириш ва халқимиз турмуш даражасини янада юксалтириш борасида улкан натижаларга эришилгани ва бу тараққиётнинг бирдан-бир омили – Ватандаги барқарор тинчлик эканлигини таъкидлаб, тинчлик ҳимоячилари, она Ватан посбонларининг беқиёс катта хизмати, матонат ва жасоратини алоҳида эътироф этишди.

Оддий аскар Отабек Маҳмудов Ўзбекистон Республикаси Армияси сафида хизмат қилиш ўзи ва сафдошлари учун улкан шараф эканлигини, она ватан сарҳадларини қўриқлаш, уни ҳар қандай ёвуз кучлардан ҳимоя қилиш ҳар бир ўғлоннинг муқаддас бурчи эканлигини таъкидлади.

Байрам тадбирининг расмий тантанали қисмидан сўнг, туман маданият бўлими санъаткорлари томонидан тайёрланган катта концерт дастури намойиш этилди.

Санъаткорларнинг чиқишидан олдин тинчлик, осойишталик посбонлари – Ватан ҳимоячиларини шарафловчи шеърлар ўқилди. Дилрабо куй-қўшиқлар янграб, жозибали рақслар ижро этилди.

Тадбирда туман Маданият бўлими санъаткорлари томонидан ижро этилган “Ватан посбонлари” қўшиғи барчанниг қалбида Ватанпарварлик туйғуларини янада жўшқинлантирди.

Туман ҳокимлигининг Ахборот хизмати.