ДАРЁБЎЙИ МАҲАЛЛАСИДА ҲОКИМ ВА ЁШЛАР УЧРАШУВИ САМИМИЙ МУЛОҚОТ ТАРЗИДА ЎТДИ

Бугунги ёшлар – мамлакат иқтисодиёти, сиёсий-маънавий, ижтимоий ва маданий ҳаётининг эртанги кунги қудратли локомативларидир. Бу ҳақда Президентимиз ҳар галги учрашувларида ҳам фахр, ҳам ишонч билан таъкидлашлари бежиз эмас. Шу боис, мамлакатимизда ёшларнинг билим олишлари, ўз қобилият ва иқтидорларини амалда намоён этишлари учун барча зарур шароитлар, имкониятлар яратилган.

Мамлакат раҳбаридан тортиб, қуйи бўғин раҳбарларигача ёшлар ҳаётига оид муаммоларни ўрганиш, мавжуд муаммоларни жойларига чиққан ҳолда ижобий ҳал этишга кўмаклашиш мақсадида ўтказилаётган ёшлар билан учрашувлар, давра суҳбатлари самимий мулоқот майдонига айланмоқда.

Жорий йилнинг 2 февраль санасида бўлиб ўтган Амударё тумани ҳокими Султонбой Йўлдашев билан Дарёбўйи маҳалласи ёшларининг учрашуви ҳам шаффофлик, ошкоролик ва самимий мулоқот руҳида ўтди.

Ҳоким ва ёшлар учрашувида Амударё тумани ҳокими Султонбой Йўлдашев, туман ҳокимнинг соҳалар бўйича ўринбосарлари, Ёшлар агентлиги мутахассислари, Дарёбўйи маҳалла фуқаролар йиғини ҳамда ҳудуддаги идора ва ташкилотлар раҳбарлари, маҳалла фаоллари ҳамда ёшлар, ОАВ вакиллари иштирок этдилар.

Учрашувда туман ҳокими Султонбой Йўлдошев мамлакатимизда, шу жумладан туманимизда ёшларнинг интиллектуал салоҳиятини юксалтириш, ёшлар тадбиркорлигини ривожлантириш орқали иш билан бандлигини таъминлаш, «бир нуронийга ўн ёш» тамойили асосида ёшлар ҳаётига доир муаммоларни ҳал этишга қаратилган чора-тадбирлар, яратилаётган шарт-шароитлар хусусида тўхталиб, Арна бўйи маҳалласи ҳудудида истиқомат қилувчи ёшлар орасидан етишиб чиқаётган тадбиркорлар, фермер хўжаликлари раҳбарлари, нуфузли олий таълим даргоҳлари талабалари ҳақида фахрланиб сўз юритди.

Ҳоким ёшлар билан учрашув давомида ҳудуддаги муаммоли ёшларнинг мурожаатлари билан яқиндан танишиб, улар билан самимий мулоқотда бўлди. Хусусан, 1995 йилда туғилган Сирожиддин Аметов ўзини-ўзи банд қилиш тамойили асосида тадбиркорлик билан шуғулланиш истагида эканлигини билдириб, бунинг учун имтиёзли кредит маблағи олишда ёрдам сўраб мурожаат қилди. Унинг мурожаати жойида ўрганилиб, маҳаллада фаолият олиб борувчи ҳоким ёрдамчисининг кўмаги билан амалий ёрдам кўрсатиш чоралари кўрилди.

Шунингдек, 2002 йилда туғилган Руслан Алимбоевнинг мурожаати ҳам ижобий ечим топди. ОТМ талабаси бўлган Руслан Алимбоевга тўлов-шартнома бўйича маблағининг бир қисмини тўлаб беришда амалий ёрдам кўрсатиладиган бўлди.

Маҳаллада истиқомат қилувчи, 1995 йилда туғилган Ислом Ўрозбоевнинг тоза ичимлик суви иншооти жойлашган ҳудуддан анча олисда яшашини, шу боис, оила аъзоларининг тоза ичимлик суви билан таъминланишида муаммо борлигини, бу масалада ёрдамга муҳтож эканлигини билдириб қилган мурожаати ҳам туман ҳокимининг топшириғи ва маҳаллада фаолият олиб борувчи ҳоким ёрдамчисининг амалий ёрдами билан сувни тозалаш ускунаси олиб бериш орқали ижобий ҳал этилди.

Дарёбўйи маҳалла фуқаролар йиғинида бўлиб ўтган ҳоким ва ёшлар учрашуви давомида маҳалла ёшлари мамлакатимизда, хусусан, туманимизда ҳам ёшлар ҳаётига оид муаммоли масалалар доимий назоратга олиниб, ижобий ечим топаётганидан мамнун эканликларини билдирдилар.

Робия ЙЎЛДОШЕВА.