Конституциявий Қонун лойиҳаси тарғиботига бағишланган тадбир бўлиб ўтди

Мамлакатимизнинг ижтимоий-сиёсий ҳаётидаги муҳим воқеа – умумхалқ Референдумига ҳам саноқли кунлар қолмоқда. 30 апрель куни “Ўзбекистон Республикаси Конституцияси тўғрисида”ги Ўзбекистон Республикаси Конституциявий Қонуни умумхалқ референдумида овозга қўйилади. Мана шу муҳим жараённинг аҳамияти ва янги таҳрирдаги Конституция лойиҳасининг мазмун-моҳиятини аҳолига кенг тарзда тушунтириш мақсадида тарғибот тадбирлари олиб борилмоқда.

Яқинда Олий Мажлис Қонунчилик палатаси депутати Зумрад Бекатова ҳамда республика тарғибот гуруҳи азолари Амударё туманининг Амур Темур номли овул фуқаролар йиғинида аҳоли билан учрашув ўтказдилар. Учрашувда Конституциявий Қонун лойиҳасини кўп миллатли халқимизнинг таклифлари асосида шакллантирилгани, умумхалқ муҳокамасида келиб тушган таклифларнинг 60 фоиздан ортиғи бевосита ёшлар томонидан билдирилгани алоҳида таъкидланди.

Амалдаги қонунчиликка кўра, парламентнинг ўзи ҳам Конституцияга ўзгартиш киритиш ваколатига эга эканлигини, лекин конституциявий ислоҳот фуқаролар фикри ва қўллаб-қувватлаши асосида референдум орқали амалга оширилса, ҳақиқий халқ Конституцияси бўлиши эътироф этилди.

Барчага маълумки, 2021 йил 6 ноябрь куни Ўзбекистон Республикаси Президентининг ўз лавозимига киришишига бағишланган тантанали маросимдаги нутқида сенатор ва депутатлар, кенг жамоатчилик, халқ билан маслаҳат қилиб, жаҳон конституциявий тажрибасини ўрганиб, пухта ўйлаган ҳолда бугунги ва келгуси тараққиётимизни белгилаб берадиган асосий қонунимизни такомиллаштириш масаласини кўриб чиқиш кераклигини таъкидлаган эди.

Орадан бир ярим йилга яқин вақт ўтди. Мазкур муддат давомида Олий Мажлис палаталари кенгашларининг қўшма қарорига мувофиқ, Ўзбекистон Республикаси Конституциясига ўзгартиш ва қўшимчалар киритиш юзасидан таклифларни шакллантириш ва ташкилий чора-тадбирларни амалга ошириш бўйича Конституциявий комиссия тузилди.

 Мутасаддилар томонидан “Менинг Конституциям” онлайн платформаси, call-марказ, почта, жумладан, электрон почта ҳамда телеграм махсус боти орқали таклиф ва мулоҳазалар юбориш учун барча имкониятлар яратилди.

Янги таҳрирдаги Конституциявий Қонун лойиҳасига бағишланган тарғибот тадбирида сўзга чиққан Олий Мажлис Қонунчилик палатаси депутати Зумрад Бекатова янгиланаётган Конституциянинг мазмун-моҳиятига тўхталар экан, кейинги йилларда мамлакатимизда аҳолининг турмуш шароитларини тубдан яхшилаш, ижтимоий муаммоларни адолатли ҳал этиш, айниқса, инсонни эъзозлаш, унинг ҳуқуқ ва эркинликларини таъминлашга қаратилган изчил ислоҳотлар амалга оширилаётганини таъкидлади. Янгиланаётган Конституцияда ҳам жамиятнинг барча қатламлари манфаатлари инобатга олингани, яъни энг аввало инсон манфаатини ҳар нарсадан устун қўйишни мақсад қилингани айтиб ўтилди.

Жумладан, Бош қомусимизда ҳеч ким суднинг қарорисиз ва қонунга зид тарзда уй-жойидан маҳрум этилиши мумкин эмаслиги, уй-жойидан маҳрум этилган мулкдорга уй-жойнинг қиймати ҳамда у кўрган зарарнинг ўрни қонунда назарда тутилган ҳолларда ҳамда бозор қийматида қопланиши кафолатланмоқда.

Шу билан бирга, ҳар кимнинг меҳнати учун ҳеч қандай камситишларсиз ҳамда меҳнатга ҳақ тўлашнинг белгиланган энг кам миқдоридан кам бўлмаган тарзда адолатли ҳақ олиш ҳуқуқи мустаҳкамланмоқда.

Мазкур норманинг Конституцияда белгиланиши фуқароларнинг иш ҳақлари миқдори шунчаки эмас, айнан уларнинг муносиб турмуш кечиришини таъминлашда, пировард натижада аҳоли турмуш даражасини яхшилаш ва мамлакатимизда ижтимоий адолатни устувор қадриятга айлантиришда муҳим аҳамиятга эга бўлади.

 Тадбир иштирокчилари Бош Қонунимизда ҳар бир шахс ўз ҳимояси ва манфаатини кўраётганлигини айтиб, унинг мамлакатимиз изчил ривожланишида тарихий аҳамият касб этишини билдирдилар.

Туман ҳокимлигининг Ахборот хизмати.