“AMUDARYOTEX” ХОРИЖИЙ КОРХОНАСИДА МАХСУС-ТАКТИК ЎҚУВ МАШҚИ ЎТКАЗИЛДИ

Қорақалпоғистон Республикаси Вазирлар Кенгашининг Раиси - Фуқаро муҳофазаси бошлиғининг 2023 йил 9 январдаги 1-сонли буйруғи ҳамда Aмударё тумани ҳокими - Фуқаро муҳофазаси бошлиғининг 2023 йил 12 январдаги 1-сонли буйруғининг 3-иловасига мувофиқ тасдиқланган махсус-тактик ўқув машқи режасининг ижросини таъминлаш мақсадида, туман ҳудудидаги “Amudaryotex” хорижий корхонаси масъулияти чекланган жамиятида жорий йилнинг 12 апрель куни “Иқтисодиёт объектида юзага келиши мумкин бўлган фавқулодда вазиятларда фуқаро муҳофазаси тузилмаси ва объект раҳбариятининг ҳаракатлари” мавзусида махсус-тактик ўқув машқи ўтказилди.

Ўқув машқига, объектнинг фуқаро муҳофазаси тузилмаси ходимлари, Фавқулодда вазиятларнинг олдини олиш ва уларни бартараф этиш давлат тизими Aмударё тумани бўғинига кирувчи идора, корхона ва ташкилотларнинг масъул ходимлари иштирок этишди. Ўтказилган махсус-тактик ўқув машқини туман Фавқулодда вазиятлар бўлими бошлиғи ўринбосари, майор Саламат Бердекеев ва бўлинма бошлиғи, капитан Бекзод Тажибаевлар олиб бордилар.

Ўқув машқини ўтказишдан мақсад табиий ва техноген тусдаги фавқулодда вазиятлар юзага келганда иқтисодиёт объекти раҳбарлар таркиби ҳамда фуқаро муҳофазаси шахсий таркибининг тўғри ҳаракат қилиш кўникмаларини такомиллаштириш, бошқарув органи ва фуқаро муҳофазаси шахсий таркибини кечиктириб бўлмайдиган авария ва қутқарув ишларига тайёргарлигини кучайтириш, фавқулодда вазиятлар юзага келганда фуқаро муҳофазаси шахсий таркибининг ўз мажбуриятларини аниқ ва тўғри бажаришини амалиётда синаш ва ўрганиш, туман фуқаро муҳофазаси хизматларининг ҳамкорликдаги ҳаракатларини такомиллаштиришдан иборат.

Унга кўра, 1-босқич “Объектда юзага келиши мумкин бўлган фавқулодда вазиятларда фуқаро муҳофазаси тузилмаси ва объект раҳбариятининг ҳаракатлари” мавзусида ўқув машқининг назарий қисми ҳамда саф кўриги объект фуқаро муҳофазаси тузилмаси ва туман ФВДқТ хизматлари бошлиқлари билан ўтказилди.

Махсус-тактик ўқув машқининг 2-босқичи объектда зилзила натижасида авариялар содир бўлиб, вайроналар остида қолган жабрланганларни қутқариш ва объект фуқаро муҳофазаси тузилмаси томонидан биринчи тиббий ёрдам кўрсатилиши, ёнғин содир бўлганда ёнғин ўчириш гуруҳининг биринчи ҳаракатлари ва туман Ёнғин-қутқарув қисмларининг фавқулодда вазият содир бўлганда жабрланганларни қутқариш ва биринчи тиббий ёрдам кўрсатишлари, ёнғин ўчириш воситалари билан ёнғин оқибатларини бартараф этиш ишларини бажариш ҳамда объектда ҳуқуқбузарлик содир этилишининг олдини олиш ҳамда уларни ўз вақтида бартараф этишда Миллий гвардия Қўриқлаш бўлимининг ҳаракатлари амалда кўрсатиб берилди.

Махсус-тактик ўқув машқи жараёнига « Amudaryotex» Хорижий корхонаси Масъулияти чекланган жамияти раҳбарлар таркиби ва объект фуқаро муҳофазаси тузилмасидан 22 нафар, Миллий гвардия ходимларидан 6 нафар ходим ва 2 та техника, туман Ички ишлар бўлимидан 3 нафар ходим ва 1 та техника, туман Фавқулодда вазиятлар бўлимидан 7 нафар ходим ва 2 та махсус техника, Тез тиббий ёрдам хизматидан 3 нафар ходим ва 1 та махсус техника, туман Санитория эпидемиология осойишталик ва жамоат саломатлиги бўлимидан 7 нафар ходим ва 1 та махсус техника, электр тармоқлари корхонасидан 4 нафар ходим ва 1 та техника, “Aмударётумангаз” газ таъминоти бўлимидан 6 нафар ходим ва 1 та техника, экология ва атроф-муҳитни муҳофаза қилиш инспекцияси ва Тоза ҳудуд Давлат унитар корхонасидан 2 нафар ходим, Телекоммуникация тармоғидан 3 нафар ходим, Сув таъминоти масъулияти чекланган жамиятидан 3 нафар ходим ва 1 та техника, Ободонлаштириш бошқармасидан 4 нафар ходим ва 1 та махсус техника, Дўстлик ва Янгиобод МФЙ ҳамда объект атрофидаги аҳолидан 20 нафар киши, жами 90 нафар киши ва 11 та махсус техникалар жалб қилинди.

Махсус-тактик ўқув машқи якунига кўра, «Aмударётех» хорижий корхона масъулияти чекланган жамияти раҳбарлари таркиби ва фуқаро муҳофазаси тузилмалари шахсий таркиби фавқулодда вазиятларда ҳаракат қилишга «Чекланган тайёр», деб баҳоланди ва масъуллар томонидан иштирокчиларнинг камчиликлари кўрсатилиб, келгусида бундай камчиликларга йўл қўймасликлари тўғрисида тушунчалар берилди.

Х.МАТЯКУБОВ, Aмударё тумани ФВБ бошлиғи, подполковник.