ТЎЛҚИН ОВУЛИ ДЕҲҚОНЛАРИ ҒЎЗА ПАРВАРИШИНИ АВЖ ОЛДИРМОҚДАЛАР

Ғўза – мамлакатимизда узоқ йиллардан бери экиладиган асосий экинлардан бири. Ўзбекистон айни кунда ҳам пахта етиштиришда дунёда етакчи давлатлардан бири ҳисобланади. Бу меҳрталаб, парваришталаб экинни етиштириш яқин-яқингача машаққатли соҳа ҳисобланиб келинган. Аммо ҳозирги кунда илм-фан ютуқларига асосланган, кам харажат сарфлаб, тола сифати ва ҳосилдорлиги юқори, эртапишар, касаллик ва зараркунанда ҳашаротларга чидамли, табиат инжичликларига бардошли ғўза навлари етиштирилиб экилаётгани, соҳадаги кўпгина ишлар техника зиммасига юкланаётгани деҳқонларга чинакам енгиллик яратаётир. Ғўза парваришидаги агротехнологик тадбирларнинг ўз вақтида сифатли адо этилиши кузги мўл ҳосилга замин ҳозирлайди.

Шуниси эътиборлики, кейинги йилларда чигит экиладиган далалар кўп йиллик бегона ўтлардан тозаланиб, лазер текислагич ёрдамида текисланиб экишга сифатли тайёрланмоқда. Бу экилган уруғнинг текис униб чиқишига, яхши ривожланишига замин бўлади.

Амударё туманининг Тўлқин овулида пахтачилик билан шуғулланаётган фермер хўжаликларида мўл ҳосил етиштиришнинг барча чора-тадбирлари амалга ошириб келинаётгани боис, ҳар йили мўл даромад олинаяпти. Айни кунда овулдаги барча пахта далаларда сифатли экилган чигитлар униб чиқиб, яшил қаторлар ҳосил қилди. Ғўза ниҳолларини парваришлаш ишлари ўз вақтида адо этилаётир. Ғўза яганаси сифатли тамомланди, илк ишлов бериш, яъни культивациялаш ҳам якунланиш арафасида.

Бу тадбирлар айниқса Сардор Матназаров раҳбарлик қилаётган “Матназаров Содиқбек” фермер хўжалигида сифатли олиб борилди. Ягана қилинган, культивация қилиниб, таги юмшатилиб, озиқлантирилган ғўза ниҳоллари дуркун ривожланмоқда.

Ушбу хўжаликнинг 81 гектар пахта майдонига жорий йилда эртапишар, тупроқ-иқлим шароитига мос “Султон” нави экилди. Ерларни экишга тайёрлашдан тортиб, экиш ишлари ҳам хўжаликнинг ўз техникалари ёрдамида адо этилди. Механизаторлар Отажон Солиев, Олим Солиев, Даврон Отажонов, Жамшид Тўрабоевлар бу ишларда жонбозлик кўрсатиб ишладилар.

Шу кунгача барча майдонларга экилган чигитлар бир текис униб чиқди ва сифатли ягана қилинди. Ғўза қатор ораларини культивациялаш ишлари ҳам поёнига етай деб турибди.

Хўжаликда пахтадан ташқари 23 гектар буғдой, 2 гектар боғ, 1 гектар картошка, 1 гектар қовун-тарвуз экилган. Жами экин майдонлари 73 нафар пудратчиларга бўлиб берилган. Улар ўзларига бириктирилган ерларда мўл ҳосил етиштириш учун парваришни қизитмоқдалар.

Овулдаги “Азимжон Вайсак” фермер хўжалигидаги 63 гектар пахта майдонларидаги ғўзалар ҳам ягана қилиниб, культивацияланди.

Шунингдек 22 гектар майдонга экилган “Краснодар” навли буғдой ҳам сифатли парвариш қилинаётир. Меъёрида озиқлантирилиб, бегона ўтлардан, зараркунанда ҳашаротлардан ҳимоя қилингани боис, барча далаларда мўл ҳосил тўпланди. Бошоқлари эгилиб турган буғдойзорлардаги ҳосилнинг йиғим-теримига ҳам ҳозирлик кўрилаётир.

Халқимиз ризқи – деҳқон меҳнатидан. Буни сидқидилдан ҳис қилиб, барча экинлардан юқори ҳосил етиштиришга интилаётган миришкор-у механизаторларга толмас куч-қувват тилаб қоламиз.

Ойгул РАЖАБОВА.