ОВУЛ ЁШЛАРИГА МАСЛАКДОШ ОНАХОН

Кексаликни инсон умрининг донишманд фасли дейишади. Турмушнинг аччиқ-чучугини кўрган, яхшилик ва ёмонликни, оқ ва қорани ажрата оладиган, одиллик ва тўғрисўзлик тарафдори, катта ҳаётий тажрибага эга бўлган бобожонлар ўгитлари, бувижонлар панд-насиҳатлари билан ёшларга ўз йўлларини топишида кўмаклашади. Оилалар фариштаси, унда ўз ўрнига эга бўлган кексаларимиз ёш авлодни баркамол инсонлар қилиб тарбияловчи беминнат тарбиячилардир. Шу сабабдан ҳам нафақат, ҳар бир хонадон, балки бутун юртга файз бахш этиб келаётган пиру-бадавлат отахон ва онахонлар элимизда доим эъзоз ва эҳтиромда.

Амударё туманидаги оммавий ахборот воситаларидан бири бўлган amunews.uz веб-сайти таҳририятининг Олий Мажлис ҳузуридаги жамоат фонди томонидан молиялаштирилган “Соғлом муҳит – соғлом ҳаёт” грант лойиҳаси иш режасига кўра ана шундай элда қадрли, ёшлар тарбиясига муносиб ҳисса қўшиб келаётган кексаларни ибрат қилиб кўрсатиш мақсадида Тўлқин овулига ташриф буюрдик.

Овулда юрт файзига айланган, жамият ҳаётида фаол иштирок этиб, ёшларга тўғри йўл кўрсатиб келаётган нуронийлар кўпчиликни ташкил қилар экан. Фуқаролар йиғини масъуллари доим овулнинг пиру-бадавлатлари билан бамаслаҳат ҳолда иш олиб боришгани туфайли ҳудудда тинчлик-осойишталик ҳукмрон. Оилаларда ўзаро келишмовчилик, ажрим, ёшлар ўртасидаги ҳуқуқбузарлик ҳолатларининг олдини олиш бўйича чора-тадбирлар ҳам ҳамкорликда амалга оширилгани сабабли самарали натижаларга эришилмоқда.

40 йилдан зиёд давр мобайнида таълим соҳасида фидокорона меҳнат қилиб, ёш авлод таълим-тарбиясига ўз ҳиссасини қўшган, айни пайтда кексалик гаштини сураётган онахон Ҳанифа Яхшимова ҳам ўзи нафақада бўлишига қарамасдан, бу борадаги ишларда фуқаролар йиғини масъулларига яқин маслакдош бўлиб келмоқда. У “Бир нуроний ўн ёшга масъул” тамойилига кўра ҳудуддаги ёшлар тарбиясига масъул қилиб бириктирилган. Онахон ёшларни миллийлигимизни сақлаган ҳолда кийиниш маданияти, юриш-туриш, одоб-ахлоққа ўргатиш, ўқиш, ҳунар ўрганишига қизиқишларини ошириш, жамиятимизга, қолаверса оиласига намунали фарзандлар бўлиб тарбияланишига ўз ҳиссасини қўшиб келмоқда.

Тўлқин овулида туғилиб вояга етган Ҳанифа Яхшимова оилада опалари каби ўқитувчилик касбига қизиқди ва ҚДУнинг биология факультетини тугатиб, овулдаги 33-сонли мактабда иш бошлади. У шу мактаб директори бўлган Жонгил Эрназарова хонадонига келин бўлиб тушди. Ёш авлодга таълим-тарбия бериш билан бирга оилада турмуш ўртоғи Бахтиёр Жумабеков билан 4 нафар фарзандни ҳам ўқимишли, тарбияли инсонлар қилиб вояга етказди. Ҳозир неваралар қуршовида нафақа гаштини сураётган онахоннинг бой ҳаётий тажрибасидан овулдаги муаммоли ёшларни тугри йулга солишда унумли фойдаланилмоқда.

Онахон ёшлар етакчиси Фозилбек Қурбонбоев билан биргаликда ўзига бириктирилган ёшлар билан мунтазам суҳбатлашиб, уларнинг жамият учун фойдали инсонлар бўлиб етишишларига кўмаклашмоқда. Ҳудуддаги тарбияси оғир, мактабда машғулотларга ўз вақтида келмасдан кўп дарс қолдирадиган ёшларнинг ўзлари ва ота-оналари билан суҳбатлар ўтказилиб, спорт тўгаракларига жалб этилди. Ҳозирда улар “Беш ташаббус олимпиадаси” мусобақаларининг ҳудудий ва туман босқичларида фаол қатнашиб, фахрли ўринларни эгаллаб келишмоқда.

Турли оилавий муаммолар гирдобида қолган шу қишлоқлик яна бир ёш вояга етмасдан туриб ўғирликка қўл ургани сабабли мунтазам назоратда эди. Унга ҳам ўз вақтида ўгит-насиҳатлар берилиб, тўғри йўл кўрсатилди ва спорт тўгаракларига жалб этилди. Овулдаги оилалардан бирида яшовчи яна бир қиз ҳаётида ҳам у билан хонадонига бориб ўтказилган суҳбатлар, берилган насиҳатлар муҳим аҳамият касб этди. У тикувчилик ҳунарига қизиқишини билдиргани сабабли, овулдаги чеварларга бириктирилди ва бўш вақтларида ушбу ҳунарни ўрганишни бошлади.

Шунингдек, мунтазам равишда дарс қолдирадиган, бўш вақтларини бекор ўтказадиган овулдаги яна кўплаб ёшлар рўйхат қилиниб, шу бўйича барчаси билан суҳбатлашилди ва спорт тўгараклари, ҳунар ўрганиш кабиларга жалб этилди.

Овулдаги нуронийлар иштирокида ёшлар билан давра суҳбатлари, учрашувлар, туманимиздаги музей ва Чилпиқ қалъасига саёҳатлар ташкил этилиб борилмоқда. Бўш вақтлари мазмунли ташкил этилаётган ёшларнинг дунёқараши кенгайиб, касб-ҳунарга, билим олишга янада қизиқишлари ортмоқда, қалбларидаги юрт тақдирига дахлдорлик ҳислари мустаҳкамланмоқда.

Кексалар бор уйда тинчлик-хотиржамлик, дастурхонларда файзу-барака, қилинаётган ишларда ривож ва самара бўлади. Нуронийлик ёшига етганида ҳам тиниб-тинчимасдан ўзларининг эзгу дуолари, доно ўгитлари, бой тажрибалари билан ҳаёт йўлларида ёшларга қанот ва сабот бағишлаб келаётган Ҳанифа Яхшимова каби онахонлар, пиру-бадавлат отахонлар хонадонларимиз, ҳаётимизнинг файзи ва фаришталари доим омон бўлишсин. Зеро, юртимиздаги тинчлик-осойишталик, биз эришаётган ютуқ ва муваффақиятлар, турмушимиздаги фаровонлик шу нуронийларимизнинг эзгу тилаклари, дуолари ижобатидир.

Озода Худойберганова.