“Манғит арна” каналини бетонлаш ишлари олиб борилмоқда
2023 йил 11 ноябрь куни Амударё туманидаги ички хўжалик каналларини бетонлаш ишлари юзасидан амалий семинар бўлиб ўтди.
Семинарда Қорақалпоғистон Республикаси Сув хўжалиги вазири Бахтияр Жузбаев, туман ҳокими Собир Хўжаметов, туман прокурори Азиз Рўзметов, туман қишлоқ ва сув хўжалиги бўлимлари масъул ходимлари, кластер, фермер хўжалиги ва қурилиш ташкилотлари раҳбарлари иштирок этдилар.
Жорий йилда туман бўйича жами узунлиги 21,8 километр бўлган ички хўжалик каналларини бетонлаш режалаштирилган. Шундан тумандаги “Манғит арна” хўжаликлараро каналидан сув олувчи “Гўжа ёп” ички хўжалик канали бетонлаш ишлари масъулияти чекланган жамияти шаклидаги “Amudaryotex” қўшма корхонасини ҳисобидан амалга оширилмоқда.
Семинарда туман ҳокими Собир Хўжаметов сувдан самарали фойдаланиш ва унинг беҳуда сарфланишининг олдини олиш муҳим аҳамият касб этиши тўғрисида батафсил сўз юритди. Соҳа мутахассислари томонидан “Гўжа ёп” ички каналини бетонлаш ишлари натижасида сувнинг ерга сўрилиб кетишининг олди олиниб, янги технологияларни жорий қилиш ҳисобидан йил давомида жами 8,4 млн. кубометр сув иқтисод қилишиниши таъкидлаб ўтилди.
“Гўжа ёп” ички хўжалик каналининг умумий узунлиги 3,5 километр бўлиб, сув ўтказиш қобилияти дақиқасига 1 кубометрни ташкил қилади ҳамда 3та фермер хўжалиги, 70та аҳоли ханодонлари ушбу хўжалик каналидан фойдаланиб келади. Шунингдек, мазкур ички хўжалик каналидан 167 гектар ер майдони суғорилади. Шундан 74 гектар пахта, 36 гектар ғалла, 15 гектари томорқа майдонларига тўғри келади.
Семинар давомида сўзга чиққан масъуллар сувни тежовчи технологиялар жорий қилинган майдонларда мазкур технологиялардан мақсадли ва самарали фойдаланилиши юзасидан фермер хўжаликлари раҳбарлари ва бошқа семинар иштирокчиларга зарур тушунчалар берди.
Сув ресурслари минтақамиз ва мамлакатимиз учун энг долзарб масалалардан бирига айланмоқда. Бугунги кунда кўплаб ер майдонлари эски усулда суғорилмоқда. Бунинг натижасида миллионлаб кубометр сув исроф бўлмоқда ва сув ресурслари камаймоқда. Ана шу сув йўқотишларини камайтириш учун каналларни бетонлаш ҳамда бошқа турдаги янги материаллардан фойдаланиш, инновацияларни қўллаш усуллари амалиётга жорий қилинмоқда.
Яқинда Давлатимиз раҳбари раислигида бўлиб ўтган видеоселектор йиғилишида ҳам келгуси 2024 йилга мўлжалланган давлат бюджетининг энг муҳим жиҳатлари муҳокама қилинган эди. Муҳокамада саноат тармоқларида ҳам, ҳудудларда ҳам долзарб вазифага айланган сув таъминоти муаммосига алоҳида эътибор қаратилиб, охирги икки йилда сув хўжалигини сақлаб қолиш учун 22 триллион сўмга етган катта миқдорда маблағ ажратилгани қайд этилди ва бу маблағларни мақсадли сарфлаб, сувдан самарали ва тежамкорлик билан фойдаланиш зарурлиги таъкидланди.
Семинарда соҳа вакиллари фермер хўжаликлари раҳбарларига давлатимиз томонидан тежамкор суғориш технологияларини жорий этган тадбиркорлик субъектларига субсидиялар ажратиш тартиби йўлга қўйилганини айтиб, бу тўғрисида батафсил тушунтиришлар бериб ўтди.
Семинар иштирокчилари “Гўжа ёп” ички хўжалик каналини бетонлаш ишлари билан яқиндан танишдилар. Шунингдек, иш жараёнида учраётган хато ва камчиликлар юзасидан тегишли соҳа масъулларига топшириқлар берилди.
Туман ҳокимлиги Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
