САРАНЖОМ-САРИШТА, ЯШИЛ МАСКАНГА АЙЛАНАЁТГАН МАКТАБ
Айни кунларда туманимизнинг қайси ҳудудига борманг, кузги кўчат экиш, ободонлаштириш ишларига гувоҳ бўласиз. Айниқса, “Яшил макон” умуммиллий дастури доирасида амалга оширилаётган ишлардан кўзингиз қувонади.
Дарвоқе, кўчат экиб, боғ яратиш халқимиз учун азалий қадрият. Шу боис, оилада фарзанд туғилса, ҳар бир янги туғилган чақалоққа атаб мевали ва манзарали дарахт кўчатлари ўтказилади. Бунинг ўз рамзий маъноси бор, албатта. Болада табиатга меҳр уйғотиш, ўз боғи, чорбоғини яратишга ўргатиш, қолаверса, униб-ўсиб, ҳовли-жойга кўрк, файз бағишлаган дарахт сояси-ю мевасидан эл-юрт баҳра олсин, деган эзгу ниятлар мужассам бу бобомерос қадриятда.
Кундан-кунга обод ва фаровон бўлиб бораётган маҳаллалар, идора ва ташкилотлар, умумтаълим муассасалари атрофида барпо этилаётган яшил ҳудудлар халқимиз учун битмас-туганмас мусаффо ҳаво – кислород фабрикасидир. Мусаффо ҳаво эса соғлом ҳаёт манбаи, бу манбани яратишга ҳисса қўшиш ҳар бир соғлом фикрли инсоннинг зиммасидаги масъулиятли бурчи ҳисобланади.
Амударё туман Мактабгача ва мактаб таълими бўлимига қарашли 56-сонли мактаб атрофи ҳам йил сайин ободон ва кўкламзор ҳудудга айланиб бормоқда. Орзигул Худойберганова раҳбарлигидаги мазкур педагогик жамоа айни кунларда “Яшил макон” умуммиллий лойиҳаси доирасида мактаб ҳудудидаги дов-дарахтларни асраб-авайлаш, гул уруғлари ва совуққа чидамсиз гул кўчатларини баҳорги экиш мавсумига тайёрлаб қўйиш, мавжуд мевали ва манзарали дарахтларга кузги шакл ва ишлов бериш билан бир қаторда муассаса ҳудудида янгидан боғ яратиш ишларига алоҳида эътибор қаратишмоқда.
Аввало мактабнинг техник ходимлари томонидан ҳудуддаги ариқлар хас-хашаклардан тозаланиб, кўчат ўтқазиладиган ер қондириб суғориб қўйилди. Туман ҳокимлиги ва Дурунки МФЙ томонидан етказиб берилган 192 туп мевали ва манзарали дарахт кўчатлари мактаб боғбони Мансур Ҳайтанов, техник ходимлар Манзура Қодирова, Олтиной Хўжамуродова, Манзура Камолова, Гулмира Ҳайитбоева, Мавлуда Жуланова, Жасур Ҳайтановлар томонидан мактаб боғига ва муассаса атрофидаги ариқлар бўйларига сифатли қилиб экилди. Ўтқазилган ҳар бир туп кўчатнинг тупроққа илдиз қўйиб, тўлиқ ривожланиб кетишини таъминлаш мақсадида мактаб боғбони Мансур Ҳайтанов бошчилигидаги техник ходимлар кўчатларни ўғитлаб, сув қуйиб чиқдилар. Қишнинг совуқ ва изҳиринли кунларида экилган кўчатларнинг илдизлари зарарланмаслиги учун тупларига яхшилаб тупроқ тортилиб, зичланди.
Айни пайтда эса мактаб боғбони ва техник ходимлар аввалги йилларда ўтқазилган дарахтларнинг тупларини оқлаш, ортиқча шох-шаббалардан тозалаш, мактаб боғидаги экиндан бўшаган ерлардаги ҳар хил бегона ўтлар чиқиндиларини боғ ҳудудидан чиқариб ташлаш каби кузги-қишги юмушларни адо этишмоқда. Муассаса атрофи эса кеч куз бўлишига қарамай, озода ва саришта. Хазонлардан тозаланган, янги экилган кўчатлар бир текис саф тортган, чиройли шакл берилган дов-даражтлар нафақат мазкур таълим-тарбия масканига, балки Дурунки маҳалласига ҳам файз бағишлаб турибди.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
