Халқ депутатлари Амударё туман Кенгашининг 68-сессияси тўғрисида ахборот

2023 йил 27 декабрь куни Амударё тумани ҳокимлигининг мажлислар залида Халқ депутатлари туман Кенгашининг навбатдаги – 68-сессияси бўлиб ўтди.

Сессияни Халқ депутатлари туман Кенгаши раисининг ўринбосари Ғуломжон Ешниёзов очди ва олиб борди.

Сессия котиблигига 5-Беруний сайлов округидан депутат Нилуфар Давлетова сайланди.

Сессияда туман ҳокими, секторлар раҳбарлари, депутатлар, ҳоким ўринбосарлари, ҳокимлик масъул ходимлари, бўлимлар, ташкилотлар раҳбарлари, овул ва маҳалла фуқаролар йиғинлари масъуллари ҳамда оммавий ахборот воситалари вакиллари иштирок этди.

Сессияда дастлаб Амударё туманини ишсизликдан ҳоли худудга айлантириш ҳамда туманни ижтимоий-иқтисодий ривожлантириш бўйича туман ҳокими биринчи ўринбосари Камилжон Айтбаевнинг ҳисоботи тингланди.

Ҳисоботда бугунги кунда туманда 49та овул ва маҳаллаларда яшовчи аҳоли сони 211,1 минг нафарни, хонадонлар сони 38 минг, ундаги оилалар сони эса 56,3 мингтани ташкил қилишини, иқтисодий фаол аҳоли эса 82 минг 626 нафар бўлиб, расмий ва норасмий секторда бандлар 75 минг 694 нафарни, ишсизлар сони 6 минг 932 нафарни, битирувчилар эса 14 минг 509 нафарни ташкил қилишини айтиб ўтилди.

Шунингдек, ҳоким ўринбосари туманни ишсизликдан ҳоли худудга айлантириш бўйича амалга оширилган ишлар ва келгусидаги режаларга ҳам тўхталди. Хусусан, тумандаги ишсизликдан келиб чиқиб, мавжуд имконият ва резервларни сафарбар қилган ҳолда келгуси йилда 8 минг 140та доимий, 8 минг 646та мавсумий ҳамда 4 минг 397та вақтинчалик, жами 21 минг 683та иш ўринларини яратиш белгиланган.

Сессияда туман ҳокими ўринбосари, Оила ва хотин-қизлар бўлими бошлиғи Гўзал Собурова 4-босқич “Аёллар дафтари”га киритилган хотин-қизларга кўрсатилган ёрдамлар ҳамда амалга оширилган ишлар тўғрисида ҳисобот берди.

Ҳисоботда таъкидланганидек, туманда 4-босқич “Аёллар дафтари”га жами 5 минг 398 нафар хотин-қизлар киритилган. Шундан, ижтимоий ҳимояга муҳтож ишсиз хотин-қизлар 1 минг 943 нафарни, тадбиркорлик қилиш истагини билдирган эҳтиёжманд хотин-қизлар 685 нафарни, боқувчисини йўқотган эҳтиёжманд хотин-қизлар 1 минг 183 нафарни, ижтимоий ёрдамга муҳтож, I ва II гуруҳ ногиронлиги бўлган ва тиббий муолажага муҳтож эҳтиёжманд хотин-қизлар 911нафарни ташкил қилади. Уй-жойга муҳтож хотин-қизлар 30 нафар, қарамоғида ногиронлиги бўлган фарзандлари мавжуд эҳтиёжманд хотин-қизлар сони эса 646 нафарни ташкил қилади.

Шу кунгача 4-босқич “Аёллар дафтари”га киритилган 5 минг 398 нафар хотин-қизларнинг 5 минг 330 нафарига ёрдамлар кўрсатилган.

Сессия ишида туман Маҳаллий бюджетнинг 2024 йилги асосий кўрсатгичлари тўғрисида туман Молия бўлими бошлиғи Жавлонбек Жумамуратов ҳисобот берди. Ҳисоботда 2024 йил учун туман Маҳаллий бюджетнинг даромадлари 73,3 млрд. сўм, юқори бюджетдан ажратиладиган трансферт миқдори 151,6 млрд. сўм, жами харажатлари 224,9 млрд. сўм миқдорида прогноз қилинаётгани қайд этилиб, келгуси йилда кўзда тутилган даромадлар ва харажатлар ҳақида батафсил маълумотлар берилди.

Сессияда Амударё тумани Солиқ инспекцияси бошлиғи Жаҳонгир Раҳимов Амударё туманида 2023 йил давомида бюджетга тушумларни таъминлаш бўйича амалга оширилган ишлар ва 2024 йил бюджети режаси туғрисида ҳисобот берди. Ҳисоботда бюджет даромадларига 2023 йил учун белгиланган 91,1 млрд. сўм прогноз кўрсаткичи йил якуни билан 100,2 млрд. сўмга, яъни (110 фоизга) бажарилиб, бюджетга анқланган қўшимча манбалар ҳисободан 9,1 млрд. сўм ундирилгани, бюджетга тушумлар 2022 йилга таққослаганда 118,8 фоизга, яъни 15,9 млрд. сўмга ўсиши таъминлангани қайд этилди.

Шундан сўнг сессияда туман Халқ қабулхонаси мудири Эркин Ражабов аҳолидан келиб тушаётган мурожаатларни таҳлил қилган ҳолда, ҳоким ёрдамчилари фаолиятининг натижадорлигини ўрганиш якунлари тўғрисидаги масала юзасидан ахборот берди.

Ахборотда таъкидланганидек, Ўзбекистон Республикаси Президентининг Виртуал қабулхонасига жорий йил бошидан 1 декабрь санасига қадар туман аҳолиси томонидан жами 4 минг 253та масалалар бўйича мурожаатлар келиб тушган. Шундан 3 минг 230таси қаноатлантирилган, 1 минг 705таси ижобий ҳал қилинган. Ахборотда ҳоким ёрдамчилари фаолиятининг натижадорлигини ўрганиш якунлари бўйича ҳам батафсил маълумот берилди.

Сессия сўнгида туман ҳокими Собир Хўжаметов сўзга чиқиб, депутатлар ва барча туман фаолларини Янги йил байрами билан табриклади ҳамда туманни ижтимоий-иқтисодий ривожлантиришга қўшаётган ҳиссалари учун миннатдорчилик билдириб, барчани халқ фаровонлиги, давлат ривожи ҳамда жамият тараққиёти йўлида ҳамжиҳатлик билан фидокорона меҳнат қилишга чорлади.

Сессияда Кенгаш ваколатига кирувчи бошқа масалалар ҳам муҳокама қилинди.

Кун тартибидаги барча масалалар атрофлича кўриб чиқилиб, туман Кенгашининг тегишли қарорлари қабул қилинди.

Шунинг билан сессия ўз ишини якунлади.

Туман ҳокимлиги Ахборот хизмати