МАНҒИТ ДЕҲҚОН БОЗОРИДАГИ ДЎКОНЛАР, БАЙРАМ ЯРМАРКАСИДАГИ ОЗИҚ-ОВҚАТ МАҲСУЛОТЛАРИНИНГ СИФАТИ НАЗОРАТ ҚИЛИНДИ

Мамлакатимизда аҳолига қулайликлар яратиш мақсадида ҳукуматимиз томонидан белгиланган жойларда доимий ёки вақтинчалик асосда фаолият кўрсатадиган ҳамда савдо расталари, савдо ўринлари ва турғун савдо шохобчаларидан фойдаланган ҳолда кенг турдаги қишлоқ хўжалиги, озиқ-овқат маҳсулотларининг ва уни қайта ишлашдан олинадиган маҳсулотларининг чакана савдоси учун зарур шарт-шароитлар яратилмоқда.

Бозорда савдо қилувчи хусусий тадбиркорлик субъектлари, якка тадбиркорлар зиммасига соғломлиги хусусида тибиий маълумотга эга бўлиш шунингдек, ўз савдо ҳудудини озода, санитария-гигиена қоидаларига мувофиқ тутиш, яроқлилик муддати ўтган маҳсулотларни савдога чиқармаслик, харидорлар билан хушмуомалалик билан савдо қилиш мажбурияти юкланган.

Бу қоидаларга риоя этилиши эса тегишли ташкилотлар томонидан назорат қилиб борилади. Боиси орасталик бўлмаган ҳудудда озиқ-овқат, қишлоқ хўжалиги маҳсулотлари сотилиши ёхуд яроқлилик муддати ўтган маҳсулотларнинг сотилиши аҳоли орасида турли овқатдан заҳарланиш ҳолатларини келтириб чиқиши мумкин.

Жорий йилнинг 27 декабрида Амударё тумани Санитария-эпидемиологик осойишталик ва жамоат саломатлиги бўлимининг бир гуруҳ ходимлари туман Деҳқон бозори ҳудудидаги Янги йил байрами мунобабати билан ташкил этилган озиқ-овқат ва қишлоқ хўжалиги маҳсулотлари ярмаркаси ва бозор ҳудудидаги савдо ўринларида сотилаётган маҳсулотларнинг сифатини назорат қилдилар.

Қайд этиш лозимки, Янги йил байрами муносабати билан аҳолини хавфсиз ва арзон озиқ-овқат, қишлоқ хўжалиги маҳсулотлари билан таъминлаш учун ташкил этилган ярмарка иш бошлаганидан то фаолияти якунлангунча ушбу савдо ўринларида, бозор ҳудудида сифатсиз маҳсулотлар савдога чиқарилишининг олдини олиш учун туман Санитария эпидемиологик осойишталик ва жамоат саломатлиги бўлими ходимларидан уч нафарининг ҳар куни доимий равишда назорат олиб бориши белгиланган.

Мазкур назорат тадбирида бўлим олий тоифали шифокори Мунаввар Кашкарова, шифокор ёрдамчилари Баҳодир Холмуродов, Комил Бозорбоевлар Манғит деҳқон бозори ҳудуди ветеринария-санитария лабораторияси лаборанти Олимжон Наъматуллаев ҳамроҳлигида қатнашдилар.

Тадбир давомида бозор ҳудудидаги дўконларда ва байрам ярмаркасидаги савдо ўринларида сотилаётган маҳсулотларнинг сифати, яроқлилик муддатига амал қилиниши кўздан кечирилди. Ушбу жараёнда сифатсиз, муддати ўтган маҳсулот сотилиши натижасида уни истеъмол қилганлар ботулизм касаллигига чалиниши ва турли даражада овқатдан заҳарланиши мумкинлиги кенг тушунтирилди. Шунингдек, савдо қилаётган харидорларга ҳам маҳсулотни яроқлилик муддатини ўқиб, сифатли эканлигига ишонч ҳосил қилгач, харид қилиш лозимлиги тарғиб этилди.

Ҳаммамиз интиқиб кутган Янги йил байрами яқинлашмоқда. Халқимиз қувончли дамларини, байрамларни яқинлари, дўст-биродарлари билан бирга нишонлашга одатланган. Ташриф буюрувчиларга дастурхон ёзиб, боримизни тўкамиз, тотли неъматлар қўямиз. Албатта, бундай вақтларда овқатдан заҳарланиш каби кўнгилсиз ҳодисалар содир бўлмаслиги учун масъул ташкилотлар ходимлари хизматда.

Ойгул РАЖАБОВА.