“МАЪНАВИЯТ КУНИ” ДОИРАСИДАГИ ТАДБИР ҚИЗИҚАРЛИ ТААССУРОТЛАРГА БОЙ БЎЛДИ

Ёшларни билимли, юксак маънавиятли ва ахлоқли инсонлар қилиб тарбиялашда китобнинг аҳамияти ниҳоятда катталигини буюк аждодларимиз – Абу Райҳон Беруний, Ал Хоразмий, Абу Али Ибн Сино, Мир Алишер Навоий, Чўлпон, Фитрат каби улуғ салафлар ўз замоналарида алоҳида эътироф этишган. Буюк саркарда, давлат ва жамоат арбоби Амир Темур бобомиз эса нафақат подшоҳлик саройида, балки мамлакатнинг ҳар битта кент ва работида кутубхоналар очиб, мамлакат ёшларини китоб мутолаасига даъват этганлар.

Бугунги глобаллашув жараёнида ёшларни кучли тафаккур эгалари, билимдон ва салоҳиятли инсонлар қилиб тарбиялашда аждодларимиздан мерос бу маънавий қадрият давлатимизнинг устувор сиёсатига айланган.

Олий Мажлис ҳузуридаги ННТлар ва фуқаролик жамиятининг бошқа институтларини қўллаб-қувватлаш жамоат фонди томонидан эълон қилинган танловнинг “Нажот – таълимда, нажот – тарбияда, нажот - билимда” йўналишида “Билимли ва маънавиятли ёшлар билан – Учинчи Ренессанс сари” лойиҳаси билан иштирок этиб, танлов гранти соҳиби бўлган “Тараққиёт кўзгуси” газетаси таҳририяти ижодий жамоаси томонидан мазкур лойиҳа доирасида амалга оширилаётган маънавий-маърифий тадбирлар муҳим аҳамият касб этмоқда. Хусусан, ёшларни китобхонликка кенг жалб этишга қаратилган иншолар танловлари, китоб ҳафталиклари, “Китобхонлик ва мутолаа маданияти ҳафталиги”, “Китоб сайллари”, Амударё телевидениеси билан ҳамкорликдаги “Китобхон ёшлар” кўрсатуви, “Энг яхши совға - китоб”, “Фарзандимга китоб совға қиламан” акциялари ташкил этилиб, бу каби тадбирларга туманнинг барча ҳудудларидаги таълим-тарбия муассасалари ўқувчи-ёшлари ва китобхон оилалар кенг қамраб олинмоқда.

“Маънавият куни” доирасида туманнинг 1-сектори ҳудудидаги таълим-тарбия ишлари яхши йўлга қўйилган 82-сонли умумтаълим мактабида бўлиб ўтган таниқли ёзувчи ва шоирлар ҳамда тажрибали педагоглар иштирокидаги давра суҳбатида ҳам ёшлар китобхонлигини ривожлантириш, уларни мутолаа маданиятига амал қилишга даъват этиш, тажрибали ўқитувчиларнинг ўз ўқувчилари билан биргаликда ҳозирги замон ва мумтоз ўзбек адабиёти дурдоналарини мутолаа қилиш ва ёшларнинг ўқиган асарлари мазмун-моҳияти юзасидан фикрларини эркин ифода этишларига алоҳида эътибор қаратилди.

Тадбирда мазкур мактабнинг тажрибали мутахассис ўқитувчилари, ўз қизиқишлари ва хоҳишлари билан аълочи ва китобхон ёшлари иштирок этишди. Шунингдек, тадбир меҳмонлари – Ўзбекистон Ёзувчилар уюшмаси аъзоси, ёзувчи Турсунбой Абдуллаев, Ўзбекистон Ёзувчилар ва Журналистлари ижодий уюшмалари аъзоси, Қорақалпоғистон Республикасида хизмат кўрсатган журналист, шоира Робия Йўлдошева, тумандаги 27-сонли мактабнинг мусиқа фани ўқитувчиси, шоир Адилбой Аметовлар китобхон ёшлар ҳамда уларнинг устозлари билан дилдан, самимий суҳбат қурдилар.

- Китоб – инсонга нафақат маънавий руҳ бағишлайди, - балки уни тарбиялайди, камолотга етказади, - деди устоз ёзувчи Турсунбой Абдуллаев. – Инсон қанчалик бой-бадавлат бўлмасин, уни бойлиги эмас, балки битта яхши китобдан олган маънавий озиғи бутун умр бадавлат, эл ичра суюкли, ҳурматли инсон сифатида шакллантиради. Менинг сиз азизларга дўстона маслаҳатим шуки, сизларнинг энг севимли машғулотингиз – мутолаа, энг қадрли масканингиз мактаб ва кутубхона, орзуларингиз – таълим ва яна таълим бўлсин.

Тадбир давомида “Билимли ва маънавиятли ёшлар билан – Учинчи Ренессанс сари” грант лойиҳаси координатори, шоира Робия Йўлдошева ўзининг шахс сифатида шаклланишида билим олишга бўлган интилишида, китобхонликнинг жуда катта аҳамиятга эга бўлганини ҳаётий мисоллар тариқасида ҳикоя қилиб берди.

- Мактабимизда ўқувчи-ёшларнинг билим олишлари, хорижий тилларни ўрганишлари, ўз иқтидорларини намоён этишлари учун барча зарур шароитлар яратилган, - деди мактаб ўқитувчиларидан Севара Болтабоева. – Ёшларнинг китобга илмга интилишлари, эришаётган ютуқларимизда ҳам намоён.

Дарвоқе, мактабда бугунги кунда 532 нафар ўқувчига 48 нафар малакали педагоглар, илм сирларини қунт билан ўргатишмоқда. Ўқитувчиларнинг 12 нафари олий ва 1-тоифали, 6 нафари 2-тоифали, қолганлари эса махсус мутахассисликка эга тажрибали фан ўқитувчиларидир. Собиқ Иқтисод коллежи негизида ташкил этилган 82-сонли мактабнинг 2023-2024 ўқув йилида илк битирувчилари мустақил ҳаётга йўлланма олишади. 2023-2024 ўқув йили фанлар олимпиадасида мактаб ўқувчилари рус тили ва математика фанлари бўйича туман ва республика босқичларида муваффақиятли иштирок этишди. Иқтидорли ўқувчи Машҳурахон Ражабованинг эса илк шеърлар тўплами “Тараққиёт кўзгуси газетаси” нашриётида чоп этилди.

- Ҳақиқатан ҳам аждодларимиз нажот – таълим-тарбияда, деб бежиз айтишмаган, - ўз фикрини билдирди тажрибали педагоглардан Дилдорахон Холбоева. – Бола ўқиб-изланишга қанчалик меҳр қўйса, у шунчалик салоҳиятли, маънан ва ахлоқан етук инсон бўлиб вояга етади. Бизнинг вазифамиз эса ўқувчини турли ёт ғояларга берилиб кетишидан ҳимоя қилиш. Ҳимоя воситаси эса – китоб, таълим ва билим.

Ёзувчи-шоирлар ва педагоглар билан суҳбат жараёнида мушоира ҳам қизиди. Турсунбой Абдуллаевнинг миллий-маънавий қадриятларимизни ўзида мужассам этган термалари, ёшлар илтимосига кўра, келин саломларини ижод этишдаги изланишлари, ёзувчи ва шоир оғамизнинг “Саломчи” атамасини ўзига “унвон” сифатида қабул қилиб олгани ҳақидаги қизиқарли ҳикоялари барчага завқ-шавқ бағишлади. Навбатма-навбат Турсунбой Абдуллаев, Адилбой Аметов ва иқтидорли шоира Машҳурахон Ражабовалар ўз шеърларидан намуналар ўқиб бердилар.

Тадбир якунида Турсунбой Абдуллаев 82-сонли мактаб ўқитувчилари ва ўқувчи-ёшларига ҳам шеърий салом бағишлади. Албатта, бундан тадбир иштирокчилари ҳам баҳраманд бўлдилар.

“Маънавият куни” доирасида туманимиз ижодкорлари ва 82-сонли мактабнинг тажрибали педагоглари ҳамда китобхон ёшлари, иштирокида бўлиб ўтган суҳбат қизиқарли таассуротларга бой бўлди.

Робия ЙЎЛДОШЕВА, Маҳмуджон ШОМУРОДОВ.