Меҳнат ярмаркасида 13 нафар ишсиз фуқаролар доимий ишга жойлаштирилди

Мамлакатимизда аҳоли бандлигини таъминлаш, даромадларини оширишга ҳар томонлама кўмаклашиш, ишсизлар, айниқса, ёшлар ва хотин-қизлар, меҳнат бозорига илк бор кириб келаётган битирувчилар бандлигини таъминлашга устувор аҳамият қаратиб келинмоқда. Бу борада қатор меъёрий-ҳуқуқий ҳужжатлар, дастурлар ишлаб чиқилиб, амалиётга татбиқ қилинмоқда.

Амударё тумани Камбағалликни қишқартириш ва бандликка кўмаклашиш бўлимида ташкил этилган меҳнат ярмаркаси ҳам бандликни таъминлаш йўлидаги чора-тадбирлардан биридир.

Жорий йилнинг 26 январь куни ўтказилган меҳнат ярмаркаси туман Камбағалликни қисқартириш ва бандликка кўмаклашиш бўлими, туман Мажбурий ижро бюроси, туман Прокуратураси ҳамкорлигида ташкил қилинди.

Тадбирни туман Камбағалликни қишқартириш ва бандликка кўмаклашиш бўлими бошлиғи Рашид Салаев очди ҳамда олиб борди. Рашид Салаев ўз сўзида бугунги кунда мамлакатимизда аҳоли бандлигига кўмаклашиш, аҳолини иш билан таъминлаш, бўш иш ўринларини яратиш борасида олиб борилаётган кенг ислоҳотлар хусусида тўхталди.

Хусусан, бандлик бўйича янги таъсирчан механизмлар жорий этилаётгани, эҳтиёжманд аҳолини меҳнат фаолиятига жалб қилишда қулай шарт-шароитлар яратилаётгани, жойларда тегишли масъуллар томонидан “маҳаллабай”, “фуқаробай” ишлаш тизими асосида иш олиб борилиб, аҳолининг муаммолари, иш билан банд қилиш масалалари ўрганилаётгани алоҳида қайд этилди.

Шунингдек, туман Мажбурий ижро бюроси бошлиғи Азиз Тажиев ҳамда туман прокурори катта ёрдамчиси Равож Темирбаевлар сўзга чиқиб, аҳоли бандлигини таъминлаш борасида қатор амалий чоралар кўрилаётгани, ишсиз фуқаролар бандлигини таъминлашга кўмак берилаётгани, бу каби амалий ишлар аҳоли фаровонлиги, оилаларнинг даромади барқарорлигига хизмат қилаётганини таъкидладилар.

Меҳнат ярмаркасида тумандаги қатор тижорат банклари ҳамда 41 та корхона ва ташкилотлар 115 та бўш иш ўринлари билан иштирок этди. Тадбир мобайнида 14 нафар ёшлар, 19 нафар аёллар, 3 нафар мактаб битирувчилари, 1 нафардан ногиронлиги бўлган, жазони ижро этиш муассасасидан келган ва алимент тўловчи фуқаролар, шунингдек, 3 нафардан ҳарбий хизматдан ва меҳнат миграциясидан келган фуқаролар,  жами 45 нафар ишсиз фуқаролар иштирок этдилар.

Ярмарка давомида 4 нафар ёшлар, 8 нафар аёллар, 1 нафар мактаб битирувчиси, жами 13 нафар ишсиз фуқаролар доимий ишга жойлаштирилди. 3 нафар ёшлар ва 2 нафар аёллар касбга ўқитиш, қайта ўқиш курсларига юборилди. 5 нафар ёшлар, 7 нафар аёллар эса ҳақ тўланадиган жамоат ишларига жалб қилинди.

Меҳнат ярмаркаси мобайнида масъуллар томонидан иштирокчиларнинг меҳнат қонунчилиги борасидаги барча саволларига тегишли жавоблар берилди. Шунингдек, ишга жойлашиш юзасидан тегишли тавсиялар берилди.

Чарос Арслонова,  туман ҳокимлигининг Ахборот хизмати раҳбари