Меҳнат ярмаркасида 23 нафар фуқаро доимий, 47 нафар фуқаро ҳақ тўланадиган ишларга жойлаштирилди

Жорий йилнинг 6 февраль санасида Амударё тумани Камбағалликни қисқартириш ва бандликка кўмаклашиш бўлими томонидан туман Прокуратураси, Мажбурий ижро бюроси, туман ИИБ билан ҳамкорликда бўш иш ўринлари меҳнат ярмаркаси ташкил қилинди.

Тадбирни Амударё туман Камбағалликни қишқартириш ва бандликка кўмаклашиш бўлими бошлиғи Рашид Салаев очди ҳамда олиб борди ва бугунги кунда мамлакатимизда аҳоли бандлигига кўмаклашиш, аҳолини иш билан таъминлаш, бўш иш ўринларини яратиш орқали камбағалликни қисқартириш борасида олиб борилаётган кенг ислоҳотлар хусусида батафсил тўхталди.

Хусусан, бандлик дастури бўйича янги таъсирчан механизмлар жорий этилиб, эҳтиёжманд аҳолини меҳнат фаолиятига жалб қилишда қулай шарт-шароитлар яратилаётгани, жойларда тегишли масъуллар томонидан “маҳаллабай” ишлаш тизими асосида иш олиб борилиб, аҳолининг муаммолари, иш билан банд қилиш масалалари ўрганилаётгани юзасидан маълумотлар берди.

Меҳнат ярмаркасида Қорақалпоғистон Республикаси Камбағалликни қисқартириш ва бандлик вазирлиги масъул ходими М.Измуратов қатнашди ва нутқ сўзлади. Шунингдек, тадбирда туман прокуратураси, Мажбурий ижро бюроси, ИИБ вакиллари сўзга чиқиб, аҳоли бандлигини таъминлаш борасида қатор амалий чоралар кўрилаётгани, ишсиз фуқаролар бандлигини таъминлашга кўмак берилаётгани, бу каби амалий ишлар аҳоли фаровонлиги, оилаларнинг даромади барқарорлигига хизмат қилаётганини таъкидладилар.

Ярмаркада тумандаги 43та корхона ва ташкилотлар 202та бўш иш ўринлари билан иштирок этишди. Меҳнат ярмаркасига туман худудида яшовчи ва иш изловчи фуқаролар, ногиронлиги бўлган шахслар ҳамда олий ўқув юрти битирувчилари таклиф қилинган бўлиб, 19 нафар ёшлар, 47 нафар аёллар, 6 нафар битирувчи, 6 нафар ногиронлиги бўлган фуқаро, 1 нафар жазони ижро этиш муассасасидан келган шахс, жами 84 нафар ишсиз фуқаролар қатнашдилар.

Корхона ва ташкилотлар томонидан  таклиф этилган иш ўринларига  2 нафар ёш, 11 нафар аёл, 3 нафар битирувчи, 1 нафар ногиронлиги бўлган шахс, 1 нафар жазони ижро этиш муассасасидан келган фуқаро, 5 нафар бошқа тоифадаги иш қидирувчилар, жами 23 нафар ишсиз фуқаролар доимий ишга жойлаштирилди.

Шунингдек, ҳақ тўланадиган жамоат ишларига 12 нафар ёшлар, 30 нафар аёллар, 5 нафар ногиронлиги бўлган шахслар жалб қилинди. 5 нафар ёшларга, 2 нафар битирувчи ҳамда 6 нафар аёлларга меҳнат қонунчилигига оид масалалар бўйича зарур маслаҳатлар берилди.

Меҳнат ярмаркаси давомида масъуллар томонидан иштирокчиларнинг меҳнат қонунчилиги борасидаги саволларига тегишли жавоблар берилди. Шунингдек, ишга жойлашиш юзасидан тегишли тавсиялар тақдим этилди.

Муяссар Халиллаева.