38-СОНЛИ МАКТАБНИНГ ИҚТИДОРЛИ ЎҚУВЧИЛАРИ МУНОСИБ РАҒБАТЛАНТИРИЛДИ
Амударё тумани мактабгача ва мактаб таълими бўлими тасарруфидаги 38-сонли мактабда ўқувчи-ёшларнинг интилиши ва қизиқишлари асосида умумтаълим фанларини чуқурлаштириб ўқитиладиган иқтидорли ўқувчилар синфлари ташкил этилган. Мазкур синфларда фанларни чуқурлаштириб ўқитиш билан бирга ўқувчилар эришаётган ютуқлар ўз вақтида рағбатлантириб борилишига ҳам алоҳида эътибор қаратилади. Тажрибали фан ўқитувчилари билан бошланғич синфлар ўқитувчиларнинг ҳамкорликдаги фаолиятлари туфайли мактаб ўқувчилари турли кўрик-танловлар, билимлар беллашуви ва фанлар олимпиадаларида муваффақиятли иштирок этиб келишмоқда.
Мактабнинг 2-, 3-, 4-синфлар ўқувчилари ўртасида ўқиш саводхонлиги, она тили, математика фанлари бўйича ўтказилган билимлар беллашувда иқтидорли ва интилувчан ўқувчилар сафи ошиб бораётганини амалда намоён бўлди. Ҳали бошланғич синфлар ўқувчилари бўлган болажонлар руҳиятини кўтариш, улардаги илмга интилиш туйғусини янада мустаҳкамлаш мақсадида турли мусобақалар, айниқса, заковат ўйинлари ва билимлар беллашуви ғолибларини маънавий рағбатлантириб бориш эса мактаб педагогика жамоаси учун доимий анъанага айланган.
Мактабда ана шундай маънавий рағбатлантириш тадбирларидан бири февраль ойининг охирги ҳафтасида ҳам бўлиб ўтди.
Билимлар беллашуви ғолибларини рағбатлантиришга бағишланган тадбирни мактаб директори Баҳром Болтабоев очди ва билимдон ўқувчилар ҳамда уларнинг устозларини эришган ютуқлари билан самимий табриклади. Шу билан бирга энди 8-9 ёшга қадам қўйган, билимга чанқоқ болалар ҳамда уларни ўз қизиқишлари доирасида аниқ мақсад сари йўналтириб, математика фанининиг мўъжизакор оламига, она тилининг гўзал ва нафосатли, сирли дунёсига олиб кириб, илм чўққилари сари етаклаётган, саводхонлигини ошираётган фидойи ўқитувчиларга чин дилдан миннатдорчилик билдирди.
Шуни алоҳида таъкидлаш жоизки, мазкур таълим муассасасида синфлараро ва гуруҳлараро фанлар бўйича билимлар беллашуви мусобақалари мактаб директори Баҳром Болтабоев ҳамда ўқув ишлари бўйича директор ўринбосари Ш.Тажибоевларнинг ташаббуси ва қўллаб-қувватлови билан ўтказилиб, бу беллашувларда бошланғич синфлар ўқувчилари доимо фаоллик кўрсатишади. Бу галги, беллашувда ҳам 2-, 3-, 4-синфарнинг ўқувчилари ўқиш саводхонлиги, она тили ва математика фанларидан олган билим ва кўникмаларини беллашув шартларини бажариш асносида янада мустаҳкамладилар.
Билимлар беллашуви билимдонларини тақдирлашга бағишланган тадбирда ўқувчилар устозларига янада кўпроқ ва яхшироқ ўқишга ваъда бердилар ва бири-биридан шўх рақслар, куй-қўшиқлар ижро этиб, тадбирга янада гўзал жозиба бахш этдилар. Шу билан бирга ўқувчилар тадбирнинг адабий-мусиқий қисмига ўзгача руҳ бағишловчи фанлар бўйича баҳслар ҳам олиб бордилар.
Тадбир якунида ғолиб ўқувчилар мактаб маъмурияти томонидан муносиб рағбатлантирилдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
