Адлия органлари фаолиятида жорий қилинган қўшимча йўналиш ва вазифалар орқали аҳолига янада қулайлик ва имтиёзлар яратилди
Аҳолининг ҳуқуқий маданиятини ошириш ислоҳотларимиз самарадорлигининг муҳим омили ҳисобланади. Ўз ҳуқуқ ва мажбуриятларини яхши билган фуқаролар эса жойларда қонуний ҳужжатлар ижроси таъминланиши ва ҳуқуқбузарлик ҳолатлари олди олинишига ҳисса қўшади. Шу мақсадда сўнгги йилларда қонунчилик тизими анча такомиллаштирилди.
Маълумки, Ўзбекистон Республикаси Президентининг 2024 йил 24 май куни “Маъмурий ислоҳотлар доирасида Адлия органлари ва муассасаларининг масъулиятини янада ошириш ҳамда ихчам бошқарув тизимини шакллантириш тўғрисида”ги Фармони қабул қилиниб, Адлия органларининг қўшимча фаолият йўналиши ва қўшимча вазифалари белгиланган эди. Аҳолининг ҳуқуқий маданиятини ошириш ва қонунчиликдаги янгиликлар билан таништириш мақсадида “Ҳуқуқий тарғибот куни” лойиҳаси доирасида Амударё туманининг Гулзор маҳалла фуқаролар йиғини маъмурий биносининг мажлислар залида мазкур фармон мазмун-моҳияти тарғиботи юзасидан тадбир ташкил қилинди.
Тадбирда Қорақалпоғистон Республикаси Адлия вазирлиги ходими Жамшид Бекимбетов, туман Адлия бўлими бошлиғи Мансур Садиков, туман Давлат архиви бошлиғи Баҳодир Жуманиёзов, Камбағалликни қисқартириш ва бандликка кўмаклашиш туман бўлими ходими Улуғбек Бабажонов, “Маҳалла еттилиги”дан вакиллар, Фуқаролик ҳолати далолатномаларини ёзиш органи туман бўлими ходимлари, Давлат хизматлари маркази туман бўлими ходимлари, туман Адлия бўлими Юридик хизмат кўрсатиш маркази ходимлари, кўча бошилари ва ёшлар иштирок этишди.
Табирда сўзга чиққанлар ушбу фармонда белгиланган вазифалар орқали фуқароларга берилган қулайликлар ва имтиёзлар хусусида тўхталишди.
Хусусан, мазкур фармон билан қуйидагилар: аҳолининг кундалик ҳаётида учрайдиган ҳуқуқий муаммоларни аниқлаш, уларни таҳлил қилиш ва бартараф этиш бўйича амалий чоралар кўриб бориш; жойларда аниқланган тизимли муаммоларни бартараф этишга қаратилган қонунчилик ҳужжатлари лойиҳасини ишлаб чиқиш; фуқароларга бепул бирламчи юридик ёрдам кўрсатиш тизимини йўлга қўйиш ва мувофиқлаштириб бориш; давлат органлари ва ташкилотлари, маҳаллий давлат ҳокимияти органлари ҳамда фуқароларнинг ўзини ўзи бошқариш органларида ягона ҳуқуқни қўллаш амалиётини шакллантиришда уларга методик ёрдам кўрсатиб бориш Адлия органларининг қошимча фаолият йўналишлари қилиб белгиланди.
Бундан ташқари, жойларда аҳоли томонидан кўтарилаётган долзарб муаммоларни кўриб чиқиш ва ҳал этиш учун ҳар ойда маҳаллаларда “Адлия куни” тадбирларини ўтказиш, олис ҳудудлардаги маҳаллаларда эса ҳар ойда камида икки маротаба сайёр давлат хизматларини кўрсатиб бориш; уйма-уй юриш ва “Ҳуқуқий кўмак” акцияларини ўтказиш орқали фуқаролар кундалик ҳаётида аниқланадиган ҳуқуқий муаммоларни бартараф этиш юзасидан қонунчиликни такомиллаштириш бўйича таклифлар тайёрлаш; аҳолига, авваламбор “Темир дафтар”, “Аёллар дафтари”, “Ёшлар дафтари” ҳамда “Ижтимоий ҳимоя ягона реестри” ахборот хизматига киритилган фуқароларга бепул бирламчи юридик ёрдам кўрсатишни таъминлаш ва шу каби вазифалар фармон билан туман ва шаҳар адлия бўлимларига юклатилди.
Эндиликда жорий йилнинг 1 июлидан бошлаб фуқароларга бепул бирламчи юридик ёрдам кўрсатишнинг тартиблари амалиётга жорий қилинади.
Тадбир давомида Камбағалликни қисқартириш ва бандликка кўмаклашиш туман бўлими ходими Улуғбек Бабажонов ишсиз аҳоли вакилларини туманда мавжуд бўлган бўш иш ўринлари хусусидаги маълумотлар билан таништирди.
Шунингдек, соҳа матухассисилари томонидан аҳолига давлат хизматларидан фойдаланиш тартиби, Ягона интерактив давлат хизматлари портали ва бошқа электрон ресурслардан фойдаланиш афзалликлари тўғрисида маълумотлар берилди.
Тадбир якунида масъуллар томонидан фуқароларнинг қонунчилик ва ҳуқуқий мавзудаги саволларига тегишли жавоблар қайтарилди ҳамда зарур тавсиялар берилди.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
