Амударё тумани хотин-қизлар ҳунармандчилик ва тадбиркорлик марказининг очилиш маросими бўлиб ўтди
Жорий йилнинг 30 июль куни Амударё тумани хотин-қизлар ҳунармандчилик ва тадбиркорлик марказининг очилиш маросими бўлиб ўтди. Маросимда Ўзбекистон Республикаси Бош вазири ўринбосари Зулайҳо Маҳкамова, Қорақалпоғистон Республикаси Вазирлар Кенгаши Раиси ўринбосари, Оила ва хотин-қизлар қўмитаси раиси Марям Аҳмедова, туман ҳокими Собир Хўжаметов, секторлар раҳбарлари, тумани ҳокими ўринбосари, Оила ва хотин-қизлар бўлими бошлиғи Гўзал Сабурова, “Нуроний” жамғармаси туман бўлими раиси Бекман Аллаберганов, қўшни туманларнинг Оила ва хотин-қизлар бўлими бошлиқлари, туман хотин-қизлар фаоллари, тадбиркор ва ҳунарманд хотин-қизлар иштирок этдилар.
Очилиш маросимида Ўзбекистон Республикаси Бош вазири ўринбосари Зулайҳо Маҳкамова бугунги кунда хотин-қизларни ҳар томонлама қўллаб-қувватлаш, уларнинг ҳуқуқ ва манфаатларини ҳимоя қилиш, ҳаётда ва жамиятда ўз ўрнини топишга ёрдам бериш борасида амалга оширилаётган туб ислоҳотлар хусусида тўхталиб ўтди.
Бош вазир ўринбосари ўз сўзида мамлакатимизда хотин-қизларнинг ижтимоий-сиёсий фаоллигини ошириш, уларнинг турли соҳа ва тармоқларда ўз қобилият ва имкониятларини рўёбга чиқариши учун шарт-шароит яратиш, ҳуқуқ ва қонуний манфаатларига сўзсиз риоя қилинишини таъминлаш, оналик ва болаликни ҳар томонлама қўллаб-қувватлаш, шунингдек, оила институтини мустаҳкамлаш борасида кенг кўламли ишлар амалга оширилаётганини таъкидлади.
Шунингдек, туман ҳокими Собир Хўжаметов туманда хотин-қизлар бандлигини таъминлаш, уларнинг даромад топишлари учун кўмак бериш, ижтимоий ҳимояга муҳтож хотин-қизларни қўллаб-қувватлаш борасида олиб борилаётган ишларга тўхталди.
Очилиш маросими туман Маданият бўлими томонидан тайёрланган ажойиб куй-қўшиқлар ҳамда бетакрор рақслар билан юқори кайфиятда давом этди.
Шу ўринда маълумот тариқасида айтиш жоизки, мазкур хотин-қизлар ҳунармандчилик ва тадбиркорлик марказида тўртта йўналишда хотин-қизлар касб-ҳунарга ўқитилади. Булар IT йўналиши, ҳунармандчилик, пазандачилик, тикувчилик йўналишлари бўлиб, хотин-қизлар ўзлари қизиққан йўналишларда тажрибали мутахассислар томонидан билимлар оладилар ҳамда сертификатга эга бўладилар.
Ҳудудларда ташкил этилаётган бу каби хотин-қизлар ҳунармандчилик ва тадбиркорлик марказлари хотин-қизларнинг ҳуқуқ ва қонуний манфаатларини ҳимоя қилиш, уларнинг иқтисодий, ижтимоий ва сиёсий фаоллигини ошириш, соғлиғини сақлаш, касбга ўқитиш ва бандлигини таъминлаш, тадбиркорликка кенг жалб этиш, эҳтиёжманд хотин-қизларни ижтимоий қўллаб-қувватлаш каби устувор мақсадларга хизмат қилади.
Қайд этиш жоизки, Ўзбекистон Республикаси Президентининг “Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида”ги ҳамда “Оила ва хотин-қизлар билан ишлаш, маҳалла ва нуронийларни қўллаб-қувватлаш тизимини такомиллаштириш чора-тадбирлари тўғрисида”ги Фармонлари, “Хотин-қизларни қўллаб-қувватлаш, уларнинг жамият ҳаётидаги фаол иштирокини таъминлаш тизимини янада такомиллаштириш чора-тадбирлари тўғрисида”ги қарори бу борадаги ишларни янги босқичга олиб чиқишда устувор аҳамият касб этмоқда.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
