Ҳуқуқни муҳофаза қилувчи органлар фаолиятини мувофиқлаштирувчи кенгаш йиғилиши бўлиб ўтди

1 август куни Амударё тумани ҳуқуқни муҳофаза қилувчи органлар фаолиятини мувофиқлаштирувчи кенгашининг йиғилиши ўтказилди. Йиғилишда 2024 йилнинг биринчи ярмида ҳудудда жиноятчиликка қарши кураш ва унинг олдини олишдаги ҳуқуқни муҳофаза қилиш идоралари томонидан амалга оширилган ишлар кенг муҳокама қилинди ва келгусидаги вазифалар белгилаб олинди.

Йиғилишда Қорақалпоғистон Республикаси прокуратураси бўлим бошлиғи Арман Ергунусов, туман прокурори Азиз Рўзметов, туман ИИБ бошлиғи Жамоладдин Юсупов, Солиқ инспекцияси бошлиғи Жаҳонгир Раҳимов, туман ҳокими ўринбосари, Оила ва хотин-қизлар бўлими бошлиғи Гўзал Сабурова, тумандаги 49та овул ва маҳаллаларда фаолият олиб бораётган “еттилик” аъзолари, прокуратура ва ИИБ ходимлари иштирок этдилар. Йиғилишда туман прокурори Азиз Рўзметов туманда жиноятчилик ва ҳуқуқбузарликларнинг олдини олиш борасида амалга оширилган ишлар ҳақида ҳисобот берди.

Таъкидланганидек, Амударё туман прокуратураси томонидан ҳудуддаги ҳуқуқни муҳофаза қилувчи органлар билан ҳамкорликда “Инсон қадри учун” деган эзгу ғояни тўлиқ рўёбга чиқариш, ҳудудда қонун устуворлигини ва қилмиш учун жазо муқаррарлигини таъминлаш тамойили асосида қонунийликни мустаҳкамлаш, фуқароларнинг ҳуқуқ ва эркинликларини, жамият ва давлат манфаатларини ҳимоя қилиш, ҳуқуқбузарликларнинг олдини олиш ва профилактика қилиш борасида кенг кўламли ишлар амалга оширилмоқда.

Ҳисоботда келтирилишича, Ўзбекистон Республикаси Президентининг “Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида”ги Фармонида белгиланган вазифаларнинг ижросини таъминлаш мақсадида қатор чора-тадбирлар амалга оширилиб келинмоқда. Соҳадаги ишларни тартибга солишда ҳуқуқбузарликлар оқибати билан курашиш эмас, балки уларнинг барвақт олдини олиш зарурлигига алоҳида эътибор қаратилмоқда.

Муҳтарам Президентимиз ташаббуси билан соҳада қатор ислоҳотлар амалга оширилиб, ишлар “маҳаллабай” ва “хонадонбай” тизимда ташкил этилаётганлиги сабабли ўтган даврда ҳудуддаги 49та маҳаллаларнинг 13тасида, яъни 26,5 фоизида жиноятлар содир этилишига йўл қўйилмаган ҳамда 20таси, яъни 40,8 фоизида жиноятлар камайган ёки барқарор сақланган.

Шунингдек, хотин-қизларга нисбатан тазйиқ ва зўравонликларнинг олдини олиш мақсадида жами 158та ҳимоя ордерлари берилган, барчаси ИИБ ташаббуси ва фуқароларнинг аризалари асосида расмийлаштирилган.

Йиғилишда ҳуқуқни муҳофаза қилувчи органлар ходимларига ҳамда маҳаллалар “еттилиги” масъулларига жиноят ва ҳуқуқбузарликларнинг олини олишда ҳамкорликни янада кучайтириш лозимлиги таъкидланди ҳамда келгусида амалга оширилиши лозим бўлган муҳим вазифалар белгилаб олинди.

Чарос Арслонова, туман ҳокимлигининг Ахборот хизмати раҳбари.