Аҳоли фаровонлиги йўлида кенг кўламли бунёдкорлик ишлари амалга оширилмоқда

Мамлакатимизнинг барча ҳудудлари сингари Амударё туманининг шаҳар, овул ва маҳаллалари ҳам йилдан йилга гўзаллашиб, янгиланиб, аҳолининг турмуш фаровонлигини янада юксалтиришга хизмат қилувчи замонавий бинолар қад ростламоқда. Турли манбалардан ажратилган маблағлар ва қўли гул, тажрибали қурувчиларнинг тинимсиз меҳнатлари сабабли муҳим инфраструктура объектлари қурилмоқда. Айниқса, туман марказидан олис ҳудудларда яшаётган аҳолининг кўп йиллар мобайнида ечимини топмай келаётган муаммолари бугун бартараф қилинаётгани инсонлар қалбида шукроналик туйғуларини уйғотмоқда. Салкам 214 минг нафарга яқин аҳоли тинч-тотув ҳаёт кечираётган туманнинг ҳар бир овул ва маҳалласида бугун ҳам қурилиш ва бунёдкорлик ишлари юқори суръатларда давом этмоқда.

Қангли овули ҳудудида шу кунга қадар фақат биттагина – 49-сонли давлат мактабгача таълим ташкилоти мавжуд бўлиб, боғча биноси эскирганлиги сабабли муассаса иш фаолиятини тўхтатган эди. Бугунги кунда овул аҳолиси учун барча қулайликларга эга бўлган замонавий, 90 ўринли мактабгача таълим ташкилоти биносини қайта реконструкция қилиш ишлари олиб борилмоқда. Реконструкция ишлари пудратчи ташкилот “Жумуртов тех таъмир сервис” МЧЖ томонидан амалга оширилмоқда. Қурилиш-таъмирлаш ишларига умумий қиймати 3 млрд 335 млн сўм маблағ сарфланиши кўзда тутилган.

Эски боғчада шароитлар бўлмагани, узоқ йиллар давомида бу борада кўплаб қийинчиликлар кузатилгани ҳам айни ҳақиқат. Келажак эгалари дастлабки таълим-тарбияни мактабгача таълим ташкилотларида олар экан, боғчалар фарзандларимизнинг етук ва баркамол авлод бўлиб вояга етишлари, Ватанимиз равнақига ҳисса қўшадиган комил инсон бўлиб улғайишларида муҳим аҳамиятга эга. Бу ҳақиқатни чуқур англаган ва шу пайтгача “фарзандларимиз қачон замонавий боғчада таълим-тарбия олар экан”, деган саволлар билан яшаб келаётган овул аҳли бугун давлатимиздан, ҳукуматимиздан жуда миннатдор.

Куюк кўпир овули туманимизнинг чекка ҳудудларидан бири бўлиб, овулдаги 5-сонли оилавий поликлиника шифокорлари ҳудуд аҳолисининг соғлигини сақлаш йўлида самарали фаолият юритиб келмоқда. Поликлиниканинг эски, яроқсиз ҳолга келиб қолган биносида шароитларнинг йўқлиги узоқ йиллардан бери аҳолининг асосий муаммолардан бири бўлиб келган. Бугун эса эски бино ўрнида янги, замонавий кўринишга ҳамда шарт-шароитларга эга бўлган, икки қаватли оилавий поликлиника биноси қад ростлади ҳамда фойдаланишга топширилиш арафасида турибди. “Жумуртов тех таъмир сервис” МЧЖ томонидан 3 млрд сўмдан ортиқ маблағ эвазига амалга оширилган қурилиш ишлари якунланиб, бинога замонавий инвентарлар ҳамда тиббий асбоб-ускуналар буюртма қилинган.

Бугунги кунда тадбиркорлар учун берилаётган имкониятлар ва имтиёзлар ҳар бир маҳалладаги ишбилармонлар фаолиятида ҳам яққол намоён бўлмоқда. Куюк кўпир овули ҳудудидаги бўш турган ерлар Президент фармони асосида тадбиркорларга берилиб, кўплаб янги иш ўринлари яратилгани ва бизнес эгаларининг даромадлари ошаётгани фикримизнинг исботидир. Ҳудудда янги қурилаётган аҳолига хизмат кўрсатиш маркази ҳам тадбиркорнинг ана шу имкониятлардан самарали фойдаланаётганининг далилидир. Қурилиш ишлари ўз ниҳоясига етиб, объект фойдаланишга топширилгач, 20 нафар ишсиз аҳолининг бандлиги таъминланишига эришилади.

Туман марказидан жуда олисда, Туркманистон билан чегарада жойлашган Қорамон маҳалласида олиб борилаётган бунёдкорлик ишлари ҳам ҳавас қилгудек даражада. Ҳудуднинг шифобахш ҳавоси, бетакрор табиати, атрофни ўраб олган яшиллиги кишини ўзига тортади. 4 минг 425 нафар аҳоли яшаб келаётган Қорамон маҳалласида асосан деҳқончилик ривожланган бўлиб, қорамонликлар халқимизни сифатли озиқ-овқат маҳсулотлари билан таъминлаб келмоқда. Аммо, ҳудудда шу кунга қадар болалар боғчаси йўқлиги овул аҳолисининг ҳақли эътирозларига сабаб бўлиб келаётган эди. Мақсади, орзу-истаклари бир бўлган ҳудуд аҳолисининг бу муаммоси ҳам ижобий ечимини топиш арафасида турибди.

Муҳтарам Президентимизнинг алоҳида ғамхўрлиги, олис ва чекка ҳудудлар аҳолиси фаровонлиги йўлида амалга ошираётган кенг кўламлиги ислоҳотлари натижасида Қорамонда ҳам замонавий давлат мактабгача таълим ташкилоти биноси қад ростламоқда. Маҳалла болажонлари учун 150 ўринли, замонавий кўринишдаги, барча шароитларга эга бўлган мактабгача таълим ташкилоти биносининг қурилиши сўнгги босқичда турибди.

Муассаса биносининг қурилишига жами 6 млрд сўм ажратилган бўлиб, қурилиш ишлари “Манғит инвест максимум” МЧЖ томонидан амалга оширилмоқда. Айни пайтда бинони пардозлаш ишлари давом этмоқда. Маҳалла фаоллари, нуроний отахонлар билан суҳбатлашар эканмиз, фарзандларимиз боғча кўрмасдан мактабга бордилар, энди невараларимиз учун бундай шароитлар яратилмоқда, бундан жуда хурсандмиз, дея ўз миннатдорчиликларини билдирдилар.

Чарос Арслонова, туман ҳокимлигининг ахборот хизмати раҳбари.