АСОСИЙ ФАНЛАР ОЛИМПИАДАСИНИНГ ТУМАН БОСҚИЧИ ҒОЛИБЛАРИ ТАҚДИРЛАНДИ

Мамлакатимизда барча соҳалар қатори умумтаълим тизимида амалга оширилаётган ислоҳотлар ҳам самарали натижалар бермоқда. Ҳар йили ўтказиладиган олимпиадалар, айниқса, асосий фанлар олимпиадаси, мактаб ўқувчиларининг билим ва қобилиятларини оширишда муҳим аҳамият касб этади. Бу каби билимлар синови мамлакатнинг илмли ва ижодий фикрлайдиган ёш авлодини шакллантиришга йўналтирилгани билан аҳамиятлидир.

Айниқса, асосий фанлар олимпиадаси умумтаълим тизимидаги муҳим тадбирлардан бири ҳисобланади. Ушбу олимпиада математика, физика, биология, кимё, она тили ва адабиёт, чет тили ва бошқа асосий фанлар бўйича ўқувчиларнинг билимларини синаш учун ташкил этилади.

Асосий олимпиадалар тўрт босқичда ўтказилади. Биринчи босқич мактаблар миқёсида сентябрь ойида, иккинчи босқич, яъни туман ва шаҳар босқичи октябрь ойида, учинчи босқич Қорақалпоғистон Республикаси, вилоятлар ва Тошкент шаҳри миқёсида ноябрь ойида, тўртинчи босқич, яъни республика миқёсидаги босқич апрель-май ойларида ўтказилади.

Жорий йилнинг 21 октябрь санасидан бошлаб Амударё тумани Мактабгача ва мактаб таълими бўлимига қарашли умумтаълим мактаблари ўқувчилари ўртасида ҳам фанлар олимпиадасига старт берилган эди. Мазкур тадбир тумандаги 40-, 55-, 76-сонли мактабларда Вазирлар Маҳкамасининг қарори билан тасдиқланган Низом талаблари асосида ўтказилди.

Асосий фанлар олимпиадаси туман босқичи ғолиблари ва фахрли ўринлар эгалари 82-сонли умумтаълим мактабида ўтказилган тадбирда тантанали равишда тақдирландилар. Тадбирда Амударё тумани Мактабгача ва мактаб таълими бўлими бошлиғи Ялғаш Шомуратов нутқ сўзлаб, ғолиб ва фаол иштирокчиларга омадлар ҳамда кейинги босқичда муваффақиятлар тилади.

Айтиш жоизки, олимпиадада тумандаги 86та мактабларнинг 9-11-синфларида таълим олаётган 2700га яқин ўқувчи иштирок этган эди. Улар орасидан энг билимли ўқувчилар асосий фанлар олимпиадасининг туман босқичи ғолиблари бўлишди ва Қорақалпоғистон Республикаси миқёсида ўтказиладиган учинчи босқичига йўлланмани қўлга киритдилар.

Ўзбек тили байрами арафасида ўтказилган “Йилнинг энг яхши ўзбек тили ўқитувчиси” кўрик-танловининг Ўзбекистон Республикаси босқичида тумандаги 40-сонли умумтаълим мактабининг Она тили ва адабиёт фани ўқитувчиси Иқболой Юсуфова фахрли 3-ўринни эгаллаган эди. Тадбир давомида Иқболой Юсуфовага ҳам туман Мактабгача ва мактаб таълими бўлимининг дипломи ва эсдалик совғалари топширилди.

Ўтказилган олимпиада мактаблардаги таълим-тарбия сифати ва самарадорлигини аниқлашнинг мезони сифатида ҳам хизмат қилади. Қолаверса, бундай тадбирлар орқали ўқувчиларда ўз фанларига бўлган қизиқиш ортиб, билим ва тажрибаларини янада мустаҳкамлаш имконияти яратилади. Эндиликда ғолиб ўқувчилар кейинги босқичга пухта тайёргарлик кўришни бошлайдилар.

Маълумот ўрнида, асосий фанлар олимпиадасининг учинчи босқичида ғолиб бўлган ҳар бир ўқувчига пул мукофотлари берилади. Жумладан, 1-ўринни эгаллаган ўқувчига — базавий ҳисоблаш миқдорининг 6 баравари, 2-ўрин соҳибига ёки соҳибасига базавий ҳисоблаш миқдорининг 4 баравари, 3-ўринни эгаллаган иштирокчига эса базавий ҳисоблаш миқдорининг 3 баравари миқдорида мукофот пули берилади. Тўртинчи босқичда ғолиб бўлган ҳар бир ўқувчига эса учинчи босқичдагидан 2 баравар кўп миқдорда мукофот пули берилади. Қолаверса, Вазирлик томонидан асосий олимпиаданинг тўртинчи босқичида 1-, 2- ва 3-ўринларни эгаллаган ўқувчиларга ихтисослик фани бўйича давлат олий таълим муассасаларига кириш имтиҳонларида максимал балл олиш ҳуқуқини берувчи ва уч йил муддат давомида амал қилувчи диплом берилади.

Асосий фанлар олимпиадасининг туман босқичи ғолибларига кейинги босқичларда ҳам омад ва муваффақиятлар тилаймиз!