36-сонли мактабда “Happy Kids - Счастливые дети” номли тадбир ўтказилди

Амударё туманида жойлашган 36-сонли умумтаълим ўрта мактабида хорижий тиллар ўқитувчилари ва ўқувчилар ташаббуси билан қизиқарли ва таассуротларга бой тадбир ўтказилди. Тадбир “Happy Kids - Счастливые дети” деб номланиб, у мактабда хорижий тиллар услуб бирлашмаси ўқитувчилари томонидан ташкил қилинди. Тадбирда рус ва инглиз тили фанлари ўқитувчилари ва мактабнинг турли синф ўқувчилари фаол иштирок этишди.

Тадбир аввалида мактаб директорининг маънавият ва маърифат ишлари бўйича ўринбосари Ваҳобжон Давлетов сўзга чиқиб, фан ойликлари ўқувчиларнинг дарсларни ўзлаштириш даражасини оширишда муҳим аҳамиятга эга эканлигини қайд этиб ўтди.

Дарҳақиқат, фан ойликларида ҳар бир фан бўйича чуқурлаштирилган билимлар берилиб, ўқувчиларга янги мавзуларни ўзлаштириш учун кўплаб имкониятлар яратилади. Фан ойликлари жараёнида амалий машғулотлар, турли тадбирлар ўтказилиб, ўқувчиларнинг билим даражаси ва қобилияти чуқурлаштирилади. Айниқса, интерактив усуллар ёрдамида ўтказиладиган дарслар уларнинг қизиқишини орттириб, билимларни ёдда сақлаб қолиш қобилиятини осонлаштиради.

Тадбир мактабнинг 4-а, 4-б, 5-, 6-, 7- ва 8-синф ўқувчилари иштирокида ўтказилди. Мазкур синф ўқувчилари ўзларининг ҳар хил ижодий чиқишлари, рақслари ва шеърлари билан хорижий тилларни қанчалик чуқур ўрганганликларини томошабинлар ва ота-оналарига намойиш қилишди.

Айтиш жоизки, хорижий тилларни ўрганишда турли тадбирлар ва бадиий кечалар ҳам катта аҳамиятга эга. Бундай тадбирлар орқали ўқувчилар тилни нафақат назарий жиҳатдан, балки амалиётда ҳам қўллаш имконига эга бўладилар. Хорижий тилдаги кечалар ва тадбирлар ўқувчиларда тилни ўрганишга бўлган қизиқишни оширади, ўзга халқларнинг маданияти, урф-одат ва анъаналари билан танишиш имконини беради. Улар турли хил ўйинлар, шеърлар ва саҳна кўринишлари орқали ўз билимини мустаҳкамлаб, тегишли хорижий тилни пухта ўзлаштириш имкониятига эга бўладилар.

Қолаверса, бундай тадбирлар ўқувчиларнинг ижодий қобилиятларини ривожлантиришга ва жамоада ишлаш кўникмасини шакллантиришга ҳам ёрдам беради.

Тадбир мактабнинг услуб бирлашмаси раҳбари Замира Отажанова, рус тили ўқитувчилари Насиба Аҳмедова, Раъно Аҳмедова, Нодира Солиева, Муҳаббат Турсунбоева, Юлдуз Юсупова, инглиз тили ўқитувчилари Хосият Ражапова, Райҳон Ўразбоева, Дилдор Халменова,  Дилнура Бобониязова, Нилуфар Шомурадовалар томонидан ташкил қилинди.

Тадбирнинг асосий мақсади — ўқувчиларнинг хорижий тилларни ўрганишга бўлган қизиқишларини ошириш, уларнинг дунёқарашини кенгайтириш ҳамда олий ўқув юртларига ўқишга киришга тайёрлаш орқали ёруғ келажагига замин яратишдир.

Тадбирда ўқувчилар нафақат билимларини синовдан ўтказишди, балки ўзаро мулоқотга киришиб, жамоада ишлаш кўникмасини ҳам оширдилар. Тадбир давомида ўқувчилар томонидан намойиш этилган чиқишлар, уларнинг ижодий қобилиятини намоён этувчи рақслар ва шеърлар иштирокчиларда катта таассуротлар қолдириб, мактабда маданий-маънавий муҳитни янада яхшилашга ҳисса қўшди.

Тадбир охирида фаол ва ижодкор ўқувчиларга миннатдорлик билдирилди. Бу каби тадбирлар орқали нафақат тадбир иштирокчилари, балки томошабинларда ҳам хорижий тилларни ўрганишга бўлган қизиқиш ва иштиёқ ошди.