36-sonli maktabda “Happy Kids - Schastlivie deti” nomli tadbir oʻtkazildi

Amudaryo tumanida joylashgan 36-sonli umumtaʼlim oʻrta maktabida xorijiy tillar oʻqituvchilari va oʻquvchilar tashabbusi bilan qiziqarli va taassurotlarga boy tadbir oʻtkazildi. Tadbir “Happy Kids - Schastlivie deti” deb nomlanib, u maktabda xorijiy tillar uslub birlashmasi oʻqituvchilari tomonidan tashkil qilindi. Tadbirda rus va ingliz tili fanlari oʻqituvchilari va maktabning turli sinf oʻquvchilari faol ishtirok etishdi.

Tadbir avvalida maktab direktorining maʼnaviyat va maʼrifat ishlari boʻyicha oʻrinbosari Vahobjon Davletov soʻzga chiqib, fan oyliklari oʻquvchilarning darslarni oʻzlashtirish darajasini oshirishda muhim ahamiyatga ega ekanligini qayd etib oʻtdi.

Darhaqiqat, fan oyliklarida har bir fan boʻyicha chuqurlashtirilgan bilimlar berilib, oʻquvchilarga yangi mavzularni oʻzlashtirish uchun koʻplab imkoniyatlar yaratiladi. Fan oyliklari jarayonida amaliy mashgʻulotlar, turli tadbirlar oʻtkazilib, oʻquvchilarning bilim darajasi va qobiliyati chuqurlashtiriladi. Ayniqsa, interaktiv usullar yordamida oʻtkaziladigan darslar ularning qiziqishini orttirib, bilimlarni yodda saqlab qolish qobiliyatini osonlashtiradi.

Tadbir maktabning 4-a, 4-b, 5-, 6-, 7- va 8-sinf oʻquvchilari ishtirokida oʻtkazildi. Mazkur sinf oʻquvchilari oʻzlarining har xil ijodiy chiqishlari, raqslari va sheʼrlari bilan xorijiy tillarni qanchalik chuqur oʻrganganliklarini tomoshabinlar va ota-onalariga namoyish qilishdi.

Aytish joizki, xorijiy tillarni oʻrganishda turli tadbirlar va badiiy kechalar ham katta ahamiyatga ega. Bunday tadbirlar orqali oʻquvchilar tilni nafaqat nazariy jihatdan, balki amaliyotda ham qoʻllash imkoniga ega boʻladilar. Xorijiy tildagi kechalar va tadbirlar oʻquvchilarda tilni oʻrganishga boʻlgan qiziqishni oshiradi, oʻzga xalqlarning madaniyati, urf-odat va anʼanalari bilan tanishish imkonini beradi. Ular turli xil oʻyinlar, sheʼrlar va sahna koʻrinishlari orqali oʻz bilimini mustahkamlab, tegishli xorijiy tilni puxta oʻzlashtirish imkoniyatiga ega boʻladilar.

Qolaversa, bunday tadbirlar oʻquvchilarning ijodiy qobiliyatlarini rivojlantirishga va jamoada ishlash koʻnikmasini shakllantirishga ham yordam beradi.

Tadbir maktabning uslub birlashmasi rahbari Zamira Otajanova, rus tili oʻqituvchilari Nasiba Ahmedova, Raʼno Ahmedova, Nodira Soliyeva, Muhabbat Tursunboyeva, Yulduz Yusupova, ingliz tili oʻqituvchilari Xosiyat Rajapova, Rayhon Oʻrazboyeva, Dildor Xalmenova,  Dilnura Boboniyazova, Nilufar Shomuradovalar tomonidan tashkil qilindi.

Tadbirning asosiy maqsadi — oʻquvchilarning xorijiy tillarni oʻrganishga boʻlgan qiziqishlarini oshirish, ularning dunyoqarashini kengaytirish hamda oliy oʻquv yurtlariga oʻqishga kirishga tayyorlash orqali yorugʻ kelajagiga zamin yaratishdir.

Tadbirda oʻquvchilar nafaqat bilimlarini sinovdan oʻtkazishdi, balki oʻzaro muloqotga kirishib, jamoada ishlash koʻnikmasini ham oshirdilar. Tadbir davomida oʻquvchilar tomonidan namoyish etilgan chiqishlar, ularning ijodiy qobiliyatini namoyon etuvchi raqslar va sheʼrlar ishtirokchilarda katta taassurotlar qoldirib, maktabda madaniy-maʼnaviy muhitni yanada yaxshilashga hissa qoʻshdi.

Tadbir oxirida faol va ijodkor oʻquvchilarga minnatdorlik bildirildi. Bu kabi tadbirlar orqali nafaqat tadbir ishtirokchilari, balki tomoshabinlarda ham xorijiy tillarni oʻrganishga boʻlgan qiziqish va ishtiyoq oshdi.