72-сонли қишлоқ оилавий поликлиникаси шифокорлари томонидан аҳолига сифатли тиббий хизмат кўрсатилмоқда

Хизр эли ва бешовул маҳаллалари аҳли соғлом турмуш тарзига жуда эътиборли. Бунга биз ижодий жамоамиз билан мазкур маҳаллалар аҳлининг турмуш тарзи билан танишганимизда яққол гувоҳ бўлдик. Озода ва кўкаламзор кўчалар, фасад қисмларидан тортиб, ичкари уй ва ҳовлиларгача ободон, файзли хонадонлар, ҳосиллари йиғиштириб олинган томорқаларда амалга оширилаётган кузги-қишки юмушлар, ҳатто аҳолининг тўйлар бошлаётганидан бизнинг ҳам кайфиятимиз кўтарилди. Айтишади-ку, тинчлик, саломатлик, фаровонлик бор жойда хурсандчилик бўлади, деб. Назаримизда Бешовул ва Хизр элида буларнинг барчаси бор, муҳими, мазкур маҳаллалар аҳлининг саломатлиги доимий шифокорлар назоратида.

Аҳолининг репродуктив саломатлигини, оналик ва болаликни муҳофаза қилиш, фертил ёшидаги, шунингдек, ногиронлиги бўлган ва кекса ёшдаги фуқароларга тиббий хизмат кўрсатишни замон талаблари даражасида амалга оширишда ҳудуддаги 72-сонли қишлоқ оилавий поликлиникаси шифокорлари томонидан амалга оширилаётган профилактик тадбирлар, соғлом турмуш тарзи тарғиботига бағишланган тиббий суҳбатлар ўзининг ижобий натижасини бермоқда.

Мазкур тиббий муассаса хизмат ҳудудидаги 1412 та хонадон ва ушбу хонадонларда истиқомат қилувчи 7750 нафар аҳолининг ёши, касбий фаолияти, соғлиги бўйича масъул шифокорлар томонидан рўйхат шакллантирилган бўлиб, ушбу рўйхатга мувофиқ аҳолининг жинси, ёши, тиббий хизматга зарурати бўйича иш юритилади. Эркин Ражабов раҳбарлигида фаолият олиб борувчи 72-сонли қишлоқ оилавий поликлиникасида айни пайтда 6 нафар юқори малакали шифокор ва 34 нафар тиббий ходимлар Бешовул ва Хизр эли маҳаллалари аҳолиси саломатлигини муҳофаза қилишдек масъулият ҳисси билан меҳнат қилишади.

1 ёшгача бўлган 174 нафар, 14 ёшгача бўлган 2378 нафар болажонларнинг саломатлиги шифокорларнинг доимий назоратида. Фертил ёшидаги 1984 нафар аёллар саломатлигини мустаҳкамлаш, улар билан яккама-якка суҳбатлар ўтказиш, айниқса, ҳомиладор аёлларнинг соғлигини доимий назорат қилиш бўйича амалга оширилаётган чора-тадбирлар туфайли эрта ҳомиладорликнинг олди олиниб, чақалоқларнинг соғлом, нуқсонсиз туғилишига эришилмоқда,

Шунингдек, 1 ёшдан 14 ёшгача бўлган болаларни мавсумий ва ўткир респиратор касалликларга қарши эмлаш чора-тадбирлари ўз вақтида амалга оширилгани боис, сўнгги йилларда ҳудудда болалар орасида турли юқумли ва юқумли бўлмаган касалликларга чалиниш ҳолатлари кескин камайди.

Муассаса шифокорлари томонидан 40 ёшдан 100 ёшгача бўлган 2173 нафар фуқарога тиббий хизмат кўрсатиш бўйича ҳам алоҳида рўйхат шакллантирилган бўлиб, тиббий ходимлар уйма-уй кириб борган ҳолда ҳар бир фуқаронинг соғлиги юзасидан шикоятларини тинглаш орқали, агар ҳақиқатдан ҳам даволаниши зарур бўлса, беморларнинг тиббий муолажа олишларига яқиндан ёрдам беришмоқда.

Айниқса, 100 ёш атрофидаги ва 100 ёшдан ошган ва ногиронлиги бўлган фуқароларнинг яхши дам олишлари ва ўз саломатликларига эътиборли бўлишларини таъминлашга қаратилган тиббий тарғибот ва ташвиқот тадбирлари туфайли ҳудудда айнан шу тоифадаги фуқаролар сафи ва узоқ умр кўриш даражаси йил сайин ошиб бормоқда. Айни пайтда нафақадаги фуқаролар 705 нафардан зиёд бўлиб уларнинг асосий қисми 70 ва ундан юқори ёшдаги фуқаролардир.

Муассаса хизмат ҳудудида истиқомат қилувчи бир нафар 100 ёшдан ошган фуқаронинг бардам ва тетиклигидан аёнки, мазкур тиббий муассаса шифокорларининг халқ билан ҳамкор-у бирдамлиги, ҳудудда соғлом турмуш тарзини қарор топтириш мақсадида амалга ошираётган саъй-ҳаракатлари ҳақиқатдан ҳам эътиборга муносиб.

Шуни алоҳида эътироф этиш керакки, 72-сонли қишлоқ оилавий поликлиникаси шифокорлари нафақат ўз хизмат ҳудуди аҳолисининг саломатлигини муҳофаза қилиш, балки ободонлаштириш ва кўкаламзорлаштириш тадбирларининг инсон саломатлигига ижобий таъсири, ижтимоий фаолликни оширишдаги аҳамияти юзасидан ҳам тарғибот-ташвиқот тадбирларини олиб боришади.

Натижа эса кутилганидан ҳам зиёда. Гувоҳ бўлганимиздек, Бешовул ва Хизр эли маҳаллалари ҳудуди кун сайин ободон ва кўкаламзор гўшага айланиб бормоқда. Зеро, обод ва фаровон гўшаларда истиқомат қилувчи инсонлар нафақат жисмонан, балки маънан ҳам соғлом, ижтимоий фаол бўладилар. 72-сонли қишлоқ оилавий поликлиникаси жамоаси томонидан амалга оширилаётган ишлар бунинг яққол далилидир.

Робия Йўлдошева.